1 ମଦଲ୍ ଲେକ୍‌ତେ ସାୟେତ୍‌ ଶିକ୍ଷା ସାରେ କେ ଶଲୋମନ୍‌ ଲେକ୍‌ତାଦ୍‌ ନୁ ଯିହୁଦାତେ ରାଜାଲ୍‌ ହିଷକୀୟତେ ଅଦିକାରିଡ଼୍‌ ଆଦ୍‌ ଉଡ଼ି ଲେକି ମାତ୍‌ତଡ଼୍‌ । 2 ବିଷୟକିଙ୍କ୍‌ ମିଞ୍ଜ୍‌ସ୍ପାନ୍‌ ପରମେଶ୍ୱର୍‌ତେ ଗୌରବ୍‌; ମାତର୍‌ ବିଷୟତେ ମେଃକାନ୍‌ ରାଜାନାଦ୍‌ ଗୌରବ୍‌ ଆଦ୍‌ତେ । 3 ଡେଙ୍ଗ୍‌ଦେ ମାଇଦିଙ୍କ୍‌ ସ୍ୱର୍ଗ ନୁ କୁୟିଙ୍ଗ୍‌ଦେ ମାଇଦିଙ୍କ୍‌ ପୃତିବି, ଆଦ୍‌ଲେକାମ୍‌ ରାଜାନ୍‌ ହୃଦୟ ବୁଜେମ୍‌ ଆଦାଙ୍କ୍‌ କଷ୍ଟ । 4 ରୁପାକନ୍‌ କାକ୍ରେ ଟେଣ୍ଡାଟ୍‌, ଆସୁଙ୍କ୍‌ ସୁନାରିତେ ମାଇଦିଙ୍କ୍‌ ଅଣ୍ଡୟ୍‌ ବେବାର୍‌ ଆଦାନ୍‌ ଗିନେ ଆଦ୍‌ତେ । 5 ରାଜାନ୍‌ ମୁନେକଞ୍ଚ୍‌ ଦୁଷ୍ଟଡ଼୍‌କ୍‌ ଜେକେ ମାଡ଼ିମୁଟ୍‌, ମେଣ୍ଡେ, ଅନ୍‌ ସିଂହାସନ୍‌ ଦର୍ମତେ କଟ ଆଦ୍‌ତେ । 6 ରାଜାନ୍‌ ମୁନେ ନିଜ୍‌ତିଙ୍କ୍‌ ବେଡ଼ିୟନ୍‌ ଇଞ୍ଜ ଏର୍କେ ମାଡ଼୍‌ମାଟ୍‌, ମେଣ୍ଡେ, ବାଡ଼୍‌ୟେ ନାରୁଡ଼୍‌ ପଡ଼ିୟେତ୍‌ତାଗ୍‌ ନିଲ୍‌ମାଟ୍‌ । 7 ବାତେଙ୍କ୍‌ଇତ୍କେ ବେନ୍‌ ସନ୍‌ମାନ୍‌ ମାନ୍ଦାନ୍‌ ନାରୁଣ୍ଡ୍‌ ନି କଣ୍ଡା ଉଡ଼ିମିନ୍ଦେଣ୍ଡ୍‌, ଅନ୍‌ ମୁନେ ନିୟାୱୁ କଣ୍ଡା ମଦଲ୍‌ ମାଡ଼ାନ୍‌ ବାଦୁଲ୍‌ତେ ନୁ "ଇଗେ ୱାଡ଼୍‌" ଇଞ୍ଜ୍‌ ନିକିଙ୍କ୍‌ କେତାନାଦ୍‌ ସାୟେ । 8 ରାମ୍‌କ୍‌ ତାଗାଙ୍କ୍‌ ହଟାତ୍‌ ବାୟିଦେ ଆନ୍‌ମାଟ୍‌, ଆତ୍‌ତ୍କେ ରାମ୍‌କ୍‌ ତେର୍‌ତେପେର୍କେ ମି ଗାରେତଡ଼୍‌ ନିକିଙ୍କ୍‌ ସିଗ୍‌ ମାଡ଼୍‌ତେ ପେର୍‌କେ ନିମେ ବାତେ ମାଡ଼ିତିନ୍‌ ? 9 ନିଜେତ୍ ଗାରେତଡ଼୍‌ ତ ନିଜେତ୍‌ ରାମ୍‌କିଙ୍କ୍‌ କଟ ମାଡ଼େ, ମେଣ୍ଡେ, ୱେରେତନ୍‌ ମିଞ୍ଜ୍‌ତେ ଗଟିଙ୍କ୍‌ ବାୟିଦେ ପେସ୍ପମାଟ୍‌ । 