1 ଦାଉଦ୍‌ତେ ମାର୍ ଇସ୍ରାଏଲ୍‌ତେ ରାଜାଲ୍‌ ଶଲୋମନ୍‌ତେ ସାୟେତ୍‌ ଶିକ୍ଷା; 2 ଜ୍ଞାନ ନୁ ସାୟେତ୍‌ ଶିକ୍ଷା ବୁଜେମ୍‌ ଆଦାଙ୍କ୍‌; ଜ୍ଞାନତେ ବାକ୍ୟ ଏର୍କେ ମାଡ଼ାନଙ୍କ୍‌; 3 ସାୟେତ୍‌ ବେବାର୍‌, ଦାର୍ମିକ୍‌ ନୁ ସାୟେତ୍‌ଏର୍କେ ନୁ ନ୍ୟାୟ ବିଷୟ୍‌ତେ ଶିକ୍ଷା ଗ୍ରହନ୍‌ ମାଡ଼ାନଙ୍କ୍‌; 4 ସାୟେତ୍‌ ନାରୁଡ଼୍‌କିଙ୍କ୍‌ ସତର୍କ ନୁ ଲେୟ୍‌ ନାରୁଡ଼୍‌କ୍‌ ଶିକ୍ଷା ନୁ ବୁଦ୍ଦ୍‌ ଇଦାନଙ୍କ୍‌; 5 ବେଦ୍‌ପୁଟୁଙ୍କ୍‌ ଜ୍ଞାନତେ ନାରୁଣ୍ଡ୍‌ ଆଦ୍‌ କେଞ୍ଜି ପଣ୍ଡିତେ ବଡ଼େମ୍‌ ଆଦ୍‌ତେ ନୁ ବୁଦ୍ଦିମାନ୍‌ ନାରୁଣ୍ଡ୍‌ ଇତ୍‌ତେ ଲେକାମ୍‌ତେ ପରାମର୍ଶ ପାହେମ୍‌ ଆଦ୍‌ତଣ୍ଡ୍‌; 6 ମେଣ୍ଡେ, ଅଣ୍ଡୟ ସାୟେତ୍‌ ଶିକ୍ଷା ଗଟି ନୁ ଅଣ୍ଡୟ୍‌ ୱେସଡ଼୍‌ତେ ଗଟି ନୁ ପଣ୍ଡିତଡ଼୍‌ ବାକ୍ୟ ନୁ ଅଡ଼ାଦ୍‌ ଡୁଟାଙ୍କ୍‌ତେ ବାକ୍ୟ ବୁଜେମ୍‌ ଆଦ୍‌ତଣ୍ଡ୍‌ ।

7 ସଦାପ୍ରବୁନ୍‌ ବିଷୟ୍‌କି ୱେର୍‌ ଜ୍ଞାନ୍‌ତେ ଆରାମ୍‌; ମାତର୍‌ ମଣ୍ଡି ନାରୁଡ଼୍‌ ଜ୍ଞାନ୍‌ ନୁ ଆଦେଶ୍‌ ଆସାମ୍‌ ଇଞ୍ଜ ଆଲ୍‌ସିତଡ଼୍‌ । 8 ହୋ ନା ମାର୍‌, ମି ବାବାନ୍‌ ଶିକ୍ଷାତିଙ୍କ୍‌ କେଞ୍ଜାଟ୍‌ ନୁ ମିଡ଼୍‌ ୟାୟନ୍‌ ଶିକ୍ଷା ୱିଡ଼୍‌ସ୍‌ମାଟ୍‌ । 9 ବେଲାନ୍‌ କି ଆଦ୍‌ ମିୟାଦ୍‌ ଅନୁଗ୍ରହତଡ଼୍‌ ସାରେଦାମ୍‌ ମାନ୍ଦାନଡ଼୍‌ ଆଦ୍‌ତଡ଼୍‌ ନୁ ଗୁଡ଼ୁଙ୍ଗେତ୍ ନେଡ଼େମ୍‌ ଲେକାମ୍‌ ଆଦ୍‌ତଡ଼୍‌ । 10 ହୋ ନା ମାର୍‌, ପାପିନଡ଼୍‌ ମିକିଙ୍କ୍‌ ପୁସ୍କା ମାଡ଼୍‌କେ, ମିଡ଼୍‌ ତିଆର୍‌ ଆୟିମାଟ୍‌ । 