1 ବେନ୍‌ ନାରୁଣ୍ଡ୍‌ ସେନେକ୍‌ ସେନେକ୍‌ ଆଶିର୍ବାଦ୍‌ ପାହେମ୍‌ ଆତ୍କେ ବା ନିଜେ ସୁଦ୍ରେମ୍‌ ଆୟକଟ୍‌ ବା ମନ୍‌ତିଙ୍କ୍‌ ଢ଼ାଟାଙ୍କ୍‌ ମାଡ଼କଟ୍‌, ଅଣ୍ଡ୍‌ ସାୟେ ଆୟକଟ ହଟାତ୍‌ ନଷ୍ଟ ଆଦ୍‌ତଣ୍ଡ୍‌ । 2 ଦାର୍ମିକିଡ଼୍‌ ନାର୍ଗେ ଆତ୍କେ, ନାରୁଡ଼୍‌ ସାର୍ଦେଆଦ୍‌ତଡ଼୍‌; ମାତର୍‌ ଦୁଷ୍ଟ ନାରୁଡ଼୍‌ ଅଦିକାର୍‌ ପାହେମ୍‌ ଆତ୍କେ, ନାରୁଡ଼୍‌ ଦୁଃକାମ୍‌ତେ କେୟିତଡ଼୍‌ । 3 ବେନ୍‌ ନାରୁଣ୍ଡ୍‌ ଜ୍ଞାନତିଙ୍କ୍‌ ପ୍ରେମ ମାଡ଼ିତଣ୍ଡ୍‌, ଅଣ୍ଡ୍‌ ନିଜର ବାବାଙ୍କ୍‌ ୱେଡ଼୍‌କେ ମାଡ଼ିତଣ୍ଡ୍‌; ମାତର୍‌ ବେନ ଦାରିକିନ୍‌ତଡ଼୍‌ ମାନ୍‌ତଣ୍ଡ୍‌, ଅଣ୍ଡ୍‌ ନିଜେତ୍‌ ସମ୍ପତ୍ତି ମୁଃତିତଣ୍ଡ୍‌ । 4 ରାଜାଲ୍‌ ସାୟେତ୍‌ ବିଚାର୍‌ତଡ଼୍‌ ଦେଶ୍‌ତିଙ୍କ୍‌ ସାୟେ ମାଡ଼ିତଣ୍ଡ୍‌; ମାତର୍‌ ବେନ ପୁରସ୍କାର୍‌ ଅଦାନଣ୍ଡ୍‌, ଅଣ୍ଡ୍‌ ଆଦିଙ୍କ୍‌ ନଷ୍ଟ ମାଡ଼ିତଣ୍ଡ୍‌ । 5 ବେନ୍ ନାରୁଣ୍ଡ୍‌ ନିଜର୍‌ ଗାରେତଡ଼୍‌ତ ମିଚ୍‌ତେ ମିଙ୍ଗ୍‌ତେ ଗଟି କେତିତଣ୍ଡ୍‌, ଅଣ୍ଡ୍‌ ଅନ୍‌ ପାଦାମ୍‌ତେ ମାଇଦିଙ୍କ୍‌ ୱାଲେ ତାରିତଣ୍ଡ୍‌ । 6 ଦୁଷ୍ଟ ନାରୁଙ୍କ୍‌ କାରାପ୍‌ତାଗେ ଉଡ଼ିୟ୍‌ ମାନ୍ତେ; ମାତର୍‌ ଦାର୍ମିକିଡ଼୍‌ ପାଟା ନୁ ୱେଡ଼୍‌କେ ମାଡ଼ିତଡ଼୍‌ । 7 ଦାର୍ମିକ୍‌ ନାରୁଣ୍ଡ୍‌ ଗରିବ୍‌ନଡ଼୍‌ ସାୟେତ୍‌ ବିଷୟ ପୁନ୍ଦ୍‌ତଣ୍ଡ୍‌; ମାତର୍‌ ଆଦ୍‌ ପୁନ୍ଦାନ୍ ମାଇଦିଙ୍କ୍‌ ଦୁଷ୍ଟ ନାରୁଙ୍କ୍‌ ବୁଦ୍ଦ୍‌ ଇଲ୍‌ଲେ । 8 ଲିନ୍ଦେ ମାଡ଼ାନଡ଼୍‌ ନଗରତିଙ୍କ୍‌ ନିଡ଼୍‌ସ୍ପିତଡ଼୍‌; ମାତର୍‌ ଜ୍ଞାନିଡ଼୍‌ କପାମ୍‌ତିଙ୍କ୍‌ ଶାନ୍ତି ମାଡ଼ିତ୍‌ । 