1 ବେସୱେଲେ ମିଡ଼୍‌ ଶାସନକର୍ତ୍ତାନ୍‌ତଡ଼୍‌ ତିନ୍ଦାନଙ୍କ୍‌ କୁଦିତଣ୍ଡ୍‌, ଆସୱେଲେ ମିଇ ମୁନେ ବେନ୍‌ ମିନ୍ଦେଣ୍ଡ୍‌, ଆଦ୍‌ ଯତ୍ନମୁନେ କେଲ୍‌ମୁଟ୍‌ । 2 ବେସୁଙ୍କ୍‌ ମିଡ଼୍‌ ଡର୍‌ଡଙ୍କେ ଆଦ୍‌ତିଡ଼୍‌, ମିଇ ନିଜର ଗୁଡ଼୍‌ଙ୍ଗେତାଗ୍‌ ଚୁର୍‌ ନିଜେ ନେମୁଟ୍‌ । 3 ଅନ୍‌ ମିଙ୍ଗ୍‌ତେ କାଦିତିଙ୍କ୍‌ ଲବ୍‌ ମାଡ଼୍‌ମାଟ୍‌; ବେଲାକି ଆଦ୍‌ ପାସ୍କ୍‌ତେ କାଦି । 4 ସାଉକାର୍‌ ଆଦାନ ମାଇଦିଙ୍କ୍‌ ନିଜେତିଙ୍କ୍‌ ତିପାଲ୍‌ ମାଡ଼୍‌ମାଟ୍‌; ମିଡ଼୍‌ ନିଜର ବୁଦ୍ଦ୍‌କନ୍‌ ଚାଲାକ୍‌ ଆୟିମାଟ୍‌ । 5 ବାତ୍‌ତେ ଇଲେ ଆଦ୍‌ ଉଡ଼ାନଙ୍କ୍‌ ମି କଣ୍ଡାନାଗ୍‌ ଉଡ଼ିତିଡ଼୍‌ ବେସୁଙ୍କ୍‌ ମିଡ଼୍‌ ଆଦିନ୍‌ ପାକେ ଉଡ଼ିତିଡ଼୍‌ ଆଦ୍‌ ମିଞ୍ଜିତ୍‌ । ବାତେଙ୍କ୍‌ଇତ୍କେ ଆଦ୍‌ ଗାଦ୍‌ପିଟେ ଇନା ତାନ୍‌ ରେକା ପେସ୍ପି ମାବ୍‌ତାକ୍‌ ପାର୍ସ ଆଦ୍‌ତେ । 6 ରାକାପ୍‌ ନଜର୍‌ତେ ଉଡ଼ାନ୍‌ ନାରୁଡ଼୍‌ତେ କାଦି ତିନ୍‌ମାଟ୍‌, ମେଣ୍ଡେ, ଅନ୍‌ ମିଙ୍ଗ୍‌ତେ କାଦିତିଙ୍କ୍‌ ଆସେ ମାଡ଼୍‌ମାଟ୍‌; 7 ବାତେଙ୍କ୍‌ଇତ୍କେ ଅଣ୍ଡ୍‌ ବେଲାନେ ମନତେ ନିଜେ କଲ୍‌ସିତଣ୍ଡ୍ , ଅଣ୍ଡ୍‌ ଆଲେନେ ଆଦ୍‌ତେ; ଅଣ୍ଡ୍‌ ତିଞ୍ଜ୍‌ ଉଞ୍ଜ୍‌ ଇଞ୍ଜ୍‌ ମିକିଙ୍କ୍‌ କେତିତଣ୍ଡ୍‌ ସତ୍‌, ମାତର୍‌ ମିୟାଗାଙ୍କ୍ ଆଦ୍‌ ମନ୍‌ ଇଲେ । 8 ମିଡ଼୍‌ ବେନ୍‌ ଇଚୁର୍‌ ତିଞ୍ଜ୍‌ ମିନ୍ଦେଡ଼ି, ଆଦ୍‌ ପଡ଼୍‌ସିତଣ୍ଡ୍‌; ମେଣ୍ଡେ, ମିଇ ସାୟେତ୍‌ ବାକ୍ୟ ଆରାମାଡ଼ିତଣ୍ଡ୍‌ । 