1 ବୁଦ୍‌ମାନ୍ଦାନ୍‌ ନାଟାଡ଼୍‌ ନିଜର ଲତ୍‌ତିଙ୍କ୍‌ ନିଜେ ପେଃକିତ୍‌; ମାତର୍‌ ବୁଦ୍ଦ୍‌ଇଲ୍‌ୱାଦ୍ ନିଜେତ୍‌ କାଇଦେ ଆଦ୍‌ ଉଃତିତ୍‌ । 2 ବେନ୍‌ ନିଜର ସାୟେତ୍‌ ବେବାର୍‌ ମାଡ଼ିତ୍‌, ଅଣ୍ଡ୍‌ ସଦାପ୍ରବୁଙ୍କ୍‌ ୱେର୍‌ଦ୍‌ତଣ୍ଡ୍‌; ମାତର୍‌ କାରାପ୍ ଆର୍‌ଦାଗ୍ ଆଦାନଡ଼୍‌ ଅଡ଼୍‌ ଅଙ୍କ୍ ପାସ୍କିତଡ଼୍‌ । 3 ଜ୍ଞାନ୍ ଇଲ୍‌ୱେନଣ୍ଡ୍ ମକମ୍‌ତାଗ୍‌ ଆଙ୍କାର୍‌ତେ ଟେଙ୍ଗେ ମାନ୍‌ନ୍ତେ; ମାତର୍‌ ଜ୍ଞାନମାନ୍ଦାନ୍‌ ନାରୁଡ଼୍‌ ପାୟୁର୍‌ତାଗାଙ୍କ୍‌ ଅଡ଼୍‌କିଙ୍କ୍‌ ରକ୍ଷା ମାଡ଼ିତଣ୍ଡ୍‌ । 4 ବେଗେ ଗଡ଼କ୍‌ ଇଲା ଆଗେ କାଦି ଇଲା; କନ୍ଦାନ୍‌ ଶକ୍ତିତଡ଼୍‌ ନାର୍ଗେ ଫସଲ୍‌ ଆଦ୍‌ତା । 5 ବିଶ୍ୱାସ୍‌ତେ ସାକ୍ଷି ମିଚ୍‌ କେଲ; ବାତେଙ୍କ୍‌ଇତ୍କେ ସତ୍‌ଇଲ୍‌ୱେ ସାକ୍ଷି ମିଚ୍‌ କେତିତ୍‌ । 6 ନିନ୍ଦେତଣ୍ଡ୍‌ ବୁଦ୍ଦ୍‌ ମେଃକ୍‌କେ ଦର୍‌କଣ୍ଡ୍‌; ମାତର୍‌ ବୁଦ୍ଦ୍‌ମାନ୍ଦାନନ୍‌ ମାଇଦିଙ୍କ୍‌ ଶିକ୍ଷା ସହଜ୍ । 7 ମୁର୍କନ୍‌ ଗାରେ ଆତ୍‌ତ୍କେ, ମିଡ଼୍‌ ଅନ୍‌ ଜ୍ଞାନ୍‌ତେ ମାନ୍ଦାନ୍‌ ମକମ୍‌ ଉଡ଼୍‌ୱିଡ଼୍‌ । 8 ଚାଲାକ୍‌ ନାରୁଡ଼୍‌ ବୁଦ୍ଦ୍‌ତଡ଼୍ ନିଜେତ୍ ଆର୍‌ଦିଙ୍କ୍ ତିଆର୍‌ମାଡ଼ିତଣ୍ଡ୍‌; ମାତର୍‌ ମୁର୍କ ବୁଦ୍ଦ୍‌ତେନଡ଼୍‌ ପାସ୍କିତଡ଼୍‌ । 9 ବୁଦ୍ଦ୍‌ଇଲ୍‌ୱେନଡ଼୍‌ ଦୋଷତିଙ୍କ୍‌ କାଉଦ୍‌ତଡ଼୍‌; ମାତର୍‌ ସାୟେତ୍‌ ନାରୁଡ଼ାଗ୍‌ ଆଶିର୍ବାଦ୍‌ ମାନ୍ତେ । 