10 ଇଲୁକ୍‌ କେଞ୍ଜାନଡ଼୍‌ ମିକିଙ୍କ୍‌ ଇନ୍‌ ମାଡ଼୍‌କେ, ମି ନିନ୍ଦେ ଗୁଞ୍ଚେମ୍‌ ଆୟ । 11 ଅଣ୍ଡୟ୍‌ ଲେକେତାଦ୍‌ କେସ୍‌ମାନ୍ଦାନ୍‌ ବାକ୍ୟ ନୁ ରୁପା ତାଲିତାଗ୍‌ ଚିତ୍ରନେ ସୁନାତେ ତିଆର୍‌ ଆତ୍‌ତେ ଲେକାମ୍‌ । 12 ସୁନା କେୱ୍‌ଦେମୁଦେ ନୁ ୱେଡ଼୍‌ତେ ସୁନା ନେଡ଼େମ୍‌ ବା ଆର୍‌ ବେଲାନେ, ମନ୍‌ଇସ୍‌ କେଞ୍ଜାନ୍‌ କେୱୁଦିଙ୍କ୍‌ ଜ୍ଞାନବାନ ଦେଞ୍ଜ୍‌କାନଣ୍ଡ୍‌ ଲେକାମ୍‌ । 13 ଫସଲ୍‌ ସମୟତେ ମାସ୍‌ଏର୍‌ଦେ ଶାଲ୍‌ ବେଲାନେ, ରତାନଡ଼୍‌ ପର ବିଶ୍ୱସ୍ତ ଦୂତ୍‌ ଆଲାନେ; ବାତେଇତ୍କେ ଅଣ୍ଡ୍‌ ନିଜର କର୍ତ୍ତାନଡ଼୍‌ ଜିଉନ୍‌ତିଙ୍କ୍‌ ଶାନ୍ତି ଇଦ୍‌ତେ । 14 ୱାର୍‌ସାମ୍‌ ଇଲ୍‌ୱେ ମୟଲ୍‌ ନୁ ଗାଲ୍‌ ବେଲାନେ, ନିଜର ଦାନଇଦାନ୍‌ ବିଷୟତେ ବଡ଼୍‌ପନ୍‌ ମାଡ଼ାନଣ୍ଡ୍‌ ଆଲାନେ । 15 ଢାଟାମ୍‌ତେ ଶାସନକର୍ତ୍ତାଙ୍କ୍‌ ସାୟେ ମାନା ମାଡ଼ାନଣ୍ଡ୍‌, ମେଣ୍ଡେ, ସାୟେତ୍ ବାକ୍ୟ ୱାଞ୍ଜେର୍‌ତିଙ୍କ୍‌ ସାୟେ ଲାଗିତ୍‌ । 16 ମିଡ଼୍‌ ବାତେ ତେନେ ଦର୍‌ସ୍କିମିନ୍ଦେଡ଼ି ? ମିକିଙ୍କ୍‌ ବେସର୍‌ ଦର୍‌କାର୍‌, ଆସରେ ତିନ୍‌ନୁଟ୍‌; ନାର୍ଗେ ତିତ୍‌କେ ମିଡ଼୍‌ ଆଦିଙ୍କ୍‌ ପଡ଼୍‌ସିତିଡ଼୍‌ । 17 ମି ଗାରେତଡ଼୍‌ ଲନ୍‌ ସେନେକ୍‌ ସେନେକ୍‌ ଆନ୍‌ମାଟ୍‌, ଇଲୁକ୍‌ ମିଇ କପାମ୍‌ ଆସ୍‌ ପାସ୍କିତଡ଼୍‌ । 18 ଗାରେତଡ଼୍‌ ବିରୁଦ୍ଦତେ ବେନ ମିଚ୍‌ ସାକ୍ଷି ଇଦ୍‌ତଣ୍ଡ୍‌, ଅଣ୍ଡ୍‌, ଯୁଦ୍ଦ୍‌ ମଟଲ୍‌, ସୁର୍‌ ନୁ କଲ୍‌ସ୍‌ତେ ସୁଜେ କାଡ଼୍‌ଇନା; 19 ବିପଦ୍‌ ସମୟତେ ବିଶ୍ୱାସ୍‌ ଉତାନ୍‌ ନାରୁନାଗେ ବିଶ୍ୱାସ, ଉର୍‌ଙ୍ଗ୍‌ତେ ପାଲ୍‌କ୍‌ ନୁ କୁଟ ଡ଼େକାନ୍‌ ଲେକାମ୍‌ । 