Provérbios 31

ଲମୁୟେଲ୍‌ ରାଜାନ୍‌ ଗଟି

1 ଲମୁୟେଲତେ ରାଜାନ୍‌ ଗଟି: ବା, ଅନ୍‌ ୟାୟ ଅଙ୍କ୍‌ ବାତେ ନାଡ଼୍‌ସ୍ପିମାତ୍‌ତେ, ଆଦ୍‌ ବଜ୍‌ । 2 ହୋ ନା ମାର୍‌, ହୋ ନା' ଡ଼ଙ୍କେତ୍‌ ମାର୍‌, ହୋ ନା' ମାନ୍ତ୍‌ତେ ତାଲ୍‌କିମାନ୍ଦାନ୍‌ ମାର୍‌, ନାନେ ନିକିଙ୍କ୍‌ ବାତେ କେତିତାନ୍‌ ? 3 ମିଡ଼୍‌ ନାଟାକିଙ୍କ୍‌ ନିଜେତ୍‌ ବପୁ ଇମାଟ୍‌, ବା ରାଜାଲଡ଼୍‌ ବେଗେ ନଷ୍ଟ ଆଦ୍‌ତଡ଼୍‌, ଆଦିନ୍‌ ପେର୍କେ ଆନ୍‌ମାଟ୍‌ । 4 ହୋ ଲମୁୟେଲ, ରାଜାନଡ଼୍‌ ଅଙ୍ଗୁର୍‌କାଲ୍‌ ଉନ୍ଦାନାଦ୍‌ ଟିକ୍‌ଆୟ, ରାଜାଲଡ଼୍‌ ସାୟେ ଆୟ; କି କାଲ୍‌ ବେକେ ଇଞ୍ଜ୍‌ କେତାନାଦ୍‌ ଶାସନ୍‌ ମାଡ଼ାନଡ଼୍‌ ସାୟେ ଆୟ । 5 ଅଡ଼୍‌ ଉତ୍‌କେ, ନିୟମ୍‌ ମାର୍‌ଙ୍ଗି ଦୁଃକାମ୍‌ତେ ନାରୁଡ଼୍‌ତେ ବିଚାର୍‌ ଉଲ୍‌ଟା ମାଡ଼ିତଡ଼୍‌ । 6 ଡଲାନ୍‌ଲେକେ ମାନ୍ଦାନ୍‌ ନାରୁଙ୍କ୍‌ କାଲ୍‌ ଇମୁଟ୍‌ ନୁ ମନ୍‌ଦାଗ୍ ବା ହୃଦୟ୍‌ତେ ଦୁଃକ ଆଲ୍‌ସମାନ୍ଦାନ୍ ନାରୁଡ଼୍‌କିଙ୍କ୍ ଅଙ୍ଗୁର୍‌କାଲ୍‌ ଇମୁଟ୍‌ । 7 ଅଣ୍ଡ୍‌ ନାରୁଡ଼୍‌ ତିଞ୍ଜ୍‌ ନିଜେତ୍‌ ଗରିବ୍‌ତିଙ୍କ୍‌ ମାର୍‌ଙ୍ଗିଣ୍ଡ୍‌ ନୁ ନିଜେତ୍‌ କଷ୍ଟ ନୁ ମେଣ୍ଡେ ମନ୍‌ଦାଗ୍ ମାଡ଼୍‌ମାକିଣ୍ଡ୍‌ । 8 କନ୍ଦା ନାରୁଡ଼୍‌ ପାକେ, ସାରେ ପଡ଼ମ୍‌ପିଲାନ୍‌ ପାକେ, ନିଜେତ୍‌ ପାୟୁର୍‌ ତେମୁଟ୍‌ । 9 ପାୟୁର୍‌ ତେଃସ୍‌ ସାୟେତ୍‌ ବିଚାର୍‌ ମାଡ଼ାଟ୍‌, ମେଣ୍ଡେ, ଦୁଃକାମ୍‌ ନୁ ଗରିବ୍‌ନଡ଼୍‌ ସାୟେତ୍‌ ବିଚାର ମାଡ଼ାଟ୍‌ ।

ସାରେ ଗୁନାମ୍‌ ବେବାର୍ ମାଡ଼ାନ୍‌ ନାଟାଡ଼୍‌