10 ହୃଦୟ୍‌ ନିଜେତ୍‌ କାୟିତ୍‌ତେ ବିଷୟ୍‌ ପୁନ୍ଦ୍‌ତେ; ମେଣ୍ଡେ, ପୁନ୍‌ୱେ ନାରୁଡ଼୍‌ ତାନ୍‌ ୱେଡ଼୍‌କେତ୍ ବିଷୟ୍‌ ଆୟ । 11 ଦୁଷ୍ଟନଡ଼୍‌ ଲନ୍‌ ଲିକିଆଦ୍‌ତେ; ମାତର୍‌ ସାୟେତ୍‌ ନାରୁଡ଼୍‌ ଗୁଡ଼ୁସେ ନିସ୍ ମାନ୍ତେ । 12 ନାରୁଡ଼୍‌ତେ କଣ୍ଢେତେ ବେନ୍‌ବେନ୍‌ ଆର୍‌ ତିନାଙ୍କ୍‌ ତନ୍ଦିତା; ମାତର୍‌ ଅନ୍‌ ଶେଷତେ ଡଲାନାଦ୍‌ ଆର୍‌ ମାନ୍ତେ । 13 କାୱୁଦାନ୍‌ ସମୟତେ ମିକା ମନ୍‌ଦୁଃକ ଆଦ୍‌ତେ; ମେଣ୍ଡେ, ୱେଡ଼୍‌କେ ତେର୍‌ତେ ପେର୍କେ ଦୁଃକାମ୍‌ ୱାଦ୍‌ତେ । 14 ହୃଦୟ୍‌ତେ କାରାପ୍ ଆର୍‌ତାଗ୍‌ ନିଜେତ୍‌ ବେବାର୍‌ତେ କାୟେତେ ନିଣ୍ଡିତ୍‌; ମେଣ୍ଡେ, ସାୟେ ନାରୁଡ଼୍‌ ନିଜେତାଗାଙ୍କ୍‌ ନିଣ୍ଡିଆଦ୍‌ତେ । 15 ବୁଦ୍ଦ୍‌ଇଲ୍‌ୱେ ନାରୁଡ଼୍‌ ସାରେ ଗଟି ବିଶ୍ୱାସ ମାଡ଼ିତଣ୍ଡ୍‌; ମାତର୍‌ ଚାଲାକ୍‌ ନାରୁଡ଼୍‌ ନିଜେତ୍‌ ସାରେ ଗଟିଙ୍କ୍‌ ସାୟେ ବୁଜେମ୍‌ ଆଦ୍‌ତଣ୍ଡ୍‌ । 16 ଜ୍ଞାନି ନାରୁଡ଼୍‌ ସତର୍କ ମାନ୍‌ତଣ୍ଡ୍‌ ନୁ କାରାପ୍‌ତିଙ୍କ୍‌ ୱିଡ଼୍‌ସିଦ୍‌ତଣ୍ଡ୍‌; ମାତର୍‌ ମୁର୍କ ନାରୁଣ୍ଡ୍‌ କପାମ୍‌ତାଗ୍ ଗାଡ୍‌ସ୍ ଆଦ୍‌ତଣ୍ଡ୍‌ । 17 ବେନ ହଟାତ୍‌ କପାମ୍‌ତଣ୍ଡ୍‌, ଅଣ୍ଡ୍‌ ବୁଦ୍ଦ୍‌ଇଲ୍‌ୱେନନ୍‌ ପାଡ଼୍‌ୟି ମାଡ଼ିତଣ୍ଡ୍‌; ମେଣ୍ଡେ, କାରାପ୍‌ ଚିନ୍ତେ ମାଡ଼ାନଡ଼୍‌ ବୁଦ୍ଦ୍‌ଇଲ୍‌ୱେ ନାରୁଡ଼୍‌ ପାସ୍କାନ୍ ନାରୁଣ୍ଡ୍‌ । 18 ଜାଗ୍ରତ୍ ଇଲ୍‌ୱେ ନାରୁଡ଼୍‌ ବୁଦ୍ଦ୍‌ଇଲ୍‌ୱେ ଅଦିକାର ପାହେମ୍‌ ଆଦ୍‌ତଣ୍ଡ୍‌; ମାତର୍‌ ଚାଲାକ୍‌ ନାରୁଡ଼୍‌ ଜ୍ଞାନଇନା ମୁକୁଟ୍‌ କେର୍‌ତଡ଼୍‌ । 