1 ମିଡ଼୍‌ କାରାପ୍‌ ନାରୁଡ଼୍‌ ପର ଚିନ୍ତା ମାଡ଼୍‌ମାଟ୍‌, ମେଣ୍ଡେ, ଅଡ଼୍‌ ସାଙ୍ଗ ଆଦାନଙ୍କ୍‌ ଇଚ୍ଛା ମାଡ଼୍‌ମାଟ୍‌ । 2 ବାତେଙ୍କ୍‌ଇତ୍କେ ଅଡ଼୍‌ ହୃଦୟ୍ ଗରିବ୍‌ତେ ଯଜନା ମାଡ଼ିତ୍‌, ମେଣ୍ଡେ, ଅଡ଼୍‌ ପାୟୁର୍‌କଞ୍ଜ୍‌ କାରାପ୍‌ତାୱୁ ଗଟି କେତିତ୍‌ । 3 ଜ୍ଞାନତେ ଲନ୍‌ ତିଆର ଆଦ୍‌ତେ ନୁ ବୁଦ୍ଦ୍‌ତେ ଆଦ୍‌ ସାରେଦିନା ମାନ୍‌ତେ; 4 ଜ୍ଞାନତଡ଼୍‌ ଅନ୍‌ ବାକ୍‌ଡ଼ା ସାରେ ନାର୍ଗେଦାମ୍‌ ନୁ ମନ୍‌ଆତ୍‌ତାୱୁ ସାମାନ୍‌ତେ ନିଣ୍ଡିତା । 5 ଜ୍ଞାନବାନ ନାରୁଡ଼୍‌ ବପୁତଣ୍ଡ୍‌, ମେଣ୍ଡେ, ବୁଦ୍ଦ୍‌ତେ ନାରୁଣ୍ଡ୍‌ ଶକ୍ତି ପେର୍‌ସ୍ପିତଣ୍ଡ୍‌ । 6 ନିଜାମ୍‌ ମିଡ଼୍‌ ସାୟେ ବିଚାର୍‌ ଅସ୍‌ ନିମେ ଯୁଦ୍ଦ ମାଡ଼ିତିଡ଼୍‌; ମେଣ୍ଡେ, ନାର୍ଗେ ସୈନ୍ୟଡ଼୍‌ତଡ଼୍‌ ରକ୍ଷା ଆଦ୍‌ତେ । 7 ଜ୍ଞାନ୍‌ଇଲ୍‌ୱେ ପର ଜ୍ଞାନ ଅଦିକ୍‌ ଡ଼େଙ୍ଗ୍‌; ଅଣ୍ଡ୍‌ ନଗର୍‌ତେ ଆର୍‌ଦାଗ୍‌ ନିଜର ପାୟୁର୍‌ ହେତି କେଲଡ଼୍‌ । 8 ବେନ୍‌ ନାରୁଡ଼୍‌ କାରାପ୍‌ ମାଡ଼ାନଙ୍କ୍‌ ଚିନ୍ତେ ମାଡ଼ିତଣ୍ଡ୍‌, ନାରୁଡ଼୍‌ ଅକିଙ୍କ୍‌ କୁସଡ଼୍‌ ନାରୁଣ୍ଡ୍ ଇଞ୍ଜ୍‌ କେତିତଡ଼୍‌ । 9 ବୁଦ୍ଦ୍‌ଇଲ୍‌ୱେନନ୍‌ ବିଚାର୍‌ ପାପ୍‌କାଇଲିତ୍‌; ମେଣ୍ଡେ, ନିନ୍ଦ୍‌ମାଡ଼ାନ୍‌ ନାରୁନ୍‌ ଗାରେ ପାସ୍କାନାଦ୍‌ । 10 ବିପଦ୍‌ତେ ଦିନେ ମିଡ଼୍‌ ବେସୁଙ୍କ୍‌ ସାହସ ଇଲ୍‌ୱେନଡ଼୍‌ ଆଦ୍‌ତିଡ଼୍‌, ଆସୁଙ୍କ୍‌ ମିଡ଼୍‌ ଶକ୍ତି ଇଚୁର୍‌ । 