10 ସାୟେତ୍ ଗୁନାମ୍ ମାନ୍ଦାନ୍ ନାଟାଡ଼୍‌ ବେନ ଦର୍‌ସ୍କେ ପାର୍‌ତଣ୍ଡ୍‌ ? ଇରା କାଲ୍‌ବଦେ ତାଗାଙ୍କ୍‌ ହିଁ ଆଦିନ୍‌ ଦାମ୍‌ ଅଦିକ୍‌ । 11 ତାନ୍‌ ମୁଦ୍‌ପାନ୍‌ ହୃଦୟ ତାନାଗ୍‌ ଆଶେ ମାଡ଼ିତ୍‌, ମେଣ୍ଡେ, ଆଦିନ୍‌ ଲାବ୍‌ତେ ଅବାବ୍ ଆୟ । 12 ଆଦ୍‌ ଜିଉନ୍‌ ମାନ୍‌ନା ମୁଦ୍‌ପାଙ୍କ୍‌ ନଷ୍ଟ ମାଡ଼କଟ୍‌ ସାୟେ ମାଡ଼ିତ୍‌ । 13 ଆଦ୍‌ ମେଣ୍ଢେତ୍‌ କେଲେକ୍‌ ନୁ *31:13 ମସିନା ଇଞ୍ଜଗାଡ଼୍‌, ଆଦ୍‌ଗାଡ଼୍‌ତେ ପୁଙ୍ଗାର୍‌ ତାଗାଙ୍କ୍‌ ନିୟ୍‌ ନୁ ଆ ଗାଡ଼୍‌ତେ କାରାନେ କେତି,ଗୁଲା ହେତି ବାତ୍‌ବାତା ତିଆରେ ମାଡ଼ମାତ୍‌ତଡ଼୍‌, ଆଦ୍‌ ଗାଡ଼୍‌ତିଙ୍କ୍‌ ମସିନା ଇଞ୍ଜ କେତିତଡ଼୍‌ । ମସିନା ଗାଡ଼୍‌ ମେଃକି ୱେଡ଼୍‌କେତେ ନିଜର୍‌ କାଇଦେ ପାଡ଼ିୟ୍‌ ମାଡ଼ିତ୍‌ । 14 ଆଦ୍‌ ବେପାର୍ ମାଡ଼ାନ୍‌ ଜାହାଜ ଇନା; ଆଦ୍‌ ଜେକାଙ୍କ୍ ଜେକାଙ୍କ୍‌ ନିଜର କାଦିତାତିତ୍‌ । 15 ବା ଆଦ୍‌ ପାଲ୍‌ଆସ ତେଦିତ୍‌ ନୁ ନିଜର୍‌ ଲତ୍‌ତେନଡ଼୍‌ ସାରେତଡ଼୍‌ ମାଇଦିଙ୍କ୍‌ କାଦି ତିଆର ମାଡ଼ିତ୍‌ ନୁ ଦାସିକିଙ୍କ୍‌ ତିଆର୍ ମାଡ଼ାନଙ୍କ୍‌ ୱେରେୱେରେ ପାଡ଼ିୟ୍‌ ଇଦ୍‌ତଣ୍ଡ୍‌ । 16 ଆଦ୍‌ ୱାୟେତ୍‌ ବିଷୟ୍‌ ବୁଜେମ୍‌ ଆସ୍‌ ଆଦ୍‌ ଆସିତେ, ଆଦ୍‌ ନିଜର୍‌ କାଇଦେ କାୟେ ଇସ୍‌ ଦ୍ରାକ୍ଷାୱାୟେତାଗ୍‌ ଉର୍‌ସ୍କିତେ । 17 ଆଦ୍‌ ବପୁତେ ନିଜେତ୍‌ ଟିକିଡ଼୍‌ତାଗ୍‌ ତଃତିତ୍ ନୁ ନିଜର୍‌ କାଇଦିଙ୍କ୍‌ ବପୁମାଡ଼ିତ୍‌ । 18 ନିଜେତ୍‌ ବେପାର୍‌ ଯେ ବେଲାନ୍‌ ଲାବ୍‌ଆଦ୍‌ତେ, ଇଦ୍‌ ଆଦ୍‌ ବୁଜେମ୍‌ ଆଦ୍‌ତେ; ମେଣ୍ଡେ, ନାର୍କାସମୟତେ ତାନାଦ୍‌ ୱେସ୍‌ ପିୟ । 19 ଆଦ୍‌ ତାନ୍ କାଇଦେ ନୁଲ୍‌ଦିଙ୍କ୍‌ କୟିସ୍‌ ଆଦ୍‌ ନିଜେତ୍‌ ସେଙ୍ଗେ ସିଲେ ତିଆର୍‌ ମାଡ଼ିତ୍‌ । 20 ଆଦ୍‌ ଦୁଃକାମ୍‌ ନାରୁଡ଼୍‌ ପର ଉଞ୍ଜ୍‌ସ୍ପାନ୍‌ କାଇ ଆଦ୍‌ତେ ନୁ ଗରିବ୍‌ନଡ଼୍‌ ପର ନିଜର୍‌ କାଇ ଆତିତ୍‌ । 