1 ହୋ ନା ମାର୍‌, ନିମେ ନା ନିୟମ୍‌ ମାର୍ଙ୍ଗମା; ମାତର୍‌ ହୃଦୟତେ ନା ଗଟ୍‌ ସାରେ ମାନେମ୍‌ ଆଦିକାଡ଼୍‌ । 2 ବେଲାକି ଆଦ୍‌ ବାଦ୍‌କାନାଦ୍‌ ପିନା ଆଦ୍‌ତେ ନୁ ଜିଉନ୍‌ତେ ୱାଡ଼୍‌ସା ସଂକ୍ୟା ନୁ ଶାନ୍ତି ନାର୍ଗେଆଦ୍‌ତେ । 3 ଦୟା ନୁ ନିଜାମ୍‌ତେ ମିକିଙ୍କ୍‌ ୱିଡ଼୍‌ସ; ନିଜର ଗୁଡ଼ୁଙ୍ଗେତାଗ୍ ତଃମୁଟ୍‌ ନୁ ନିଜର ହୃଦୟ୍‌ତେ ପାଟେତାଗ୍‌ ଲେକି ନେଃମୁଟ୍‌ । 4 ଆଦ୍‌ ମାଡ଼୍‌କେ, ମିଡ଼୍‌ ପରମେଶ୍ୱର୍‌ତେ ନୁ ନାରୁଡ଼୍‌ କଣ୍ଢେତେ ଅନୁଗ୍ରହ ନୁ ଲେକେତ୍ ବିଚାର୍‌ ଲାବ୍‌ ମାଡ଼ିତିଡ଼୍‌ । 5 ମିଡ଼୍‌ ହୃଦୟତେ ସଦାପ୍ରବୁଙ୍କ୍‌ ବିଶ୍ୱାସ ମାଡ଼ାଟ୍‌ ନୁ ନିଜେତ୍‌ ବିଚାର୍‌ତାଗ୍‌ ଆଶେ ମାଡ଼୍‌ମାଟ୍‌ । 6 ନିଜର୍‌ତାଦ୍‌ ସାରେ ଆର୍‌ ଅକିଙ୍କ୍‌ ଏର୍କେ ମାଡ଼ାଟ୍‌; ଆସୁଙ୍ଗ୍‌ ଅଣ୍ଡ ମିଇ ସାରେ ଆର୍‌ ସିଦା ମାଡ଼ିତଣ୍ଡ୍‌ । 7 ମିଇ ନିଜର କଣ୍ଢେତେ ଜ୍ଞାନବାନ୍‌ ଆୟିମାଟ୍‌; ସଦାପ୍ରବୁଙ୍କ୍‌ ୱେର୍‌ମୁଟ୍‌ ନୁ କାରାପ୍‌କନ୍‌ ୱେରେ ଆୟିମୁଟ୍‌ । 8 ଆସୁଙ୍ଗ୍‌ ମିଇ ମେନ୍ଦୁଲ୍‌ ସୁସ୍ଥମାନ୍ତେ ନୁ ମିୟାୱୁ ବୁଲାନ୍ ମଜ୍ଜା ସାରେ ସାୟେ ଆଦ୍‌ତା । 9 ମିଇ ନିଜର ଦନ୍‌ତେ ନୁ ସାରେ ବେପାର୍‌ତେ ପ୍ରଥମ କାୟେ ସଦାପ୍ରବୁନ୍‌ ସେବା ମାଡ଼ାଟ୍‌ । 10 ଆସୁଙ୍କ୍‌ ମିଇ ବାକ୍‌ଡ଼େତାଗ୍‌ ନାର୍ଗେ ଦନ୍‌ତେ ନିଣ୍ଡିତ୍‌ ନୁ ମିଇ କୁଣ୍ଡେତେ ପୁଃନେ ଅଙ୍ଗୁର୍‌କାଲ୍‌ ମିଡ଼୍‌ୟିତ୍‌ । 11 ହୋ ନା ମାର୍‌, ସଦାପ୍ରବୁନ୍‌ ସାୟେତ୍‌ ବୁଦ୍ଦ୍‌ ବେକାର୍ ମାଡ଼୍‌ମାଟ୍‌ ନୁ ତାନ୍‌ ଶାସନ୍‌ତେ ଆୟିୱିମାଟ୍‌ । 12 ବାତେଙ୍କ୍‌ଇତ୍କେ ବେଲାନେ ବାବାଲ୍‌ ନିଜର ମାର୍‌ ମାରିଙ୍କ୍‌, ଆଲାନେ ସଦାପ୍ରବୁ ନିଜର୍‌ ମାରିଙ୍କ୍‌ ପ୍ରେମ ସାମାନ୍‌ତିଙ୍କ୍‌ ଶାସନ୍‌ ମାଡ଼ିତଣ୍ଡ୍‌ । 