11 ଡଲାନ୍‌ ମାଇଦିଙ୍କ୍‌ ଅଦାଙ୍କ୍‌ ନାରୁଡ଼୍‌କିଙ୍କ୍‌ ଉଦ୍ଦାର୍ ମାଡ଼ାଟ୍‌ ନୁ ଆୱୁକାନଙ୍କ୍‌ ଅଦାନ୍‌ ନାରୁଡ଼୍‌କିଙ୍କ୍‌ ରକ୍ଷା ମାଡ଼ାନ୍‌ ମୁନେ ଡେରିମାଡ଼୍‌ମାଟ୍‌ । 12 ଯଦି ମିଡ଼୍‌ କେତିଡ଼୍‌, ଉଡ଼େ, ମାମ୍‌ ଇଦ୍‌ ପୁନମ୍‌, ଆଲେକେ ହୃଦୟତାଗ୍‌ କଲ୍‌ସାନ୍‌କର୍ତ୍ତାଲ୍‌ ବାତେ ଆଦ୍‌ ବୁଜେମ୍‌ ଆୟିୟଣ୍ଡ୍‌ ? ମେଣ୍ଡେ, ମି ଜିଉତିଙ୍କ୍‌ ରକ୍ଷାମାଡ଼ାନଣ୍ଡ୍‌ ବାତେ ଆଦ୍‌ ବୁଜେମ୍‌ ଆୟଣ୍ଡ୍‌ ? ମେଣ୍ଡେ, ଅଣ୍ଡ୍‌ ବାତେ ସାରେ ନାରୁଡ଼୍‌କିଙ୍କ୍‌ ନିଜେତ୍‌ ପାଡ଼୍‌ୟି ଅନୁସାର୍‌ତେ କାୟେ ଇୱଣ୍ଡ୍‌ ? 13 ହୋ ନା ମାର୍‌, ନିମେ ଉର୍‌ୱେ ତିନ୍‌, ବାତେଙ୍କ୍‌ଇତ୍କେ ଆଦ୍‌ ସାୟେ; ମେଣ୍ଡେ, ଉର୍‌ୱେତ୍‌ ନିଇଟାଟାଡ଼୍‌ ତିନୁଟ୍‌, ବେଲାନ୍‌କି ଆଦ୍‌ ମିଇ ପାୟୁର୍‌ତିଙ୍କ୍‌ ମିଙ୍ଗିତ୍‌ । 14 ଜ୍ଞାନ ମିଇ ଜିଉତ୍‌ ସେଙ୍ଗେ ଆଦ୍‌ ଲେକାମ୍‌ ଇଞ୍ଜ୍‌ ମିଡ଼୍‌ ପୁନ୍‌ତିଡ଼୍‌; ମିଡ଼୍‌ ଆଦ୍‌ ପାହେମ୍‌ ଆତ୍କେ, ପୁରସ୍କାର ମାନ୍‌ନାଙ୍କ୍‌ ମିୟାଦ୍‌ ଆଶେ ୱେରେ ଆୟ । 15 ହୋ ଦୁଷ୍ଟ ନାରୁଡ଼୍‌, ମିଡ଼୍‌ ଦାର୍ମିକ୍‌ତେ ମାନ୍ଦାନ୍‌ ପଡ଼୍‌ୟେତ୍‌ ବିରୁଦ୍ଦତେ କୁଦ୍‌ମାଟ୍‌; ଅନ୍‌ ରମାନ୍‌ପଡ଼ିୟେ ଦଂସ ମାଡ଼୍‌ମାଟ୍‌ । 16 ବେନ୍‌ ଦାର୍ମିକ୍‌ ସାତ ଦାମ୍‌ ରାଲ୍‌କେ ମିକା ମେଣ୍ଡନ୍‌ଦାମ୍‌ ତେଦିତଣ୍ଡ୍‌; ମାତର୍‌ ଦୁଷ୍ଟନଡ଼୍‌ ବିପଦ୍‌ତାଗ୍‌ ତାଲ୍‌ଗିରାଲିତଡ଼୍‌ । 