9 ମୁର୍କତେ କେୱୁଦେଗାରେ ଗଟି କେଲ୍‌ମାଟ୍‌, ବେଲାକି ଅଣ୍ଡ୍‌ ମିଇ ବାକ୍ୟତ୍‌ ପୁତ୍‌ତେ ବିଷୟ୍‌ ପାସ୍କିତଣ୍ଡ୍‌ । 10 ପାଃନ୍ତେ ସାନ୍ଦ୍‌ ଗୁଞ୍ଚା ମାଡ଼୍‌ମାଟ୍‌, ମେଣ୍ଡେ, ଆନିଦାଦିଡ଼୍‌ ଗାଡ଼୍‌ସ୍‌ତେ ୱାୟାନାଗ୍‌ ନେଙ୍ଗାନଙ୍କ୍‌ ଆନ୍‌ମାଟ୍‌ । 11 ବାତେଙ୍କ୍‌ଇତ୍କେ ଅଡ଼୍‌ ମୁକ୍ତିକର୍ତ୍ତାଲ୍‌ ଶକ୍ତିତଣ୍ଡ୍‌; ଅଣ୍ଡ୍‌ ମିଇତଡ଼୍‌ ଅଡ଼୍‌ ରାମ୍‌କିଙ୍କ୍‌ ମନାମାଡ଼ିତଣ୍ଡ୍‌ । 12 ସାୟେତ୍‌ ଶିକ୍ଷାତାଗ୍‌ ମିଇ ମନ୍‌ ଇମୁଟ୍‌ ନୁ ଜ୍ଞାନତେ ବାକ୍ୟତାଗ୍‌ ମିଇ କେୱୁ ଇମୁଟ୍‌ । 13 ପିଲାଙ୍କ୍‌ ଦଣ୍ଡ୍‌ ଇଦାନଙ୍କ୍‌ ବୁଲ୍‌ମାଡ଼୍‌ମାଟ୍‌; ମିଡ଼୍‌ ଅଙ୍କ୍‌ ଡ଼ୁଡ୍‌ତେ ରେଃତ୍‌କେ ବା; ଅଣ୍ଡ୍‌ ଡ଼ଲଣ୍ଡ୍‌ । 14 ମିଡ଼୍‌ ଆଦିଙ୍କ୍‌ ଡ଼ୁଡ଼୍‌ତେ ରେଃତିଡ଼୍‌ ନୁ ପାତାଲ୍‌କନ୍‌ ଅନ୍‌ ଜିଉନ୍‌ତିଙ୍କ୍‌ ରକ୍ଷା ମାଡ଼ିତଡ଼୍‌ । 15 ହୋ ନା ମାର୍‌, ନି ମନ୍‌ ଜ୍ଞାନ୍‌ ଆତ୍‌କେ, ନାୟାଦ୍‌, ନିଜାମ୍‌ତେ ନା ହୃଦୟ୍‌ ୱେଡ଼୍‌କେ ଆଦ୍‌ତେ । 16 ହଁ, ମିଇ ପାୟୁର୍‌ ନାର୍ଗେ ଗଟି କେତ୍‌କେ, ନା ହୃଦୟ୍‌ ୱେଡ଼୍‌କେ ଆଦ୍‌ତେ । 17 ମିଇ ମନ୍‌ ପାପିଡ଼୍‌କିଙ୍କ୍‌ କପାମ୍‌ ଆୟିମାଟ୍‌, ମେଣ୍ଡେ, ମିଡ଼୍‌ ସାରେ ଦିନ୍‌ ସଦାପ୍ରବୁନ୍‌ ପର ୱେର୍‌ଦେ ମାନୁଟ୍‌ । 18 ବାତେଙ୍କ୍ଇତ୍କେ ପୁରସ୍କାତେ ନିତାଲ୍‌ ମିନ୍ଦେ ନୁ ମିଇ ଆଶେ ୱେର୍‌ ଆୟ । 