1 ହୃଦୟ୍‌ତେ ଆଲ୍‌ସାନାଦ୍‌ ନାରୁଣ୍ଡ୍‌ତାଦ୍‌ ଆଦ୍‌ତେ; ମାତର୍‌ ୱାଞ୍ଜେର୍‌ତେ ଗଟ୍‌ ସଦାପ୍ରବୁନ୍ ନାଗାଙ୍କ୍‌ ଆଦ୍‌ତେ । 2 ନାରୁଡ଼ାଦ୍‌ ସାରେ ଆର୍‌ ନିଜର୍‌ କଣ୍ଢେତେ ସାୟେ; ମାତର୍‌ ସଦାପ୍ରବୁ ଆତ୍ମାକିଙ୍କ୍‌ କଲ୍‌ସିତଣ୍ଡ୍‌ । 3 ସଦାପ୍ରବୁଙ୍କ୍‌ ମିଇ ପାଡ଼୍‌ୟି ସମର୍ପଣ ମାଡ଼ାଟ୍‌, ଆଗେ ମିଇ ନିୟମ୍‌ କଟ ଆସ୍‌ ମାନ୍ତେ । 4 ସଦାପ୍ରବୁ ସାରେ ବିଷୟତିଙ୍କ୍‌ ଆଦିନ୍‌ ନିଜର ଉଦ୍ଦେଶ୍‌ତେ ପୁରା ମାଡ଼ାନଙ୍କ୍‌ ମାଡ଼ିମିନ୍ଦେଣ୍ଡ୍‌; ଦୁଷ୍ଟଙ୍କ୍‌ ବା ବିପଦ୍‌ ଦିନେତ୍‌ ମାଇଦିଙ୍କ୍‌ । 5 ମନ୍‌ତେ ବଡ଼୍‌ପନ୍‌ ସାରେ ନାରୁଡ଼୍‌ ସଦାପ୍ରବୁନାଗ୍‌ ପାସ୍କାନଡ଼୍‌, କାଇକ୍‌ ପୟିତା ପୟିତି ଆତ୍କେ'ବା ଅଣ୍ଡ୍‌ ଦଣ୍ଡ୍‌ ଆୟଣ୍ଡ୍‌ । 6 ଦୟା ନୁ ସତ୍‌ତେ ପାପ୍‌ କ୍ଷେମା ଆଦ୍‌ତେ, ମେଣ୍ଡେ, ସଦାପ୍ରବୁନ୍‌ ବିଷୟକିଙ୍କ୍‌ ୱେର୍‌ସ୍‌ ନାରୁଡ଼୍‌ କରାପ୍‌ ପାଡ଼ିୟ୍‌ ୱିଡ଼୍‌ସିତଡ଼୍‌ । 7 ନାରୁଡ଼୍‌ ତାକାନାଦ୍‌ ସଦାପ୍ରବୁନ୍‌ ଏର୍କେ ଆତ୍କେ, ଅଣ୍ଡ୍‌ ତାନ୍‌ ଶତ୍ରୁନଡ଼୍‌ ବା ଅନ୍‌ତଡ଼୍‌ ଶାନ୍ତିତେ ନେଃତିତଣ୍ଡ୍‌ । 8 ଅନ୍ୟାୟ୍‌ତଡ଼୍‌ ନାର୍ଗେ ଲାବ୍‌କଞ୍ଜ୍‌ ଦାର୍ମିକତେ ସୁଜୁର୍‌ ସାୟେ । 9 ନାରୁଣ୍ଡ୍‌ତେ ମନ୍‌ ନିଜର ଆର୍‌ ବିଷୟ ଆଲ୍‌ସିତ୍‌; ମାତର୍‌ ସଦାପ୍ରବୁ ଅନ୍‌ ତାକାନ୍‌ ଆର୍‌ଦିଙ୍କ୍‌ ତିଆର ମାଡ଼ିତଣ୍ଡ୍‌ । 