1 ରାଜାନ୍‌ ହୃଦୟ ସଦାପ୍ରବୁନ୍‌ କାୟିଦେ ଏର୍‌ଇନା ମାନ୍‌ତେ; ଅଣ୍ଡ୍‌ ବେନ୍‌ ପାକେ ଇଚ୍ଛା, ଆ ପାକେ ଆଦ୍‌ ମାଲ୍‌ପିତଣ୍ଡ୍‌ । 2 ନାରୁନାଦ୍‌ ସାରେ ଆର୍‌ ନିଜର ଉଡ଼ାନାଦିନେ ଟିକ୍‌, ମାତର୍‌ ସଦାପ୍ରବୁ ହୃଦୟ ସାରେ କୟିଦ୍‌ତଣ୍ଡ୍‌ । 3 ବଲିଦାନ ବାଦୁଲ୍‌ ନ୍ୟାୟ ନୁ ସାୟେତ୍‌ ବିଚାର୍‌ ସଦାପ୍ରବୁନାଦ୍‌ ନାର୍ଗେ ସାୟେ ଆଦ୍‌ତେ । 4 ଦୁଷ୍ଟ ନାରୁଡ଼୍‌ କୁପି ଇନା ବେନ ଆଙ୍କାର୍‌ତେ ଉଡ଼ାନାଦ୍‌ ନୁ ବଡ଼୍‌ପନ୍‌ତେ ମନ୍‌, ଆଦ୍‌ ପାପ୍‌ ଲେକାମ୍‌ । 5 ଜତନ୍‌ ପାଡ଼୍‌ୟିଦେ ଚିନ୍ତେକଞ୍ଚ୍‌ ଲାବ୍‌ ଆଦ୍‌ତା ମାତର୍‌ ସାରେ ଦାନ୍ଦେତେ ପାଡ଼୍‌ୟିମାଡ଼ାନଡ଼୍‌ ବା ଅବାବ୍‌ତେ ପାକେ ଆଦ୍‌ତଡ଼୍‌ । 6 ମିଚ୍‌କେତାନଡ଼୍‌ ପାୟୁର୍‌ତଡ଼୍‌ ପାହେମ୍‌ ଆତ୍‌ତେ ଦନ ଇକେ ଆକେ ଆଦାନ୍‌ ଗୁମାମ୍‌ତେ ଲେକାମ୍‌, ବେନଡ଼୍‌ ଆଦ୍‌ ମେଃକିତଡ଼୍‌, ଅଡ଼୍‌ ଡଲାନାଦ୍‌ ମେଃକିତଡ଼୍‌ । 7 ଦୁଷ୍ଟଡ଼ାଦ୍‌ କାରାପ୍‌ ଅଡ଼୍‌କିଙ୍କ୍‌ ତୁଃସ୍‌ ଅଦ୍‌ତେ; ବେଲାକି ଅଡ଼୍‌ ସାୟେତ୍‌ ପାଡ଼ିୟ୍‌ ମାଡ଼ାନଙ୍କ୍‌ ମନା ମାଡ଼ିତଡ଼୍‌ । 8 କାରାପ୍‌ ପାଡ଼୍‌ୟିଦେନଡ଼୍‌ କାଉଡ଼୍‌ଆତ୍‌ତେ ନାରୁନ୍‌ ଆର୍‌ ୱାଙ୍କ; ମାତର୍‌ ପବିତ୍ର ନାରୁଡ଼ାଦ୍‌ ପାଡ଼୍‌ୟି ତିନାଙ୍କ୍‌ । 9 ରାମ୍‌କ୍‌ ମାଡ଼ାନ୍‌ ନାଟାଡ଼୍‌ତଡ଼୍‌ ବେଡ଼ିୟ୍‌ ଲନ୍‌ ମାନ୍ଦାନ୍‌ ବାଦୁଲ୍‌ତେ ମେଡ଼୍‌ଦେ ଅଣ୍ଡୟ୍‌ ମୁଲେତାଗେ ମାନ୍ଦାନାଦ୍‌ ସାୟେ । 10 ଦୁଷ୍ଟ ନାରୁନ୍‌ ମନ୍‌ ପିନ୍ଦ୍‌ୱାଦ୍‌ ଆଲ୍‌ସିତେ, ମେଣ୍ଡେ, ଅନ୍‌ କଣ୍ଢେତେ ଅନ୍‌ ଗାରେତଣ୍ଡ୍‌ ଇଚୁର୍‌ ବା ଦୟା ପାହେମ୍‌ ଆୟଣ୍ଡ୍‌ । 11 ଲିନ୍ଦେମାଡ଼ାନଙ୍କ୍‌ ଦଣ୍ଡ ଇତ୍କେ, ମୁର୍କ ନାରୁଣ୍ଡ୍‌ ବୁଦ୍ଦ୍‌ତେନଣ୍ଡ୍‌ ଆଦ୍‌ତଣ୍ଡ୍‌; ମେଣ୍ଡେ, ବୁଦ୍ଦ୍‌ମାନ୍ଦାନଙ୍କ୍‌ ଶିକ୍ଷା ଇତ୍କେ, ଅଣ୍ଡ ଜ୍ଞାନବାନ୍‌ ଆଦ୍‌ତଣ୍ଡ୍‌ । 