13 ବେନ୍‌ ନାରୁଣ୍ଡ୍‌ ଜ୍ଞାନ ପାହେମ୍‌ ଆଦ୍‌ତନ୍ ନୁ ବୁଦ୍ଦି ଲାବ୍ ମାଡ଼ିତଣ୍ଡ୍‌, ଅଣ୍ଡ୍‌ ଦନ୍ୟ । 14 ବେଲାକି ରୂପାତେ ବେପାର୍‌ତାଗାଙ୍କ୍‌ ଆଦ୍‌ ବେପାର୍‌ ସାୟେ, ମେଣ୍ଡେ ୱେଡ଼୍‌ତେ ସୁନାତାଗାଙ୍କ୍‌ ତାନାଦ୍‌ ଲାବ୍ ଦିବେଣ୍ଡ୍‌ । 15 ଆଦ୍‌ ନାର୍ଗେଦାମିନ୍‌ କାଲ୍‌ ତାଗାଙ୍କ୍‌ ବା ନାର୍ଗେଦାମ୍‌, ମେଣ୍ଡେ ମିଇ ବେନ୍‌ଆୟି ପସନ୍ଦ୍‌ତେ ସାମାନ୍ ତାନ୍‌ତଡ଼୍‌ ସାମାନ୍‌ ଆୟ୍‌ । 16 ତାନ୍‌ ତିନ୍‌କାଇଦେ ନାର୍ଗେ ଦିନ୍ ବାଦ୍‌କାନାଦ୍‌, ତାନ୍‌ ଡ଼େବ୍‌ କାଇଦେ ଦନ ନୁ ସମ୍ମାନ୍‌ ମାନ୍‌ତେ । 17 ତାନ୍‌ ଆର୍‌ ସାରେ ସୁକାମ୍‌ତାୱୁ ନୁ ତାନ୍‌ ସାରେ ଆର୍ ଶାନ୍ତିତାଉ । 18 ବେନଡ଼୍‌ ଅନାଗ୍‌ ରମିତଡ଼୍‌, ଅଡ଼୍‌ ପର ଅଣ୍ଡ ଜିଉମାନ୍ଦାନ୍‌ ମାଡ଼େ ଲେକାମ୍‌; ବେନ୍‌ ନାରୁଡ଼୍‌ ଆଦ୍‌ ପୟିସ୍‌ ନେଃତିତଣ୍ଡ, ଅଣ୍ଡ ଦନ୍ୟ । 19 ସଦାପ୍ରବୁ ଜ୍ଞାନତେ ପୃତିବି ତିଆର ମାଡ଼୍‌ତଣ୍ଡ, ଅଣ୍ଡ ବୁଦ୍ଦ୍‌ତେ ମାବ୍‌ମୟଲ୍‌ ତିଆର୍‌ ମାଡ଼୍‌ତଣ୍ଡ୍‌ । 20 ଅନ୍‌ ଆଜ୍ଞାତେ କୁଇଙ୍ଗ୍‌ ପଡ଼ିୟେତାଗ୍‌ ଏର୍‌ ନିଣ୍ଡି ମାଡ଼ିୟିତେ, ମେଣ୍ଡେ, ମୟଲକନ୍‌ ମାସ୍‌ଏର୍‌ ସଡ୍‌ ସଡ୍‌ ରାଲିତ୍‌ । 21 ହୋ ନା ମାର୍‌, ଇ ସାରେ ମିଇ କଣ୍ଡେତ୍‌କନ୍‌ ଆନ୍‌ମାକି, ମିଡ଼୍‌ ଆଗେତ୍‌ ଜ୍ଞାନ୍‌ ନୁ ମାନ୍‌ଦେ ଏର୍କେତିଙ୍କ୍‌ ରକ୍ଷା ମାଡ଼ାଟ୍‌ । 22 ଆଦ୍‌ ମିଇ ଜିୱୁତେ ନୁ ଗୁଡ଼ୁଙ୍ଗେତାଗ୍‌ କେର୍‌ଦାନାଦ୍‌ ଆର୍‌ ଆଦ୍‌ତେ । 23 ଆସୁଙ୍କ୍‌ ମିଡ଼୍‌ ନିଜର ଆର୍‌ଦେ ୱେର୍‌ୱେକନ୍‌ ତାକିତିଡ଼୍‌, ମେଣ୍ଡେ, ମିଇ ଡ଼େକେ ତାଲ୍‌ଗ । 24 ଉଞ୍ଜାନ୍‌ ସମୟତେ ମିଇ ୱେର୍‌ମାଟ୍‌, ହଁ, ମିଡ଼୍‌ ଉଞ୍ଜିତିଡ଼୍‌ ନୁ ମିଡ଼୍‌ ଉସ୍କାଡ଼୍‌ତେ ସୁକ୍‌ ଆଦ୍‌ତିଡ଼୍‌ । 