10 ରାଜାନ୍‌ ପାୟୁର୍‌ତାଗ୍‌ ଜ୍ଞାନ୍‌ତେ ବାକ୍ୟ ମାନ୍‌ତେ, ଅନ୍‌ ପାୟୁର୍‌ ବିଚାର୍‌ତାଗ୍‌ ସତ୍‌ତିଙ୍କ୍‌ ମାନେମ୍‌ ଆୟ । 11 ନାର୍ଗେ କେଜିପାଲେତ୍‌ ଡାଣ୍ଡ୍‌ ନୁ ସମାନ୍‌ କଲ୍‌ସାନାଦ୍ ଡାଣ୍ଡ୍‌ ସଦାପ୍ରବୁନାଦ୍‌ ନୁ ମୁନେତାଗ୍‌ ମାନ୍ଦାନ୍‌ କେଜିଗୁଣ୍ଡ୍‌ ସାରେ ଅନ୍‌ ପାଡ଼ିୟ୍‌ । 12 କାରାପ୍‌ ପାଡ଼୍‌ୟି ମାଡ଼ାନାଦ୍‌ ରାଜାଲଡ଼୍‌ ପାସ୍କାନ୍‌ ବିଷୟ; ବେଲାକି ଦାର୍ମିକ୍‌ତେ ସିଂହାସନ ତିଆର୍‌ ଆସ୍‌ ମାନ୍ତେ । 13 ଦର୍ମତେ ପାୟୁର୍‌ ରାଜାଲଡ଼୍‌ ଏର୍କେ ଆତ୍‌କେ, ମେଣ୍ଡେ, ନାର୍ଗେ ଗଟିନଡ଼୍‌କ୍‌ ଅଡ଼୍‌ ପ୍ରେମ ମାଡ଼ିତଡ଼୍‌ । 14 ରାଜାନ୍‌ କପାମ୍‌ତିଙ୍କ୍‌ ଡଲ୍‌ତେ ଦୁତ ଲେକାମ୍‌; ମାତର୍‌ ଜ୍ଞାନି ନାରୁଣ୍ଡ୍‌ ଆଦ୍‌ ଶାନ୍ତି ମାଡ଼ିତଣ୍ଡ୍‌ । 15 ବେସୱେଲେ ରାଜାନ୍‌ ମକମ୍‌ତାଗ୍‌ ୱେଡ଼୍‌କେତେ ୱେସ୍‌ ମାନ୍ତେ, ତାନ୍‌ ଅର୍ତ ଜିଉନ୍‌, ମେଣ୍ଡେ ଅନ୍‌ ଅନୁଗ୍ରହ ତେରାନ୍‌ ୱାନେତେ ମୟଲ୍‌ ଇନା ଆଦ୍‌ତେ । 16 ସୁନା‌ ବାଦୁଲ୍‌ତେ ଜ୍ଞାନ ଲାବ୍‌ ମାଡ଼ାନାଦ୍‌ ସାୟେ, ମେଣ୍ଡେ, ରୁପା ବାଦୁଲ୍‌ତେ ସାୟେତାଦ୍‌ ଲାବ୍ ହେଞ୍ଚାନାଦ୍‌ ବେଲାନେ ସାୟେ' 17 କାରାପ୍ ୱିଡ଼୍‌ସାନ୍‌ ସାୟେତ୍‌ ନାରୁଡ଼ାଦ୍‌ ଗାଲ୍‌ମାନ୍ଦାନ୍‌ ଆର୍‌, ବେନ୍‌ ନାରୁଣ୍ଡ୍‌ ନିଜ୍‌ତେ ଆର୍‌ କେପି ତାକିତଣ୍ଡ୍‌, ଅଣ୍ଡ୍‌ ନିଜେତ୍‌ ଜିୱୁନ୍‌ ଗେଲ୍‌ସ୍ପିତଣ୍ଡ୍‌ । 