12 ଦାର୍ମିକ୍‌ ନାରୁଣ୍ଡ୍‌ ଦୁଷ୍ଟଡ଼୍‌ ଲତ୍‌ତେ ବିଷୟ ବିଚାର୍‌ ମାଡ଼ିତଣ୍ଡ୍‌; ଆ ଦୁଷ୍ଟ ନାରୁଡ଼୍‌ ବେଲାନେ ନଷ୍ଟ ଆଦ୍‌ତଡ଼୍‌, ଇଦ୍‌ ସାୟେତ୍‌ ବିଚାର୍‌ ମାଡ଼ିତଣ୍ଡ୍‌। 13 ବେନ୍‌ ନାରୁଣ୍ଡ୍‌ ଗରିବ୍‌ନଡ଼୍‌ କାର୍ଙ୍ଗାନାଦ୍‌ କେଞ୍ଜଣ୍ଡ୍‌, ଅଣ୍ଡ୍‌ ଦୁଃକାମ୍‌ତେ ନିଜେ କାର୍‌ଙ୍ଗିତଣ୍ଡ୍‌, କିନ୍ତୁ ଉତ୍ତର ପାଏମ୍‌ ଆୟଣ୍ଡ୍‌ । 14 ମିଞ୍ଜ୍‌ପି ଦାନ ଇତ୍କେ କପାମ୍‌ କଟ ଆଦ୍‌ତେ, ମେଣ୍ଡେ, ପାଡ଼୍‌ତାଗେ ୱାଟ୍‌ତେ ଲାଞ୍ଚ୍‌ ନାର୍ଗେ କପାମ୍‌ କଟ ମାଡ଼ିତ୍‌ । 15 ନ୍ୟାୟତେ ବେବାର୍‌ ଦାର୍ମିକତେ ପର ୱେଡ଼୍‌କେତ୍‌ ବିଷୟ; ମାତର୍‌ ଆଦ୍‌ କାରାପ୍‌ ପାଡ଼୍‌ୟି ମାଡ଼ାନଡ଼୍‌ ପର ନଷ୍ଟ ଆଦାନ୍‌ ଲେକାମ୍‌ । 16 ବେନ ବୁଦ୍ଦ୍‌ତେ ଆର୍‌ ୱିଡ଼୍‌ସି ଉଡିତଣ୍ଡ୍‌, ଅଣ୍ଡ୍‌ ଆନାଲଡ଼୍‌ତଡ଼୍‌ ବାସେ ମାଡ଼ିତଣ୍ଡ୍‌ । 17 ବେନ୍‌ ନାରୁଣ୍ଡ୍‌ ସାର୍ଦେ ମାଡ଼ାନଙ୍କ୍‌ ଇଚ୍ଛା ମାଡ଼ିତଣ୍ଡ୍‌, ଅଣ୍ଡ୍‌ ଗରିବ୍‌ ଆଦ୍‌ତଣ୍ଡ୍‌; ମେଣ୍ଡେ, ବେନ ଅଙ୍ଗୁର୍‌କାଲ୍‌ ନୁ ନିୟ୍‌ଦିଙ୍କ୍‌ ବଲ୍‌ ପାହେମ୍‌ ଆଦ୍‌ତଣ୍ଡ୍‌, ଅଣ୍ଡ୍‌ ସାଉକାର୍‌ ଆୟଣ୍ଡ୍‌ । 18 ଦୁଷ୍ଟ ନାରୁଡ଼୍‌ ସାୟେ ନାରୁଡ଼୍‌ ପରୁ ବେନ୍‌ ଦୁଃକାମ୍‌ ତାତାନଙ୍କ୍‌ ଚେଷ୍ଟା ମାଡ଼ିତଡ଼୍‌ ଆଦ୍‌ ନିଜେତ୍‌ ପରୁ ତାତିତଡ଼୍‌ । 19 ରାମ୍‌କିନ୍‌ ନୁ କିଜ୍ରାମାଡ଼ାନ୍‌ ନାଟାଡ଼୍‌ତଡ଼୍‌ ମାନ୍ଦାନ୍‌ ବାଦୁଲ୍‌ତେ ଚିମ୍‌ଚାମ୍‌ ବୁମତାଗ୍‌ ମାନ୍ଦାନାଦ୍‌ ସାୟେ । 20 ଜ୍ଞାନ୍‌ମାନ୍ଦାନନ୍‌ ଲନ୍‌ ନାର୍ଗେଦାମିନ୍‌ ସମ୍ପତ୍ତି ନୁ ନିୟ୍‌ ମାନ୍‌ତେ; ମାତର୍‌ ମୁର୍କ ନାରୁଣ୍ଡ୍‌ ଆଦ୍‌ ନଷ୍ଟ ମାଡ଼ିତଣ୍ଡ୍‌ । 