11 ଅଡ଼୍‌ ଯଦି କେତିତଡ଼୍‌, "ମାତଡ଼୍‌ ୱାଡ଼ାଟ୍‌, ମାମେ ଆୱୁକାନଙ୍କ୍‌ କେପ୍‌ତମ୍‌, ନିର୍ଦ୍ଦୋଷ୍‌ତଡ଼୍‌କିଙ୍କ୍‌ ଉପାୟ୍‌ତେ ପୟିତାନଙ୍କ୍‌ ମିଞ୍ଜି ମାନ୍ଦିକାଡ଼୍‌; 12 ପାତାଲ୍‌ତେ ନ୍ୟାୟ ମାମେ ଅଡ଼୍‌କିଙ୍କ୍‌ ଜିୱେତେ ନଷ୍ଟ ମାଡ଼ିକାଡ଼୍‌ ନୁ ଗୁଇନ୍ଦେତାଗ୍‌ ମିସ୍‌ତେ ନାରୁଡ଼୍‌ ଲେକାମ୍‌ ଅଡ଼୍‌କିଙ୍କ୍‌ ସାରେତଡ଼୍‌କିଙ୍କ୍‌ ନଷ୍ଟ ମାଡ଼ିକାଡ଼୍‌; 13 ଆସୁଙ୍କ୍‌ ମାନାଡ଼୍‌ ସାରେ ଲେକାମ୍‌ ନାର୍ଗେ ଦାମିନ୍‌ ଦନ୍‌ ପାହେମ୍‌ ଆଦିକାଡ଼୍‌, ଡଙ୍ଗ୍‌ତେ ସାମାକିନେ ନିଜେତ୍‌ ଲନ୍‌ ନିଃତିକାଡ଼୍‌, 14 ମିଡ଼୍‌ ମା ଲପେ କାଇଲ୍‌କେ; ମାନ୍‌ ସାରେତଡ଼୍‌ ବିଚାର୍ ଅଣ୍ଡୟ୍‌ ମୁନା ଆଦ୍‌ତେ;" 15 ହୋ ନା ମାର୍‌, ମିଡ଼୍‌ ଅଡ଼୍‌ ସେଙ୍ଗେ ଆଦ୍‌ ଆର୍‌ଦାଗ୍‌ ତାକ୍‌ମାଟ୍‌, ଅଡ଼୍‌ ଆର୍‌ଦାଗାଙ୍କ୍‌ ଡେକାଙ୍କ୍‌ ଅଟ୍‌କା ମାଡ଼ାଟ୍‌; 16 ବେଲାନ୍‌କି ଅଡ଼୍‌ ଡେକା ପାପ୍‌କାମ୍‌ ମାଡ଼ାନଙ୍କ୍‌ ମିରିତ୍‌ ନୁ ନେତୁର୍‌ ପଙ୍କ୍‌ସ୍ସାନଙ୍କ୍‌ ଯାପେ ମିରି ଆଦ୍‌ତେ । 17 ବେନେ ଆୟି ପିଟେତେ କଣ୍ଡେତ୍‌ ମୁନେ ୱାଲ୍‌ଲେ ଅଗାନାଦ୍‌ ନିଜାମ୍‌ ଆସାମ୍‌ ଆଦ୍‌ତେ । 18 ଅଡ଼୍‌ ନିଜେ ନିଜେ ଆୱୁକାନଙ୍କ୍‌ କୁଦିତଡ଼୍‌ ନୁ ନିଜେତ୍‌ ଜିଉତିଙ୍କ୍‌ ପୟିତାନଙ୍କ୍‌ ତଃନ୍ଦ୍‌କଟ୍‌ ମିଞ୍ଜି ମାନ୍ଦ୍‌ତଡ଼୍‌ । 19 ସାରେତଡ଼୍‌ ବୂମ୍‌ଆଶେତଡ଼୍‌ ଆଦାନାଦ୍‌ ଇଦ୍‌; ଆଦ୍‌ ଦନ୍‌ତେ ଅଦିକାରିଡ଼୍‌କ୍‌ ଜିୱେ ନଷ୍ଟ ମାଡ଼ିତେ ।