18 ଅହଙ୍କାର୍‌ ସାରେତିଙ୍କ୍‌ ନଷ୍ଟଆଦାନ୍‌ ମୁନେ ମାନ୍ତେ, ମେଣ୍ଡେ, ବଡ଼୍‌ପନ୍‌ ମନ୍‌ ଆଦାନ୍‌ ମୁନେ ମାନ୍ତେ । 19 ଅହଙ୍କାରିଡ଼୍‌ତଡ଼୍‌ ଡଙ୍ଗ୍‌ତେ ସାମାନ୍‌ ତୁସାନ୍‌ ବାଦୁଲ୍‌ ଗରିବ୍‌ତଡ଼୍‌ ନମ୍ର ଆଦାନାଦ୍‌ ସାୟେ ଆଦ୍‌ତେ । 20 ବେନ୍‌ ନାରୁଣ୍ଡ୍‌ ଅନ୍‌ ବାକ୍ୟତାଗ୍‌ ମନ୍‌ ଇଦ୍‌ତଣ୍ଡ୍‌, ଅଣ୍ଡ୍‌ ସାୟେତାଦ୍‌ ପାଏମ୍‌ ଆଦ୍‌ତଣ୍ଡ୍‌, ମେଣ୍ଡେ ସଦାପ୍ରବୁନାଗ୍‌ ବେନ ଆଶେ ୱାଟିତଣ୍ଡ୍‌, ଅଣ୍ଡ୍‌ ଦନ୍ୟ । 21 ମନ୍‌ଦାଗେ ଜ୍ଞାନ୍‌ମାନ୍ଦାନ୍‌ ନାରୁଡ଼୍‌ ବୁଦ୍ଦିମାନ ଏକାମ୍‌ ଆଦ୍‌ତେ, ମେଣ୍ଡେ, ପାୟୁର୍‌ତେ ମିଙ୍ଗ୍‌ତେ ଗଟିନେ ଜ୍ଞାନ୍‌ ପେର୍‌ସିତ୍‌ । 22 ସାୟେତ୍‌ବୁଦ୍ଦ୍‌, ଆଦ୍‌ ପାଏମ୍‌ଆତ୍‌ତେ ନାରୁଡ଼୍‌ ପର ଜିଉନ୍‌ତେ ପଙ୍ଗାନ୍‌ ଏର୍‌ ଇନା ଆଦ୍‌ତେ; ମାତର୍‌ ମୁର୍କଡ଼୍‌ ତାମ୍‌ ମୁର୍କତ୍‌ ସେଙ୍ଗେ ଦଣ୍ଡ୍‌ ପାହେମ୍‌ ଆଦ୍‌ତଡ଼୍‌। 23 ବୁଦ୍ଦ୍‌ମାନ୍ଦାନ୍‌ ହୃଦୟ ନିଜର ପାୟୁର୍‌ତିଙ୍କ୍‌ ଶିକ୍ଷା ଇଦ୍‌ତେ, ମେଣ୍ଡେ, ଅନ୍‌ ବାକ୍ୟତ୍‌ ବୁଦ୍ଦ୍‌ ପେର୍‌ସ୍ପିତ୍‌ । 24 ଦୟାତେ ଗଟ୍‌ ତେନେନିୟ୍‌ ଲେକାମ୍‌, ଅନ୍‌ ମନତିଙ୍କ୍‌ ମିଙ୍ଗିତ୍‌, ବୁଲେତିଙ୍କ୍‌ ଶକ୍ତି ଇଦ୍‌ତେ । 25 ନାରୁଡ଼୍‌ କଣ୍ଢେତେ ବେନ୍‌ଆୟି ବେନ୍‌ଆୟି ଆର୍‌ ସାୟେ ତନ୍ଦିତ୍‌, ମାତର୍‌ ଆଦିନ୍‌ ପେର୍କେ ଡଲାନାଦ୍‌ ଆର୍‌ ମାନ୍ତେ । 