Provérbios 18

1 ବେନ ନିଜେତିଙ୍କ୍‌ ୱେର୍‌ ଅର୍ତୁନାଗାଙ୍କ୍‌ ୱେର୍‌ ମାଡ଼ିତଣ୍ଡ, ଅଣ୍ଡ୍‌ ନିଜର୍‌ ଇଚ୍ଛା ପୁରାମାନାଙ୍କ୍‌ ନୁ ସାରେଲେକାତେ ଜ୍ଞାନ୍‌ ବିରୁଦ୍ଦତେ ରାମ୍‌କ୍‌ ମାଡ଼ିତଣ୍ଡ୍‌ । 2 ମୁର୍କ ନାରୁଡ଼୍‌ ବୁଦ୍ଦ୍‌ତେ ଶାନ୍ତି ପାଏମ୍‌ ଆୟଣ୍ଡ୍‌, ମାତର୍‌ ନିଜର୍‌ ମନତେ ଗଟି କେତାନଙ୍କ୍‌ ଶାନ୍ତି ପାଏମ୍‌ ଆଦ୍‌ତଣ୍ଡ୍‌ । 3 ଦୁଷ୍ଟ ୱାତ୍‌କେ ସିଗ୍‌ ୱାଦ୍‌ତେ, ମେଣ୍ଡେ, ଅପମାନ୍‌ତଡ଼୍‌ ନିନ୍ଦା ୱାଦ୍‌ତେ । 4 ନାରୁଡ଼୍‌ତେ ପାୟୁର୍‌ତେ ବାକ୍ୟ ଗୁଇନ୍ଦେତ୍‌ ଏର୍‌ ଇନା, ମେଣ୍ଡେ, ଜ୍ଞାନ ପେୟିତାନ୍‌ ପଡ଼ିୟେ ଏର୍‌ ପଙ୍ଗାନ୍‌ ଲେକାମ୍‌ । 5 ଦୁଷ୍ଟନଡ଼୍‌ ପାକେଆସ୍‌ କେତାନାଦ୍‌ ବା ବିଚାର୍‌ତାଗ୍‌ ଦାର୍ମିକ୍‌ନଡ଼୍‌ ପର ଅନ୍ୟାୟ୍‌ ମାଡ଼ାନାଦ୍‌ ସାୟେ ଆୟ । 6 ମୁର୍କନ୍‌ ପାୟୁର୍‌ ରାମ୍‌କ୍‌ ପେସ୍ପିତିତ୍‌, ମେଣ୍ଡେ, ଅନ୍‌ ପାୟୁର୍‌ ଦେବେତିନ୍ଦାନଙ୍କ୍‌ କାର୍‌ଙ୍ଗିତ୍‌ । 7 ମୁର୍କନ୍‌ ପାୟୁର୍‌ ଅନ୍‌ ନଷ୍ଟମାଡ଼ାନ୍‌ ଲେକାମ୍‌, ମେଣ୍ଡେ, ଅନ୍‌ ପାୟୁର୍‌ ନିଜର ଜିଉନ୍‌ ଉଡ଼୍‌ୟିଦେ ଲେକାମ୍‌ ଆଦ୍‌ତେ । 8 କେୱୁଦେ କେୱୁଦେ କେତାନ୍‌ ନାରୁଡ଼୍‌ତେ ବାକ୍ୟ ଡଲ୍‌ୱେ ଲେକାମ୍‌, ଅନ୍‌ ହୃଦୟ୍‌ତାଲାନ୍‌ ଆଦ୍‌ତେ । 9 ନିଜର୍‌ ପାଡ଼୍‌ୟିଦେ ବେନ୍‌ ମଣ୍ଡି, ଅଣ୍ଡ୍‌ ନଷ୍ଟମାଡ଼ାନନ୍‌ ଦାଦାଲ୍‌ । 