17 ମିଇ ଶତ୍ରୁଡ଼୍‌ ଡଲ୍‌କେ ମିଡ଼୍‌ ୱେଡ଼୍‌କ୍‌ ମାଡ଼୍‌ମାଟ୍‌, ବା ଅଣ୍ଡ୍‌ ତାଲ୍‌ଗି ରାଲ୍‌କେ, ମିୟାଦ୍‌ ସାଏ ଆୟିମାଟ୍‌; 18 ଉମ୍ୱକି ସଦାପ୍ରବୁ ଆଦ୍‌ ଉଡ଼ି ଶାନ୍ତି ଆୟଣ୍ଡ୍‌ ନୁ ଅନାଗାକନ୍‌ ନିଜେତ୍‌ କପାମ୍‌ ମାଲ୍‌ପିତଡ଼୍‌ । 19 କାରାପ୍‌ ପାଡ଼୍‌ୟି ମାଡ଼ାନଙ୍କ୍‌ ମାଇଦିଙ୍କ୍‌ କପାମ୍‌ ଆୟିମାଟ୍‌; ମେଣ୍ଡେ, ଦୁଷ୍ଟନଡ଼୍‌ ପର କିଜ୍ରା ଆୟିମାଟ୍‌ । 20 ବାତେଙ୍କ୍‌ଇତ୍କେ କାରାପ୍‌ ନାରୁନ୍‌ ବେନ୍‌ଆୟି ପୁରସ୍କାର ଦର୍କ ନୁ ଦୁଷ୍ଟନଡ଼୍‌ ୱେସ୍‌ ପିଃତିତଡ଼୍‌ । 21 ହୋ ନା ମାର୍‌, ସଦାପ୍ରବୁନ୍‌ ନୁ ରାଜାଙ୍କ୍‌ ୱେର୍‌ମୁଟ୍‌, ମେଣ୍ଡେ, ବିରୋଦ୍‌ ମାଡ଼ାନଡ଼୍‌ ସାଙ୍ଗେ କାଇଲ୍‌ମାଟ୍‌ । 22 ବାତେଙ୍କ୍‌ଇତ୍କେ ହଟାତ୍‌ ଅଡ଼କ୍‌ ବିପଦ୍ ଗଟେମ୍‌ଆଦ୍‌ତେ; ମେଣ୍ଡେ, ଆ ରେଣ୍ଡ୍‌ ବୟଙ୍କାର୍‌ ଦଂସତିଙ୍କ୍‌ ବେନ୍‌ ପୁନ୍‌ତଣ୍ଡ୍‌ ?

23 ଇସାରେ ବା ଜ୍ଞାନିଡ଼୍‌ ଗଟି । ବିଚାର୍‌ତେ ନାରୁଡ଼୍‌ କଟମାନ୍ଦାନାନ୍‌ ସାୟେ ଆୟ । 24 ଦୁଷ୍ଟଙ୍କ୍‌ ବେନ୍‌ କେତିତଣ୍ଡ୍‌, ମିଡ଼୍‌ ଦାର୍ମିକ୍‌, ଅକିଙ୍କ୍‌ ନାରୁଡ଼୍‌ ଅବିଶାପ ଇଦ୍‌ତଡ଼୍‌, ନାଟେନଡ଼୍‌ ଅକିଙ୍କ୍‌ ପାସ୍କିତଡ଼୍‌ । 25 ମାତର୍‌ ବେନଡ଼୍‌ ଅକିଙ୍କ୍‌ ମେଃକିତଡ଼୍‌, ଅଡ଼୍‌ ୱେଡ଼୍‌କେ ଆଦ୍‌ତଡ଼୍‌; ମେଣ୍ଡେ, ଅଡ଼୍‌ ପର ସାୟେ ଆଶିର୍ବାଦ୍‌ ଆଦ୍‌ତେ । 26 ବେନ୍‌ ସତ୍‌ତେ ଉତ୍ତର ଇଦ୍‌ତଣ୍ଡ୍‌, ଅଣ୍ଡ୍‌ ପାୟୁର୍‌ତେ ଚୁମା ଇଦାନ୍‌ ଲେକାମ୍‌ । 