19 କାରାପ୍‌ ନାରୁଡ଼୍‌ ସାୟେତ୍‌ ନାରୁଡ଼୍ ମୁନେ ନୁ ଦୁଷ୍ଟନଡ଼୍‌ ଦାର୍ମିକ୍‌ନଡ଼୍‌ ଦୁୱାର୍‌ତାଗ୍‌ ମଡ଼୍‌କିତଡ଼୍‌ । 20 ଗରିବ୍‌ ନିଜେତ୍‌ ଗାରେତଡ଼୍‌କିଙ୍କ୍‌ ପାସ୍କିତଡ଼୍‌; ମାତର୍‌ ଦନ୍‌ ମାନ୍ଦାନାଗ୍‌ ନାର୍ଗେ ପ୍ରେମ ସାଙ୍ଗଡ଼୍‌ ମାନ୍‌ତଡ଼୍‌ । 21 ବେନ୍‌ ନାରୁଡ଼୍‌ ଗାରେତ୍‌ତଡ଼୍‌ ପାସ୍କକିତଣ୍ଡ୍‌, ଅଣ୍ଡ୍‌ ପାପ ମାଡ଼ିତଣ୍ଡ୍‌; ମାତର୍‌ ବେନ୍‌ ନାରୁଡ଼୍‌ ଗରିବ୍‌ତିଙ୍କ୍‌ ଦୟା ମାଡ଼ିତଣ୍ଡ୍‌, ଅଣ୍ଡ୍‌ ଦନ୍ୟ । 22 କାରାପ୍‌ ଚିନ୍ତାମାଡ଼ାନଡ଼୍‌ ବାତେ ଦାନ୍ଦେ ଆୟଡ଼୍‌ ? ମାତର୍‌ ସାୟେ ଚିନ୍ତେ ମାଡ଼ାନଡ଼୍‌ ପର ଦୟା ନୁ ସତ୍‌ ଆଦ୍‌ତେ । 23 ସାରେ ତିପାଲ୍‌ ପାଡ଼ିଦାଗ୍‌ କାୟେ ମିନ୍ଦେ; ମେଣ୍ଡେ, ପାୟୁର୍‌ତେ ଗଟିକେତ୍‌କେ ମାତର୍‌ ଗରିବ୍‌ତାଗ୍‌ କେତିତଡ଼୍‌ । 24 ଜ୍ଞାନିଡ଼୍‌ ମୁକୁଟ୍‌ ଅଡ଼୍‌ ସମ୍ପତି ଆଦ୍‌ତେ; ମେଣ୍ଡେ, ମୁର୍କନଡ଼୍‌ ମାଇଦିଙ୍କ୍‌ ମାତର୍ ବୁଦ୍‌ଇଲ୍‌ୱାଦ୍‌ ମିନ୍ଦେ । 25 ସତ୍ ସାକ୍ଷି ୱେରେତଡ଼୍‌ ଜିୱୁନ୍‌ତିଙ୍କ୍‌ ରକ୍ଷା ମାଡ଼ିତେ; ମାତର୍‌ ମିଚ୍‌ କେତାନଡ଼୍‌କିଙ୍କ୍‌ ପାସ୍କିତଡ଼୍‌ । 26 ସଦାପ୍ରବୁ ବିଷୟତେ ୱେର୍‌ ଢାଟାମ୍‌ ବିଶ୍ୱାସ୍‌ବୁମ୍‌; ମେଣ୍ଡେ, ଅନ୍‌ ମାର୍କିଡ଼୍‌ ମାନ୍ଦାନ୍‌ ପଡ଼ିୟେ ଆଦ୍‌ତେ । 27 ଡଲାନ୍‌ ଉଡ଼ିୟ୍‌ଦାଗାଙ୍କ୍‌ ମାଲ୍‌ପାନ୍‌ ମାଇଦିଙ୍କ୍‌ ସଦାପ୍ରବୁ ବିଷୟକି ୱେର୍‌ ୱିଜେତେ ଇଲ୍‌କେ ଇନା । 