19 ହୋ ନା ମାର୍‌, କେଞ୍ଜେ, ଜ୍ଞାନି ଆୟିମ୍‌, ମେଣ୍ଡେ, ନି ହୃଦୟ୍‌ତିଙ୍କ୍‌ ସତ୍‌ଆର୍‌ଦା ଅୟ୍‌ମ୍‌ । 20 ଅଙ୍ଗୁର୍‌କାଲ୍‌ ଉନ୍ଦାନଡ଼୍‌ ନୁ ଡରାଲଡ଼୍‌ତଡ଼୍‌ ଆୱୁଙ୍ଗ୍‌ ତିନ୍ଦାନ୍‌ ବକ୍ତାଲଡ଼୍‌ତଡ଼୍‌ ଆନ୍‌ମାଟ୍‌ । 21 ବାତେଙ୍କ୍‌ଇତ୍କେ ମାତ୍‌ୱାରିଡ଼୍‌ ନୁ ଡରାଲଡ଼୍‌ ଗରିବ୍‌ ଆଦ୍‌ତଡ଼୍‌ ମେଣ୍ଡେ, କୁଡ଼୍‌କାନଣ୍ଡ୍‌ ନାରୁଡ଼୍‌ ଇଙ୍ଗ୍‌ତେ ଚକା କେର୍‌ତଡ଼୍‌ । 22 ମିଡ଼୍‌ ଜନମ୍‌ ମାଡ଼୍‌ତେ ବାବାନ୍‌ ଗଟି କେଞ୍ଜାଟ୍‌, ମେଣ୍ଡେ, ବେସୁଙ୍କ୍‌ ମି ୟାୟ୍‌ ମୁୟିକେ, ଆଦିକିଙ୍କ୍‌ ପାସ୍କ୍‌ମାଟ୍‌ । 23 ସତ୍‌ତାଦ୍‌ ଆସାଟ୍‌, ମେଣ୍ଡେ, ଆଦିଙ୍କ୍‌ ୱାମ୍‌ମାଟ୍‌; ଜ୍ଞାନ, ଶିକ୍ଷା ନୁ ଏର୍କେ ଆସାଟ୍‌ । 24 ଦାର୍ମିକ୍‌ତେ ବାବାଲ୍‌ ଅଦିକ୍‌ ୱେଡ଼୍‌କେ ମାଡ଼ିତଣ୍ଡ୍‌, ମେଣ୍ଡେ, ଜ୍ଞାନିନ୍‌ ମାର୍‌ ଜନମ୍ ମାଡ଼୍‌ତେ ୟାୟ ଅନ୍‌ ମାଇଦିଙ୍କ୍‌ ୱେଡ଼୍‌କେ ଆଦ୍‌ତେ । 25 ମିଡ଼୍‌ ବାବାନ୍‌ ନୁ ମିଇ ୟାୟ ୱେଡ଼୍‌କେ ଆୟିଡ଼୍‌, ମିଡ଼୍‌ ଡଙ୍କେତ୍‌ ଆତ୍‌ତେ ୱେଡ଼୍‌କେ ମାଡ଼ାଟ୍‌ । 26 ହୋ ନା ମାର୍‌, ମିଇ ହୃଦୟ ନାକିଙ୍କ୍‌ ଇମ୍‌, ମେଣ୍ଡେ, ନିଇ କଣ୍ଢା ନା'ଆର୍‌ଦାଗ୍‌ ୱାସ୍‌ ୱେଡ଼୍‌କେ ଆୟି । 27 ବାତେଙ୍କ୍‌ଇତ୍କେ ଲାଞ୍ଜେନାଗ୍‌ ଗାଟି କୁଇଙ୍କ୍‌, ମେଣ୍ଡେ, ୱେର୍‌ ନାଟାଡ଼୍‌ ଦାଃରିଲ୍‌ ଇସୁର୍‌ କୁଇଙ୍କ୍‌ ଆଦ୍‌ତେ । 