21 ବେନ୍‌ ନାରୁଣ୍ଡ୍‌ ଦାର୍ମିକତେ ନୁ ଦୟାତେ ପେର୍‌କେ ଆଦ୍‌ତଣ୍ଡ୍‌, ଅଣ୍ଡ୍‌ ଜିଉନ୍‌ ନୁ ଦାର୍ମିକ୍‌ତେ ନୁ ସମ୍ମାନ ପାହେମ୍‌ ଆଦ୍‌ତଣ୍ଡ୍‌ । 22 ଜ୍ଞାନି ନାରୁଣ୍ଡ୍‌ ଶକ୍ତିମାନ୍ଦାନନ୍‌ ନଗର୍‌ତାଗେ ତାରି ନେଙ୍ଗିତଣ୍ଡ୍‌, ମେଣ୍ଡେ, ଆଗେତ୍‌ ଶକ୍ତିମାନ୍ଦାନ୍‌ ବପୁତିଙ୍କ୍‌ ମଦଲ୍‌ ତାତିତଣ୍ଡ୍‌ । 23 ବେନ ନିଜର ପାୟୁର୍‌ ନୁ ୱାଞ୍ଜେର୍‌ତିଙ୍କ୍‌ ରକ୍ଷା ମାଡ଼ିତଣ୍ଡ, ଅଣ୍ଡ୍‌ କଷ୍ଟକଞ୍ଚ୍‌ ନିଜର ଜିଉନ୍‌ତିଙ୍କ୍‌ ରକ୍ଷା ମାଡ଼ିତଣ୍ଡ୍‌ । 24 ଆଙ୍କାର୍‌ ନୁ ବଡ଼୍‌ପନ୍‌ ନାରୁନାଦ୍‌ ନିନ୍ଦା ପେଦେର୍‌ ଏକାମ୍‌ ଆଦ୍‌ତେ, ଅଣ୍ଡ୍‌ ଆଙ୍କାର୍‌ତେ ନିଜର୍‌ ପାଡ଼୍‌ୟିଦିଙ୍କ୍‌ ଟିକ୍‌ ଇଞ୍ଜ କେତାନଣ୍ଡ୍‌ । 25 ମଣ୍ଡି ନିଜର୍‌ ଅବ୍‌ୟାସ୍‌ତିଙ୍କ୍‌ ଆଲ୍‌ସି ଆଲ୍‌ସି ଡଲିତଣ୍ଡ୍‌; ବାତେଙ୍କ୍‌ଇତ୍କେ ଅନ୍‌ କାଇ ପାଡ଼୍‌ୟି ମାଡ଼ାନଙ୍କ୍‌ ମନାମାଡ଼ିତଣ୍ଡ୍‌ । 26 ବେନ ବେନ ପେୟାଲ୍‌ପଡ଼୍‌ଗିନ୍‌ ଅଦିକ୍‌ ଆଶେ ମାଡ଼ିତଣ୍ଡ୍‌; ମାତର୍‌ ଦାର୍ମିକ ନାରୁଣ୍ଡ୍‌ ଦାନ ମାଡ଼ିତଣ୍ଡ୍‌, ଆଶେ ଆୟଣ୍ଡ୍‌ । 27 ଦୁଷ୍ଟଡ଼୍‌ ବଲିଦାନ ପାସ୍କାନ୍‌ ବିଷୟ୍‌, ମାତର୍‌ ଅଣ୍ଡ୍‌ କାରାପ୍‌ ମାଡ଼ି ତାତ୍କେ ଆଦ୍‌ ବେସର୍‌ ଅଦିକ୍‌ ପାସ୍କାନାଦ୍‌ ଆଦ୍‌ତେ । 28 ମିଚ୍‌ ସାକ୍ଷି ନଷ୍ଟ ଆଦ୍‌ତା; ମାତର୍‌ ବେନ୍‌ ନାରୁଣ୍ଡ୍‌ କେଞ୍ଜିତଣ୍ଡ୍‌, ଅଣ୍ଡ୍‌ ବିଶ୍ୱାସ୍‌ତେ ଗଟି କେତିତଣ୍ଡ୍‌ । 29 ଦୁଷ୍ଟ ନାରୁଣ୍ଡ୍‌ ନିଜର ମକମ୍‌ ଢ଼ାଟାଙ୍କ୍‌ ମାଡ଼ିତଣ୍ଡ୍‌, ମାତର୍‌ ସାୟେ ନାରୁଣ୍ଡ୍‌ ନିଜର ଆର୍‌ କଟ ମାଡ଼ିତଣ୍ଡ୍‌ । 30 ସଦାପ୍ରବୁନ୍‌ ବିରୁଦ୍ଦ୍‌ତେ ବାତେବା ଜ୍ଞାନ ବା ବୁଦ୍ଦ୍‌ ବା ଯଜନା କାମ୍‌ ଇୱ । 31 ଯୁଦ୍ଦ୍‌ ମଡ଼ାନ୍‌ ଦିନାତେ ମାଇଦିଙ୍କ୍‌ ଗୁରାକ୍‌ ତିଆର୍‌ ଆତ୍କେ; ମାତର୍‌ ଜିଡ଼ାନାଦ୍‌ ସଦାପ୍ରବୁନାଗାଙ୍କ୍‌ ଆଦ୍‌ତେ ।