10 ସଦାପ୍ରବୁନ୍‌ ପେଦେର୍‌ ଡ଼େଙ୍ଗ୍‌ ଦିମା; ଦାର୍ମିକ୍‌ ନାରୁଡ଼୍‌ ଆଗେ ମିରିରକ୍ଷା ପାହେମ୍‌ ଆଦ୍‌ତଣ୍ଡ୍‌ । 11 ଦନ୍‌ମାନ୍ଦାନନ୍‌ ଦନ ଅନ୍‌ ଢ଼ାଟାମ୍‌ ନଗର, ମେଣ୍ଡେ, ଅନ୍‌ ଆଲ୍‌ସାନାଦ୍‌ ଡ଼େଙ୍ଗ୍‌ ମାନ୍ଦାନ୍‌ ନେଟେଇନା ଆଦ୍‌ତେ । 12 ନଷ୍ଟତ୍‌ ମୁନେ ନାରୁଡ଼୍‌ତେ ମନ୍‌ ବଡ଼୍‌ପନ୍‌ ଆଦ୍‌ତେ, ମେଣ୍ଡେ, ନମ୍ରତା ଆତ୍କେ ସନ୍‌ମାନ୍‌ ୱାଦ୍‌ତେ । 13 ବେନ କେଞ୍ଜାନ୍‌ ମୁନେଙ୍କ୍‌ ଉତ୍ତର ଇଦ୍‌ତଣ୍ଡ୍‌, ଆଦ୍‌ ଅନ୍‌ ମାଇଦିଙ୍କ୍‌ ବୁଦ୍ଦ୍‌ଇଲ୍‌ୱାଦ୍‌ ନୁ ସିଗ୍‌ ଇଲ୍‌ୱାଦ୍‌ । 14 ନାରୁନ୍‌ତେ ଆତ୍ମା ଅନାଦ୍‌ ଦୁଃକାମ୍‌ ସାମ୍‌ଲା ମାଡ଼ିତଣ୍ଡ୍‌; ମାତର୍‌ ଉର୍‌ଙ୍ଗ୍‌ତେ ଆତ୍ମାତିଙ୍କ୍‌ ବେନ୍‌ ନେହ୍‌ତେ ପାର୍‌ଦ୍‌ତଣ୍ଡ୍‌ ? 15 ବୁଦ୍ଦ୍‌ମାନ୍ଦାନନ୍‌ ମନ୍‌ ଜ୍ଞାନ୍‌ ଗାଡ଼୍‌ସିତ୍‌; ମେଣ୍ଡେ, ଜ୍ଞାନିନ୍‌ କେୱୁ ଜ୍ଞାନ୍‌ ମେଃକିତ୍‌ । 16 ନାରୁନ୍‌ ପୁରଷ୍କାର୍‌ ଅନ୍‌ ମାଇଦିଙ୍କ୍‌ ଆର୍‌ ପରିଷ୍କାର୍ ମାଡ଼ିତ୍‌, ମେଣ୍ଡେ, ବାଡ଼ିୟେ ନାରୁନ୍‌ ମୁନେ ଆଦିଙ୍କ୍‌ ତାତିତଡ଼୍‌ । 17 ବେନ୍‌ ନାରୁଡ଼୍‌ ମୁନେ ନିଜେତ୍‌ ରାମ୍‌କ୍‌ ପୁଞ୍ଜ୍‌ପିତଣ୍ଡ୍‌, ଅଣ୍ଡ୍‌ ଦାର୍ମିକ ତଃନ୍ଦିତଣ୍ଡ୍‌, ମାତର୍‌ ଅନ୍‌ ଗାରେତକିଙ୍କ୍‌ ୱାସ୍‌ ଅକିଙ୍କ୍‌ ପରିକ୍ଷା ମାଡ଼ିତଣ୍ଡ୍‌ । 