28 ନାର୍ଗେ ନାରୁଡ଼୍‌ ଆତ୍କେ ରାଜାଙ୍କ୍‌ ସନ୍‌ମାନ୍‌ ଦର୍କିତ୍‌; ମେଣ୍ଡେ, ନାରୁଡ଼୍‌ ସଂକ୍ୟା କମ୍ ଆତ୍କେ ରାଜାନଡ଼୍‌ ନଷ୍ଟ ଆଦ୍‌ତଡ଼୍‌ । 29 ବେନ୍‌ କପାମ୍‌ ଆଦାନାଦ୍‌ ଜେୟି, ଅଣ୍ଡ୍‌ ବାଡ଼ିୟେ ବୁଦ୍ଦ୍‌ତେନଣ୍ଡ୍‌; ମେଣ୍ଡେ, ହଟାତ୍‌ କପାମ୍‌ ବୁଦ୍ଦ୍‌ଇଲ୍‌ୱେନଣ୍ଡ୍‌ ଇନା ଜାଣ୍ଡେ ତେତିତଣ୍ଡ୍‌ । 30 ସାୟେତ୍‌ ହୃଦୟ୍‌ତେ ମେନ୍ଦୁଲ୍‌ତେ ଜିୱୁନ୍‌ ଇନା; ମେଣ୍ଡେ, କପାମ୍‌ତେ ବୁଲେ ନଷ୍ଟ ଆଦାନ୍ ଲେକାମ୍‌ । 31 ବେନ୍‌ ନାରୁଣ୍ଡ୍‌ ଗରିବ୍‌ନଡ଼୍‌ ପର କାରାପ୍‌ ମାଡ଼ିତଣ୍ଡ୍‌, ଅଣ୍ଡ୍‌ ତାନ୍‌ ସୃଷ୍ଟିକର୍ତ୍ତାଙ୍କ୍‌ ନିନ୍ଦା ମାଡ଼ିତଣ୍ଡ୍‌; ମେଣ୍ଡେ, ବେନ୍‌ ଗରିବ୍ ନଡ଼କ୍‌ ଦୟା ମାଡ଼ିତଣ୍ଡ୍‌, ଅଣ୍ଡ୍‌ ଅକିଙ୍କ୍‌ ୱେଡ଼୍‌କେ ମାଡ଼ିତଣ୍ଡ୍‌ । 32 ଦୁଷ୍ଟ ନାରୁଡ଼୍‌ ନିଜେତ୍‌ କାରାପ୍‌ ପାଡ଼୍‌ୟିଦେ ନଷ୍ଟ ଆଦ୍‌ତେ, ମାତର୍‌ ଡଲାନ୍‌ ୱେଲେ ଦାର୍ମିକ୍‌ତେନଡ଼୍ ମାୟିଦିଙ୍କ୍‌ ପଡ଼ିୟେ ମାନ୍ତେ । 33 ଜ୍ଞାନ ବୁଦ୍ଦ୍‌ମାନ୍ଦାନ୍‌ତେ ହୃଦୟତାଗ୍‌ ମାନ୍‌ତେ; ମେଣ୍ଡେ, ମୁର୍କତେ ଲପେତ୍ କଞ୍ଜ୍ ପୁଞ୍ଜ୍‌ସ୍ପିତଣ୍ଡ୍‌ । 34 ଦାର୍ମିକ୍‌ତେ ରାଜ୍ୟତିଙ୍କ୍‌ ଉନ୍ନତି ଜନ୍ମମାଡ଼ିତ୍‌; ମାତର୍‌ ପାପ୍‌ ନାରୁଡ଼୍‌କିଙ୍କ୍‌ ଅପ୍‌ମାନ୍‌ ମାଡ଼ିତେ । 35 ବୁଦ୍ଦିମାନ୍‌ ଦାସଙ୍କ୍‌ ରାଜାଲ୍‌ ଦୟା ତଃତିତଣ୍ଡ୍‌; ମେଣ୍ଡେ, ବେନ୍‌ ସିଗ୍‌ ଜନ୍ମମାଡ଼ିତଣ୍ଡ୍‌, ଅନ୍‌ ପର ରାଜାଲ୍ କପାମ୍‌ ମାଡ଼ିତଣ୍ଡ୍‌ ।