25 ହଟାତ୍‌ ପେୟିତେ ୱେର୍‌ଦିଙ୍କ୍‌ କିଅବା ଦୁଷ୍ଟଡ଼୍‌ ମାଡ଼ାନ୍‌ ନଷ୍ଟତିଙ୍କ୍‌ ୱେର୍‌ମାଟ୍‌ । 26 ବେଲାକି ସଦାପ୍ରବୁ ମିଇ ଆତ୍ମାବିଶ୍ୱାସ୍‌ ବୂମ୍‌ ଆଦ୍‌ତଣ୍ଡ୍‌, ଅଣ୍ଡ ମିଇ ଡ଼େକେତ୍‌ ଉଡ଼୍‌ୟିକନ୍‌ ରକ୍ଷା ମାଡ଼ିତଣ୍ଡ୍‌ । 27 ସାହାଯ୍ୟ ମାଡ଼ାନଙ୍କ୍‌ ପାର୍ତିସଡ଼୍‌ ମିଇ କାଇଦେ ମାତ୍କେ, ସାୟେତ୍‌ ଦାନଗିନେଙ୍କ୍‌ ମନାମାଡ଼୍‌ମାଟ୍‌ । 28 ନିଜର ଗାରେ ସାମାନ୍‌ ମାତ୍‌ତେ, ଆନୁଟ୍‌, ମେଣ୍ଡନ୍‌ଦାମ୍‌ ୱାଡ଼ାଟ୍‌, ମାମେ ନାଡ଼୍‌ ଇଦ୍‌ତମ୍‌' ଇଦ୍‌ ମି ଗାରେତଡ଼୍‌କ୍‌ କେଲ୍‌ମାଟ୍‌ । 29 ମିଇ ଗାରେତଡ଼୍‌କ୍‌ ମିଇ ଗାରେ ୱେର୍‌ୱକନ୍‌ ମାନ୍‌ନାଙ୍କ୍‌ ଅନ୍‌ ବିରୁଦ୍ଦତେ କାରାପ୍‌ ଚିନ୍ତେ ମାଡ଼୍‌ମାଟ୍‌ । 30 ନାରୁଣ୍ଡ୍‌ ମି କ୍ଷତି ମାଡ଼କଟ ମାତ୍କେ, ଆଙ୍ଗ୍‌ଡ଼ାମ୍‌ତେ ଅନ୍‌ତଡ଼୍ ବିରୁଦ୍ ମାଡ଼୍‌ମାଟ୍‌ । 31 ରାମ୍‌କିନ୍ ନାରୁନ୍‌ ପର କପାମ୍‌ ଆୟିମାଟ୍‌, ମେଣ୍ଡେ ଆଦ୍‌ ବେନ୍‌ଆୟି ଆର୍‌ ଏଞ୍ଚ୍‌ମାଟ୍‌ । 32 ବାତେଙ୍କ୍‌ଇତ୍କେ କପାମ୍‌ ନାରୁଡ଼୍‌କିଙ୍କ୍‌ ସଦାପ୍ରବୁ ପାସ୍କିତଣ୍ଡ୍‌; ମାତର୍‌ ସାୟେତ୍ ନାରିଡ଼୍‌ତଡ଼୍‌ ଗଟି ତିର୍‌ୟ୍‌ତଣ୍ଡ୍‌ । 33 ପାପିଡ଼୍‌ ଲତ୍‌ତାଗ୍‌ ସଦାପ୍ରବୁନ୍‌ ଅବିଶାପ୍‌ ମାନ୍‌ତେ, ମାତର୍‌ ଅଣ୍ଡ ଦାର୍ମିକ୍‌ ନାରୁଡ଼୍‌ ମାନ୍ଦାନାଗ୍‌ ଆଶିର୍ବାଦ୍‌ ମାଡ଼ିତଣ୍ଡ୍‌ । 34 ଅଣ୍ଡ ନିନ୍ଦେମାଡ଼ାନଡ଼୍‌କ୍‌ ନିନ୍ଦେ ମାଡ଼ିତଣ୍ଡ୍‌, ଆଗେକ୍‌ବା ଅଣ୍ଡ ନମ୍ର ନାରୁଡ଼୍‌କିଙ୍କ୍‌ ଅନୁଗ୍ରହ ଇଦ୍‌ତଣ୍ଡ୍‌ । 35 ଜ୍ଞାନ୍‌ତଡ଼୍‌ ନାରୁଡ଼୍‌ ବିଶ୍ୱାସ୍‌ତେ ଅଦିକାରିଡ଼୍‌ ଆଦ୍‌ତଡ଼୍‌, ମାତର୍‌ ବୁଦ୍ଦ୍ ଇଲ୍‌ୱେନଡ଼୍‌ ସିଗ୍‌ ଆଦ୍‌ତଡ଼୍‌ ।