18 ଲଟ୍ରିମାଡ଼ାନ୍‌ ବିରୁଦ୍ଦ୍‌ ବନ୍ଦ୍‌ଆଦ୍‌ତେ ନୁ ବପୁମାନ୍ଦାନଡ଼୍‌କିଙ୍କ୍‌ ୱେର୍‌ ମାଡ଼ିତଣ୍ଡ୍‌ । 19 ମିଇ ଗାରେତ୍‌ ନାରୁଡ଼୍‌କିଙ୍କ୍‌ ସାହାଯ୍ୟ ମାଡ଼ାଟ୍‌, ଅଡ଼୍‌ ମିକିଙ୍କ୍‌ ୱେରଡ଼୍‌ ନଗର୍‌ତେ ନେଟେ ଲେକାମ୍‌ ରକ୍ଷା ମାଡ଼ିତଡ଼୍‌ ବାତେଙ୍କ୍‌ଇତ୍କେ ଯଦି ଅଡ଼୍‌ ରାମ୍‌କ୍‌ ମାଡ଼ିତଡ଼୍‌ ଅଡ଼୍‌ ମିଇ ସେଙ୍ଗେ କାପାଟ୍‌ତେ ଗେଡ଼ା ବନ୍ଦ୍‌ ମାଡ଼ିତଡ଼୍‌ । 20 ନାରୁନ୍‌ ଡ଼ଙ୍କେ ଅନ୍‌ ପାୟୁର୍‌ତେ କାୟାନେ ନିଣ୍ଡି ଆଦ୍‌ତେ, ମେଣ୍ଡେ, ଅଣ୍ଡ୍‌ ନିଜର୍‌ ପାୟୁର୍‌ତେ ଗାଡ଼୍‌ସାନାଦିନେ ପାଞ୍ଜିତଣ୍ଡ୍‌ । 21 ଡଲାନାଦ୍‌ ନୁ ଜିଉନ୍‌ତେ ୱାଞ୍ଜେର୍‌ ଅଦିନ୍‌; ବେନଡ଼୍‌ ଆଦିଙ୍କ୍‌ ସାୟେ ପୁନ୍‌ତଣ୍ଡ୍‌, ଅଡ଼୍‌ ଆଦ୍‌ ପ୍ରେମ୍‌ତେ କାୟେ ପାହେମ୍‌ ଆଦ୍‌ତଣ୍ଡ୍‌ । 22 ବେନ୍‌ ନାରୁଙ୍କ୍‌ ମୁତେ ଦର୍‌କିତ୍‌, ଅଣ୍ଡ୍‌ ଲେକେତ୍‌ ସାମାନ୍‌ ପାହେମ୍‌ ଆଦ୍‌ତଣ୍ଡ୍‌ ନୁ ସଦାପ୍ରବୁନାଗାଙ୍କ୍‌ ଆଶିର୍ବାଦ୍‌ ପାହେମ୍‌ ଆଦ୍‌ତଣ୍ଡ୍‌ । 23 ଗରିବ୍‌ ନାରୁଡ଼୍‌ ଅନୁରଦ୍‌ ମାଡ଼ିତଣ୍ଡ୍‌; ମାତର୍‌ ସାଉକାରି ଗାଡ଼୍‌ସ୍‌ ଆସ୍‌ ଉତ୍ତର ଇଦ୍‌ତଣ୍ଡ୍‌ । 24 ବେନ୍‌ ନାର୍ଗେ ସାଙ୍ଗ ମାଡ଼ିତଣ୍ଡ୍‌, ଅଣ୍ଡ୍‌ ନିଜର୍‌ ନଷ୍ଟ ମାଇଦିଙ୍କ୍‌ ଆଦ୍‌ ମାଡ଼ିତଣ୍ଡ୍‌; ମାରତ୍‌ ୱେରଣ୍ଡ୍‌ ପ୍ରେମ ମାଡ଼ାନଣ୍ଡ୍‌ ମିନ୍ଦେଡ଼୍‌, ବେନ ଦାଦାନ୍‌ ବାଦୁଲ୍‌ତେ ଅଦିକ୍ ଗାରେ ମୟି ମାନ୍ତଣ୍ଡ୍‌ ।