28 ମେଣ୍ଡେ ଅଣ୍ଡ୍‌ ଡଙ୍ଗାଲ୍‌ ଇନା କୁଦି ମାନ୍ତେ, ମେଣ୍ଡେ, ନାରୁନ୍‌ ଲପେ ବିଶ୍ୱାସ୍‌ ହୁଃତାନଡ଼୍‌ ସଂକ୍ୟା ପେର୍‌ସ୍ପିତ୍‌ । 29 ବେନନ୍‌ ଦୁଃକାମ୍ ? ଆୱିନ୍‌ ଜିଉତାଗ୍‌ ସୁକାମ୍‌ ଇଲେ ? ବେନନ୍‌ ରାମ୍‌କ୍‌ ? ୱେରେ ବିରୁଦ୍ଧ୍‌ତେ କେତା କେତି ? ବେନନ୍‌ ଚିଲ୍‌ଦ ମଲ୍‌ଦ ? ବେନନ୍‌ କଣ୍ଡା ନେତୁର୍‌ ଇନା ? 30 ବେନଡ଼୍‌ ଅଙ୍ଗୁର୍‌କାଲ୍‌ ଉନ୍ଦାନ୍‌ ସମୟତେ ନାର୍ଗେ ଜେଲ୍‌ କୁଦିମାନ୍ତଣ୍ଡ୍‌, ବେନଡ଼୍‌ କାଇଲ୍‌ତେ ସୁରାମ୍‌ ମେଃକିତଡ଼୍‌ । 31 ଅଡ଼୍‌ ଅଙ୍ଗୁର୍‌କାଲ୍‌ ଏର୍‌ରେ ଆତ୍କେ, ସଲେତାଗ୍‌ ମିଡ଼୍‌ୟିକେ ନୁ ସାୟେ ବଣ୍ଡ୍‌କେତାଗ୍‌ ଡିଗ୍‌କେ, ମିଡ଼୍‌ ଅକିଙ୍କ୍‌ ଉଡ଼୍‌ମାଟ୍‌ । 32 ତାନ୍‌ପେର୍କେ ଆଦ୍‌ ତାଡ଼୍‌ମ୍‌ ଇନା କାସିତେ ନୁ ୱିସାମ୍‌ ମାନ୍ଦାନ୍‌ ତାଡ଼ାମ୍‌ ଇନା ଦଂସ ମାଡ଼ିତ୍‌ । 33 ମିଇ କଣ୍ଢା ଇକେତ୍‌ ଆକେତ୍ ବିଷୟ୍‌ ଉଡ଼ିତ୍‌, ମିଇ ହୃଦୟ କାରାପ୍‌ ଗଟି କେତିତ୍‌ । 34 ମେଣ୍ଡେ, ମିଡ଼୍‌ ସମୁଦ୍ରତାଗ୍‌ ଉଞ୍ଜାନଡ଼୍‌ ବା ଜାହାଜତେ ମାସ୍ତୁଲପର୍‌ ଉଞ୍ଜାନନ୍‌ ନାରୁନ୍‌ ଲେକାମ୍‌ ଆଦ୍‌ତିଡ଼୍‌ । 35 ମିଡ଼୍‌ କେତିଡ଼୍‌, ଅଡ଼୍‌ ନାକିଙ୍କ୍‌ ରେଃକେ, ମାତର୍‌ ନାନ୍‌ ଚିହ୍ନେ ଆୟନ୍‌; ଅଡ଼୍‌ ନାକିଙ୍କ୍‌ ରେଃତିତଡ଼୍‌, ମାତର୍‌ ନାନ୍‌ ଇସୁର୍‌ ପୁନନ୍‌; ନାନ୍‌ ବେସୁଙ୍କ୍‌ ତେଦିତାନ୍‌ ? ମେଣ୍ଡନ୍‌ଦାମ୍‌ ନାନ୍‌ ଆଦ୍‌ ମେଃକିତାନ୍‌ ।