20 ଜ୍ଞାନ୍‌ ଆର୍‌ଦାଗ୍‌ ଗାଟିଲେଙ୍ଗ୍‌ଦେ କାର୍ଙ୍ଗିତ୍; ଆଦ୍‌ ଏରସ୍‌ ପଡ଼ିୟାକିନାଗ୍‌ ନିଜେତ୍‌ ଲେଙ୍ଗ୍‌ କେଞ୍ଜ୍‌ସ୍ପିତ୍‌; 21 ଅଣ୍ଡ୍‌ ନାରୁଡ଼୍‌ ଉସୁଲ୍‌ତାଗ୍‌ ଗୁଡ଼୍‌ତେ ପଡ଼ିୟେତାଗ୍‌ କାର୍ଙ୍ଗିତଣ୍ଡ୍‌; ନଗର୍‌ତେ ଦ୍ୱାରକିନାଗ୍‌ ନେଙ୍ଗାନ୍‌ ପଡ଼ିୟାନାଗ୍‌ ନୁ ନଗର୍‌କିନାଗ୍‌ ନିଜେତ୍‌ ବାକ୍ୟ ଲେଙ୍ଗ୍‌ମାଡ଼ି କେତିତ୍‌; 22 "ହୋ ମଣ୍ଡି ନାରୁଡ଼ି, ବେସ୍କ କାଲାମ୍‌ ମୁର୍କତିଙ୍କ୍‌ ପ୍ରେମ ମାଡ଼୍‌ତିଡ଼୍‌ ? ହୋ ନିନ୍ଦେମାଡ଼ାନଡ଼ି, ମେଣ୍ଡେ ବେସ୍କ କାଲାମ୍‌ ନିନ୍ଦେତେ ଶାନ୍ତି ମାନ୍ଦ୍‌ତିଡ଼୍‌ ? ହୋ ମୁର୍କନଡ଼ି ମେଣ୍ଡେ ବେସ୍କ୍‌କାଲାମ୍‌ ଜ୍ଞାନ୍‌ତିଙ୍କ୍‌ ପାସ୍କିତିଡ଼୍‌ ? 23 ନା କାମ୍‌ତାଗ୍‌ ମାନ୍‌ ମାଲ୍‌ପାଟ; ‌ଉଡ଼େ, ନାନେ ମି ପରୁ ନିଜେତ୍‌ ଆତ୍ମା ତଃସିଦ୍‌ତାନ୍‌, ନାନେ ନିଜେତ୍‌ ବାକ୍ୟସାରେ ମିକିଙ୍କ୍‌ କେଞ୍ଜ୍‌ସ୍ପିତାନ୍‌ । 24 ବେଲାନ୍‌କି ନାନେ କାର୍ଙ୍ଗିତାନ୍‌, ମେଣ୍ଡେ, ମିଡ଼୍‌ ମନା ମାଡ଼୍‌ତିଡ଼୍‌; ନାନେ କାଇ ଆତ୍‌ତାନ୍‌, ବେନ ମାନ୍‌ଇୱଡ଼୍‌ ଆତ୍‌ତଡ଼୍‌; 25 ମାତର୍‌ ମିଡ଼୍‌ ନାୟାଦ୍‌ ସାରେ ଶିକ୍ଷାତିଙ୍କ୍‌ ମାନ୍‌ଇୱିଡ଼୍‌ ଆତ୍‌ତିଡ଼୍‌, ମେଣ୍ଡେ ନାୟାଦ୍‌ ବେନେଆୟି ଆର୍‌ଦିଙ୍କ୍‌ ଉଡ଼୍‌ୱିଡ଼୍‌; 26 ଆଦିଙ୍କ୍‌ ନାନେ ମିକା ମିୟାଦ୍‌ ବିପଦ୍‌ ସମୟ୍‌ତେ କାଉଦ୍‌ତାନ୍‌, ମିୟାଦ୍‌ ୱେର୍‌ ଗାରେ ହେଉଦାନ୍‌ ସମୟ୍‌ତେ ନାନେ ପାସ୍କିତାନ୍‌ । 