26 ପାଡ଼୍‌ୟିମାଡ଼ାନଡ଼୍‌ କାର୍‌ୱୁ ଅନ୍‌ ମାଇଦିଙ୍କ୍‌ ପାଡ଼୍‌ୟି ମାଡ଼ିତଣ୍ଡ୍‌, ବେଲାକି ଅନ୍‌ ମକମ୍‌ ଅନ୍‌ ମାଇଦିଙ୍କ୍‌ ଅଙ୍କ୍‌ ଦାନ୍ଦେ ମାଡ଼ିତ୍‌ । 27 ଦୁଷ୍ଟ ନାରୁଣ୍ଡ୍‌ କାରାପ୍‌ ଚିନ୍ତେ ମାଡ଼ିତଣ୍ଡ୍‌, ମେଣ୍ଡେ, ଅନ୍‌ ପାୟୁର୍‌ତାଗେ ନିଡ଼୍‌ତାନ୍‌ କିସ୍‌ ଇନା ମାନ୍ତେ । 28 କାରାପ୍‌ ନାରୁଡ଼୍‌ ରାମ୍କ୍‌ ମାଡ଼ିତଣ୍ଡ୍‌, ମେଣ୍ଡେ ନିନ୍ଦେ ମାଡ଼ାନଣ୍ଡ୍‌ ନାର୍ଗେ ସାଙ୍ଗଡ଼୍‌କିଙ୍କ୍‌ ୱେର୍‌ ମାଡ଼ିତଣ୍ଡ୍‌ । 29 ନାରୁଙ୍କ୍‌ ଆୱୁକାନଣ୍ଡ୍‌ ନିଜର୍‌ ଗାରେତକିଙ୍କ୍‌ ଉଡ଼୍‌ସ୍ପିତଣ୍ଡ୍‌, ମେଣ୍ଡେ, ଅଙ୍କ୍‌ କାରାପ୍‌ ଆର୍‌ଦେ ପେସ୍ପିଅଦ୍‌ତଣ୍ଡ୍‌ । 30 ବେନ୍‌ ନାରୁଣ୍ଡ୍‌ ନିଜର କଣ୍ଡେତେ ଗିଃମିତଣ୍ଡ୍‌, ଅଣ୍ଡ୍‌ କାରାପ୍‌ ବିଷୟତେ ନିୟମ୍‌ ମାଡ଼ିତଡ଼୍‌; ବେନ ନିଜର ପାୟୁର୍‌ତିଙ୍କ୍‌ ଆଦ୍‌ମିତଣ୍ଡ୍‌, ଅଣ୍ଡ୍‌ କାରାପ୍‌ ପାଡ଼୍‌ୟି ମାଡ଼ାନଣ୍ଡ୍‌ । 31 ପାଣ୍ଡ୍‌ତେ କେଲ୍‌କ୍‌ ସୁନ୍ଦର୍‌ ସାୟେତ୍‌ ସଜ୍‌ ଲେକାମ୍‌, ଆଦ୍‌ ଦର୍ମ ଆର୍‌ଦାଗେ ଦର୍‌କିତ୍‌ । 32 ବେନ ଜାମେ କପାମ୍‌ ଆଦ୍‌ତଣ୍ଡ୍‌, ଅଣ୍ଡ୍‌ ବିର ବାଦୁଲ୍‌ତେ ବାଡ଼ିୟଣ୍ଡ୍‌; ମେଣ୍ଡେ, ବେନ ନିଜେତ୍‌ ଆତ୍ମାପର ରାଜ୍‌ ମାଡ଼ିତଣ୍ଡ୍‌, ଅଣ୍ଡ୍‌ ନଗର୍‌ତିଙ୍କ୍‌ ଜିଡ଼୍‌ସ୍ପାନ୍‌ ବାଦୁଲ୍‌ତେ ସାୟେ । 33 ନାରୁଡ଼୍‌ ଇଚ୍ଛା ଅଦାନ୍‌ ମାଇଦିଙ୍କ୍‌ ଲଟ୍ରିଆକ୍‌ ୱାଟିତଡ଼୍‌, ମାତର୍‌ ଆଦିନ୍‌ ଇଚ୍ଛା ସଦାପ୍ରବୁନକନ୍‌ ଆଦ୍‌ତେ ।