9 ଜ୍ଞାନଇଲ୍‌ୱେନଡ଼୍‌ ତଡ଼୍‌ ଜ୍ଞାନ୍‌ମାନ୍ଦାନଣ୍ଡ୍‌ ରାମ୍କ୍‌ ମାଡ଼୍‌କେ ଅଣ୍ଡ୍‌ କପାମ୍‌ ଆତ୍‌କେ ବା କାଉକେ, ବାତେ ଶାନ୍ତି ଇଲ୍‌ଲେ । 10 ଆୱ୍‌କାନ୍‌ ନାରୁଡ଼୍‌ ଦରମ୍‌ ନାରିଙ୍କ୍‌ ପାସ୍କିତଡ଼୍‌; ମେଣ୍ଡେ, ଅଡ଼୍‌ ସାୟେ ନାରୁଡ଼୍‌ ଜିଉନ୍‌ତିଙ୍କ୍‌ ମେଃକିତଡ଼୍‌ । 11 ମୁର୍କ ନିଜର୍‌ତେ ସାରେ କପାମ୍‌ତିଙ୍କ୍‌ ପେସ୍ପିତଣ୍ଡ୍‌; ମାତର୍‌ ଜ୍ଞାନିଡ଼୍‌ ଆଦ୍‌ ସାମ୍‌ଲାମାଡ଼ି କଟ ମାନ୍‌ତଣ୍ଡ୍‌। 12 ଶାସନକର୍ତ୍ତାଲ ବେସୁଙ୍କ୍‌ ମିଚ୍‌ ଗଟିନେ କେୱୁତାରିତଣ୍ଡ୍‌, ଆସୁଙ୍କ୍‌ ଅନ୍‌ ପାଡ଼ିୟ୍‌ ମାଡ଼ାନଡ଼୍‌ ସାରେ ଦୁଷ୍ଟ ଆଦ୍‌ତଡ଼୍‌ । 13 ଗରିବ୍‌ ନୁ ଅନ୍ୟାୟ୍‌ ମାଡ଼ାନଡ଼୍‌ ଅଣ୍ଡୟ୍‌ତାଗ୍‌ କାଇଲିତଡ଼୍‌, ସଦାପ୍ରବୁ ଇର୍‌ୱୁଡ଼୍‌କ୍‌ କଣ୍ଢା ୱେସ୍‌ ମାଡ଼ିତଣ୍ଡ୍‌ । 14 ବେନ୍‌ ରାଜାଲ୍‌ ବିଶ୍ୱାସ୍ତେ ଲେକେ ଗରିବ୍‌ନଡ଼୍‌ ବିଚାର ମାଡ଼ିତଣ୍ଡ୍‌, ଅନ୍‌ ସିଂହାସନ୍‌ ସାରେୱେଲେ କଟ ଆଦ୍‌ତେ । 15 ଡୁଡ୍‌ ନୁ ଦେଞ୍ଜ୍‌କାନାଦ୍‌ ଜ୍ଞାନ ଇଦ୍‌ତେ; ମାତର୍‌ ପିଲ୍‌ତିଙ୍କ୍‌ ତାନ୍‌ ଇଚ୍ଛାତେ ୱିଡ଼୍‌ସିତ୍‌ତ୍କେ, ଅଣ୍ଡ୍‌ ତାମ୍‌ ୟାୟଙ୍କ୍‌ ସିଗ୍‌ଇଦ୍‌ତେ । 16 ଦୁଷ୍ଟ ନାରୁଡ଼୍‌ ନାର୍ଗେ ଆତ୍‌ତଡ଼୍‌, କାରାପ୍‌ ପେର୍‌ସିତ୍‌; ମାତର୍‌ ଦାର୍ମିକିଡ଼୍‌ ଅଡ଼୍‌ ନଷ୍ଟ ଉଡ଼ିତଡ଼୍‌ । 17 ନିଜେତ୍‌ ମାରିଙ୍କ୍‌ ଦଣ୍ଡ୍‌ ଇତ୍କେ, ଅଣ୍ଡ୍‌ ନିକିଙ୍କ୍‌ ଶାନ୍ତି ଇଦ୍‌ତଣ୍ଡ୍‌; ମେଣ୍ଡେ, ଅଣ୍ଡ୍‌ ନି ଜିଉନ୍‌ତିଙ୍କ୍‌ ସୁକାମ୍‌ ଇଦ୍‌ତଣ୍ଡ୍‌ । 