27 ବେସୁଙ୍କ୍‌ ଗାଟି ଗାଲ୍‌ଦୁମ୍‌ଡ଼ାମ୍‌ ଲେକାମ୍‌ ମିୟାଦ୍‌ ୱେର୍‌ ଗାରେ ହେଉଦ୍‌ତେ ନୁ ଉର୍‌ଗାଲ୍‌ ଲେକାମ୍‌ ମିୟାଦ୍‌ ବିପଦ୍‌ ୱାଦ୍‌ତେ; ବେସୁଙ୍କ୍‌ ତିପାଲ୍‌ ନୁ କଷ୍ଟ ମି ପରୁ ଗଟେମ୍‌ ଆଦ୍‌ତେ; 28 ଆସୁଙ୍କ୍‌ ଅଡ଼୍‌ ନାକିଙ୍କ୍‌ ଲେଙ୍ଗ୍‌ ୱାଟିତଡ଼୍‌, ମାତର୍‌ ନାନେ ଉତ୍ତର୍‌ ଇୱନ୍‌; ଅଡ଼୍‌ ଗାଟି ଯତନ୍‌ତେ ନାକିଙ୍କ୍ ମେଃକିତଡ଼୍, ମାତର୍ ନାକିଙ୍କ୍‌ ପାହେମ୍‌ ଆୟଡ଼୍‌ । 29 ବାତେଙ୍କ୍‌ଇତ୍କେ ଅଡ଼୍‌ ଶିକ୍ଷାତିଙ୍କ୍‌ ପାସ୍କ୍‌ତଡ଼୍‌ ନୁ ସଦାପ୍ରବୁନ୍‌ ବିଷୟ୍‌କି ୱେର୍‌ ହେଞ୍ଚ୍‌ସଡ଼୍‌ ଆତ୍‌ତଡ଼୍‌; 30 ଅଡ଼୍‌ ନାୟାଦ୍‌ ବେନ୍‌ଆୟି ଶିକ୍ଷା କେଞ୍ଜଡ଼୍‌ ନୁ ନାୟାଦ୍‌ ସାରେ ମାନ୍‌ତେ ଗଟ୍‌ତିଙ୍କ୍‌ କେଞ୍ଜଡ଼୍‌ । 31 ଆଦିଙ୍କ୍‌ ଅଡ଼୍‌ ନିଜେ ନିଜେ କାମ୍‌ତେ ସାରେକାୟା ପାହେମ୍‌ ଆଦ୍‌ତଡ଼୍‌ ନୁ ନିଜେ ନିଜେ କାରାପ୍ ବିଷୟ ସାରେ କାୟା ପାହେମ୍‌ ଆଦ୍‌ତଡ଼୍‌ । 32 ହଁ ମଣ୍ଡିନାରୁନଡ଼୍‌ ଆର୍‌ଆଦାନଡ଼୍‌ ଅଡ଼୍‌କିଙ୍କ୍‌ ନଷ୍ଟ ମାଡ଼ିତଡ଼୍‌ ନୁ ବୁଦ୍ଦ୍‌ ଇଲ୍‌ୱେନଡ଼୍‌ ଆତ୍ମାଶାନ୍ତିତେ ସାରେ ଅଡ଼୍‌କିଙ୍କ୍‌ ନଷ୍ଟ ମାଡ଼ିତଡ଼୍‌ । 33 ମାତର୍‌ ବେନ୍‌ ନାରୁଡ଼୍‌ ନା ଗଟି କେଞ୍ଜିତଡ଼୍‌, ଅଣ୍ଡ୍‌ ସିମ୍‌ସାମ୍‌ ଜାଗେତାଗ୍‌ ବାସେ ମାଡ଼ିତଣ୍ଡ୍‌ ନୁ କାରାପ୍‌ତେ ୱେର୍‌ଇଲ୍‌ୱେ ରମିତଣ୍ଡ୍‌ ।"