20 ଶାଲ୍‌କାଲାତେ ସିଲେ ଟେଣ୍ଡି ଅଦାନାଦ୍‌ ନୁ ପୁଣ୍ଡ୍‌ଦେ ପର ପୁଲେରସ୍‌ କାଲ୍‌ପାନ୍‌ ନାରୁଣ୍ଡ୍‌ ବେଲାନେ, ଦୁଃକାମ୍‌ନଡ଼୍‌ ଗାରେ ପାଟେ ପାରାନ୍‌ ନାରୁଣ୍ଡ୍‌ ଲେକାମ୍‌ । 21 ମିଇ ଶତ୍ରୁ କାର୍‌ୱିଙ୍କ୍‌ ଆତ୍‌କେ, ଅଂକିଙ୍କ୍‌ କାଦି ତିମୁଟ୍‌; ମେଣ୍ଡେ, ଅଣ୍ଡ୍‌ ଏର୍‌ଉନ୍ଦେୱାତ୍କେ, ଅକିଙ୍କ୍‌ ଏର୍‌ ଉସ୍‌ପାଟ୍‌; 22 ଆସୁଙ୍କ୍‌ ମିଡ଼୍‌ ଅନ୍‌ ତାଲ୍‌ତାଗ୍‌ ନିଡ଼୍‌ତାନ୍‌ ତାଡ଼୍‌ମ୍‌ ୱାଟିତିଡ଼୍‌, ମେଣ୍ଡେ, ସଦାପ୍ରବୁ ମିକିଙ୍କ୍‌ ପୁରସ୍କାର୍‌ ଇଦ୍‌ତଣ୍ଡ୍‌ । 23 ବେଲାନେ ଉତ୍ତରପାକେତ୍‌ ଗାଲ୍‌ ୱାନେତିଙ୍କ୍‌ ତାତିତେ, ଆଲାନେ ପେର୍‌ଲେ ଗଟିନ୍‌ ୱାଞ୍ଜେର୍‌ କପାମ୍‌ତେ ଉଡ଼ାନାଦ୍‌ ପେୟିତିତ୍‌ । 24 ରାମ୍‌କ୍‌ମାଡ଼ାନ୍‌ ନାଟାଡ଼୍‌ତଡ଼୍‌ ଅଣ୍ଡୟ ଲନ୍‌ ମାନ୍ଦାନ୍‌ ବାଦୁଲ୍‌ତେ ମେଡ଼୍‌ଲତ୍‌ତେ ମୁଲେତାଗ୍‌ ମାନ୍ଦାନାଦ୍‌ ସାୟେ । 25 ଏର୍‌ଉନ୍ଦେୱାତ୍‌ତ୍କେ ଜିଉନ୍‌ତିଙ୍କ୍‌ ଆଲ୍‌ ମାନ୍ଦାନ୍‌ ଏର୍‌ ବେଲାନେ, ଜେକେତ୍‌ ଦେଶକନ୍‌ ସୁସମାଚାର୍‌ ଆଲାନେ । 26 କାଲାଙ୍କ୍‌ ଏର୍‌ ନୁ ମୃର୍କ୍‌ଏର୍‌ ପଙ୍ଗାନାଦ୍‌ ବେଲାନେ, ଦୁଷ୍ଟ ନାରୁନ୍‌ ମୁନେ ୱେର୍‌ଦାନ୍‌ ଦାର୍ମିକ୍‌ ନାରୁଣ୍ଡ୍‌ ଲେକାମ୍‌ । 27 ନାର୍ଗେ ତେନେ ତିନ୍ଦାନାଦ୍‌ ବେଲା ସାୟେ ଆୟ, ଆଲାନେ ନାରୁଡ଼୍‌ ନିଜେତ୍‌ ଗୌରବ୍‌ ମେଃକାନାଦ୍‌ ଗୌରବ୍‌ ଆୟ । 28 ବେନ ନିଜେତିଙ୍କ୍‌ ମାନା ମାଡ଼୍‌ଡ଼େ ପାର୍‌ୱଣ୍ଡ୍‌, ଅଣ୍ଡ୍‌ ଉର୍ଙ୍ଗିମାନ୍ଦାନ୍‌ ନଗର୍‌ତେ ନେଟେ ଲେକାମ୍‌ ।