18 ବେନ୍‌ ପଡ଼୍‌ୟେତ୍‌ ନାରୁଡ଼୍‌ ଇଶ୍ୱର୍‌ତଡ଼୍‌ ଚାଲେମ୍‌ ଆସ ମାନ୍ତଡ଼୍‌ ଆଗେତ୍‌ ନାରୁଡ଼୍‌ ନଷ୍ଟ ଆଦ୍‌ତଡ଼୍‌; ମାତର୍‌ ବେନ୍‌ ନାରୁଣ୍ଡ୍‌ ନିୟମ୍‌ ପାଲନ୍‌ ମାଡ଼ିତଣ୍ଡ୍‌, ଅଡ଼୍‌ ଦନ୍ୟ । 19 ଦାସ ଗଟିନେ ବୁଜେମ୍‌ ଆୟଣ୍ଡ୍‌; ବେଲାକି ଅଣ୍ଡ୍‌ ବୁଜେମ୍‌ ଆତ୍‌କେ ବା ମନ୍‌ ଇୱଡ଼୍‌ । 20 ମିଡ଼୍‌ କି ଗଟିନେ ଦାନ୍ଦେଆଦାନ୍‌ ନାରୁଡ଼୍‌କିଙ୍କ୍‌ ଉଡ଼ୁତତିଡ଼୍‌ ? ଅନ୍‌ ବାଦୁଲ୍‌ତେ ମୁର୍କନ୍‌ ବିଷୟତେ ନାର୍ଗେ ଆଶେ ମିନ୍ଦେ । 21 ବେନ ପିଲେତ୍‌କଞ୍ଚ୍‌ ନିଜେତ୍‌ ଦାସଙ୍କ୍‌ ଜତନ୍‌ମାଡ଼ି ପଡ଼୍‌ପିତଣ୍ଡ୍‌, ମାରେଙ୍କ୍‌ତେ ଆ ଦାସ ଅନ୍‌ ମାର୍‌ ଆସ୍‌ ତେଦିତଣ୍ଡ୍‌ । 22 ଗାଟି କପାମ୍‌ତେ ନାରୁଣ୍ଡ୍‌ ରାମ୍କ୍‌ ନୁ ନାର୍ଗେ ପାପ୍‌କାମ୍‌ ଜନମ୍‌ ମାଡ଼ିତଣ୍ଡ୍‌ । 23 ନାରୁନାଦ୍‌ ଆଙ୍କାର୍‌ ଅକିଙ୍କ୍‌ ମଦଲ୍‌ ମାଡ଼ିତ୍‌; ମାତର୍‌ ବେନନ୍‌ ଆତ୍ମା ନମ୍ର, ଅଣ୍ଡ୍‌ ସନ୍‌ମାନ୍‌ ପାହେମ୍‌ ଆଦ୍‌ତଣ୍ଡ୍‌ । 24 ଡଙ୍ଗାନ୍‌ତଡ଼୍‌ କାଇଲ୍‌ତେନଣ୍ଡ୍‌ ନିଜେତ୍‌ ଜିଉନ୍‌ତିଙ୍କ୍‌ ପାସ୍କିତଣ୍ଡ୍‌, ଅଣ୍ଡ୍‌ ଶପତ୍‌ ମାଡ଼୍‌ତେ ଗଟି କେଞ୍ଜିତଣ୍ଡ୍‌, ଇତ୍କେ ଇଚୁର୍‌ ବାତେବା କେଲଣ୍ଡ୍‌ । 25 ନାରୁଡ଼୍‌କିଙ୍କ୍‌ ୱେର୍କ୍‌ ଉଡ଼୍‌ୟିନା; ମାତର୍‌ ସଦାପ୍ରବୁନାଗ୍‌ ବେନ୍‌ ଆଶେ ନେଃତିତଣ୍ଡ୍‌, ଅଣ୍ଡ୍‌ ରକ୍ଷା ଆଦ୍‌ତଣ୍ଡ୍‌ । 26 ନାର୍ଗେ ଶାସନ୍‌ମାଡ଼ ମାନ୍ଦାନଡ଼୍‌ ଦୟା ଇଚ୍ଛା ମାଡ଼ିତଡ଼୍‌; ମାତର୍‌ ନାରୁଡ଼ାଦ୍‌ ବିଚାର ସଦାପ୍ରବୁନାଗାଙ୍କ୍‌ ଆଦ୍‌ତେ । 27 କାରାପ୍‌ତେ ନାରୁଣ୍ଡ୍‌ ଦାର୍ମିକ୍‌ତିଙ୍କ୍‌ ପାସ୍କାନ୍‌ ବିଷୟ, ମେଣ୍ଡେ, ସତ୍‌ ଆର୍‌ଦେ ତାକାନଡ଼୍‌ ଦୁଷ୍ଟ ନାରୁଡ଼୍‌କିଙ୍କ୍‌ ପାସ୍କାନ୍‌ ବିଷୟ ଆଦ୍‌ତଡ଼୍‌ ।