21 ଆଦ୍‌ ଇମେଏର୍ ମାଇଦିଙ୍କ୍‌ ନିଜେତ୍‌ ପରିବାର୍‌ ବିଷୟତେ ଚିନ୍ତେମାଡ଼; ବେଲାକି ତାନ୍‌ ସାରେ ପରିବାର୍‌, ସାଲ୍‌ପୟିୱେ ସିଲେ କେର୍‌ତଡ଼୍‌ । 22 ଆଦ୍‌ ନିଜର୍‌ ମାଇଦିଙ୍କ୍‌ ଚିତ୍ରାକାବିରି ମୁସାନ୍‌ ସିଲେ ତିଆର୍‌ ମାଡ଼ିତେ, ମେଣ୍ଡେ, ଆଦ୍‌ ୱେଡ଼୍‌ତେ ପାଣ୍ଡ୍ରିସିଲେ ସିଲ୍‌କସିଲେ ନୁ ଆପେ ରଙ୍ଗ୍‌ଦେ ସିଲେ କେର୍‌ଦ୍‌ତେ । 23 ତାନ୍‌ ମୁଦ୍‌ପାଲ୍‌ ଦେଶ୍‌ତେ ବାଡ଼ିୟଡ଼୍‌ତଡ଼୍‌ ନଗର୍‌ତେ ଉସୁଲ୍‌ଦାଗ୍‌ କୁଦାନ୍‌ ୱେଲେ ଏଞ୍ଚିତେ । 24 ଆଦ୍‌ ପାଲ୍‌ସେସିଲେ ତିଆର୍‌ମାଡ଼ି ୱାମିତେ, ମେଣ୍ଡେ, ବେପାରିଡ଼୍‌ କାଇଦେ ପାଡ଼୍‌ତାଗ୍ ତଃତାନ୍ ନଡ଼ମ୍ ୱାମିତ୍‌ । 25 ବପୁ ନୁ ସନ୍‌ମାନ୍‌ ତାନାଦ୍‌ ସିଲେ ଲେକାମ୍‌; ମେଣ୍ଡେ, ମୁନେତ୍ କାଲାକିନ୍ ବିଷୟତେ ଆଦ୍‌ ୱେର୍‌ୱ ଆଦ୍‌ତେ । 26 ଆଦ୍‌ ଜ୍ଞାନ୍‌ତେ ନିଜେତ୍‌ ପାୟୁର୍‌ ତେତିତ୍‌; ଆଦିନ୍‌ ୱାଞ୍ଜେର୍‌ତାଗ୍‌ ଦୟା ନିୟମ୍‌ ମାନ୍ତେ । 27 ଆଦ୍‌ ନିଜେତ୍‌ ପରିବାର୍‌ ବେବାର୍‌ତାଗ୍‌ ମନ୍‌ ଇଦ୍‌ତେ, ମେଣ୍ଡେ, ଆଦ୍‌ କାମ୍‌ ମାଡ଼ି କେ କାଦିତିନ୍ତେ । 28 ତାନ୍‌ ପିଲାକି ତେଦି ତାକିଙ୍କ୍‌ ଦନ୍ୟ ଦନ୍ୟ ଇଞ୍ଜ କେତିତା ନୁ ତାନ୍‌ ମୁଦ୍‌ପାଲ୍‌ ମିକା ତାକିଙ୍କ୍‌ ଆଲେନେ ସାର୍ଦେ ମାଡ଼ି କେତିତଣ୍ଡ୍‌; 29 "ନାର୍ଗେ ଲେୟ୍‌ୱାନ୍‌ ଗୁନ୍‌ ତସ୍‌ମିନ୍ଦେ, ମାତର୍‌ ନିମେ ଆୱିନାଗାଙ୍କ୍‌ ନିମେ ଗାଟି ସୁନ୍ଦର୍ ।" 30 ତାନାଦ୍‌ ପାଣ୍ଡ୍ରି ମକମ୍ ନୁ ସାରେଗୁନାମ୍‌ ସୁନ୍ଦର୍ ତନ୍ଦାନାଦ୍‌ ବେକାର୍‌; ମାତର୍‌ ବେନ୍‌ ନାଟାଡ଼୍‌ ସଦାପ୍ରବୁଙ୍କ୍‌ ୱେର୍‌ଦିତ୍‌, ଆଦ୍‌ ସାର୍‌ଦେ ଆଦ୍‌ତେ । 31 ତାନ୍‌ କାଇଦେ ପୁରସ୍କାର୍‌ ଆଦିଙ୍କ୍‌ ଇମୁଟ୍‌, ମେଣ୍ଡେ, ତାନ୍‌ ନିଜର୍‌ ପାଡ଼ିୟ୍‌ ନଗର୍‌ତେ ଉସୁଲ୍‌ଦାଗ୍‌ ଆଦିଙ୍କ୍‌ ସାର୍‌ଦେ ମାଡ଼ିତଡ଼୍‌ ।