27 ବାୟିଦେ ମିଡ଼୍‌ ପାଡ଼୍‌ୟିଦେ ତିଆର୍‌ ମାଡ଼ାଟ୍‌, ୱାୟେତାଗ୍‌ ନିଜେତ୍‌ ମାଇଦିଙ୍କ୍‌ ପାଡ଼ିୟ୍‌ ମାଡ଼ାଟ୍‌; ଆସୁଙ୍ଗ୍‌ ପେର୍କେ ନିଜର୍‌ ଲନ୍‌ ତିଆର୍‌ ମାଡ଼ାଟ୍‌ । 28 ଆସାମେ ମିଡ଼୍‌ ଗାରେତ୍‌ ଲତେନଙ୍କ୍‌ ପାକେ ସାକ୍ଷି ଆୟିମାଟ୍‌ ନୁ ମିଡ଼୍‌ ପାୟୁର୍‌ତଡ଼୍‌ ବଲ୍‌ମାଟ୍‌ । 29 ଅଣ୍ଡ୍‌ ନା ପର ବେଲାନେ ମାଡ଼ିମିନ୍ଦେନ୍‌, ଅନ୍‌ ପର ନା ଲେକାମ୍‌ ମାଡ଼ିତାନ୍‌ ନୁ ଅନ୍‌ ପାଡ଼୍‌ୟିଲେକାମ୍‌ ନାନ୍‌ ଅକିଙ୍କ୍‌ ମାଡ଼୍‌ତେ ମଲେ ଇଦ୍‌ତାନ୍‌ ଇଞ୍ଜ, ଇଲାନେ କେଲ୍‌ମାଟ୍‌ । 30 ନାନ୍‌ ମଣ୍ଡିନ୍‌ ୱାୟେ ନୁ ମୁର୍କ ନାରୁଡ଼୍‌ ଅଙ୍ଗୁର୍‌ୱାୟେ ଗାରେ ଇସ୍‌ ଆତ୍‌ତାନ୍‌ । 31 ମେଣ୍ଡେ, ଉଡ଼୍‌, ଆଗେତ୍‌ ସାରେପାକେ କୟେ ପେର୍‌ସ୍‌ତା ନୁ ଦୁଲା ଆଦିନ୍‌ ପର ଜାଃକି ମିନ୍ଦେ, ଆଦିନ୍‌ କାଲ୍‌କିନ୍‌ ନେଟାସାରେ ଉର୍ଙ୍ଗିମିନ୍ଦେ । 32 ଆସୁଙ୍କ୍‌ ନାନ୍‌ ଉଡ଼୍‌ତାନ୍‌, ମେଣ୍ଡେ, ମନ୍‌ଇତ୍‌ତାନ୍‌; ନାନ୍‌ ଉଡ଼୍‌ତାନ୍‌ ନୁ ଶିକ୍ଷା ପାହେମ୍‌ ଆତ୍‌ତାନ୍‌ । 33 ମେଣ୍ଡେ ଇସୁର୍‌ ଉଞ୍ଜ୍‌କେ, ମେଣ୍ଡେ ଇସୁର୍‌ କୁଡ଼୍‌କେ, ମେଣ୍ଡେ ଇସୁର୍‌ ଉଞ୍ଜାନ୍‌ ମାଇଦିଙ୍କ୍‌ କାଇକ୍‌ ଡ଼େକା କିକଡ଼୍‌ କକ୍‌ଡ଼୍‌ ଆତ୍କେ, 34 ବେସୁଙ୍କ୍‌ ନିମେ ଉଞ୍ଜିମାନ୍ଦ୍‌ତିନ୍‌, ଗରିବ୍‌ତେ ମାନ୍ଦାନ୍‌ ନିକିଙ୍କ୍‌ ଚୁର୍‌ପୟିତେ ଡଙ୍ଗାଲ୍‌ ନାରୁଣ୍ଡ୍‌ ଇନା ରେଃତିତଣ୍ଡ୍‌ ।