1 ଆଲେକେ ଯିହୁଦୀ ନାରୁଣ୍ଡ୍‍ତାଦ୍ ମୁଲ୍ୟ ବାଆତେ ? ସୁନ୍ନତ୍ ବା ଉପକାର୍ ବାଆତେ ? 2 ସାର୍‍ରେ ଲେକାତ୍ ନାର୍‍ଗେ । ମୁନେନ୍‍, ଇଶ୍ୱର୍‍ ତାନ୍‍ କାବୁର୍‍ତେ ଦାୟିତ୍ୱ ଯିହୁଦୀଡ଼ାଗ୍‍ ସର୍ପା ମାଡ଼ିମାତ୍‍ତଣ୍ଡ୍‍ । 3 ଆଲେକେ ବାଆତେ ? ଯଦି ବେନ ଅବିଶ୍ୱାସୀ ଆତ୍‍କେ, ଆଲେକେ ବାତ୍‍ ଅଡ଼ାଦ୍‌ ଅବିଶ୍ୱାସ୍ ଇଶ୍ୱର୍‌ତାଦ୍ ବିଶ୍ୱାସ୍‍ତିଙ୍କ୍ ନଷ୍ଟ ମାଡ଼ିତ୍ ? 4 ଆଦ୍‍ ବେସୁଟ୍‌ ଆୟ୍‍ମାକି, ଇତ୍‍କେ ସାର୍‍ରେ ନାରୁଡ଼୍ ମିଚ୍ ଆତ୍‍କେ ଆୟିଡ଼୍, ବାତେଙ୍କ୍ଇତ୍‍କେ ଇଶ୍ୱର୍ ନିଜାମ୍ ଇଞ୍ଜ ସ୍ୱୀକାର୍ ଆୟି, ଶାସ୍ତ୍ରତାଗ୍‍ ଲେକାମିନ୍ଦେ, "ମିଡ଼୍ ମିୟାଦ୍ ବାକ୍ୟ ତଡ଼୍ ଦାର୍ମାମ୍‌ ଆଦ୍‍ତିଡ଼୍, ମେଣ୍ଡେ ବିଚାର୍ ଆଦାନ୍‍ୱେଲେ ଜିଡ଼ିତିଡ଼୍ ।" 5 ଯଦି ମାନାଡ଼୍ ଦାର୍ମାମ୍‍ ଇଲ୍‍ୱେ ନାରୁଡ଼୍ ତଡ଼୍ ଇଶ୍ୱର୍‌ତାଦ୍ ଦାର୍ମାମ୍‌‍ତିଙ୍କ୍ ସାମାନ୍ ପ୍ରମାଣ୍ ମାଡ଼ିତାଡ଼୍, ଆଲେକେ ମାନାଡ଼୍ ବାଆତେ କେତିତାଡ଼୍‍ ? ବେନ୍ ଇଶ୍ୱର୍ କପାମ୍‍ତାଦ୍ ଦଣ୍ଡ୍‍ ଇଦ୍‍ତଣ୍ଡ୍, ଅଣ୍ଡ୍‌ ବାଆତେ ଦାର୍ମାମ୍‌ ଆୟ୍‍ୟଣ୍ଡ୍ ? ନାନ୍ ନାରୁଡ଼୍ ଇନା କେତୁତାନ୍ । 6 ଆଦ୍ ବେସୁଟ୍‌ ଆୟ୍‍ମାକି; ଇଶ୍ୱର୍ ଯଦି ନ୍ୟାୟବାନ୍‍ ଆୟ୍‍ୱେମାତ୍କେ, ଆଲାଆତ୍‍କେ ଅଣ୍ଡ୍‌‍ ବେଲା ଜଗତ୍‍ତାଦ୍ ବିଚାର୍ ମାଡ଼ିତନ୍ ? 7 ଯଦି ନାୱାଦ୍ ମିଚ୍ ତଡ଼୍ ଇଶ୍ୱର୍‌ତାଦ୍ ସତ୍ ଅନ୍‌ ଗୌରବ୍ ସେଙ୍ଗେ ନାର୍‍ଗେ ଆତ୍‍କେ, ଆଲେକେ ନାନ୍ ଗାଲା ମେଣ୍ଡେ ବାତେଙ୍କ୍ ପାପି ଇଞ୍ଜ ବିଚାର୍ ଆଦ୍‍ତାନ୍ ? 8 ମାନାଡ଼୍‍ ବାତେଙ୍କ୍‍ କେଲ୍‍ୱାଡ଼୍‍, "ୱାଡ଼ାଟ୍‍ କାରାପ୍‍ ପାଡ଼୍‍ୟି ମାଡ଼ିକାଡ଼୍‍, ଇଗାଙ୍କ୍‍ ଲେକେତ୍‍ କାୟା ଦର୍‍କିତ୍‍," ନାନ୍‍ ଇଦ୍‍ ରକମ୍‍ ଗଟି କେତୁତାନ୍ ଇଞ୍ଜ ବେସ୍‍କ୍‍ତୁଡ଼୍‍ ନିନ୍ଦେ ମାଡ଼ୁତଡ଼୍‍ । ଅଡ଼୍‌‍କିଂଙ୍କ୍‍ ବାତ୍‍ ଦଣ୍ଡ୍‍ ଦର୍‍କାନାଦ୍ ମାନ୍ତେ ଆଦ୍‍ ଦର୍କିତ୍‍ ।

9 ଆଲେକେ ବାଆତେ ? ମାନାଡ଼୍ କି ବାଗାତ୍ ନାରୁଡ଼ାଗାଙ୍କ୍ ମହାନ୍ ? ଇଲ୍‍ଲେ, ବେଲାବା ଆୟ୍‍ୟ; ବାତେଙ୍କ୍ଇତ୍‍କେ ଯିହୁଦୀ ନୁ ଅଣଯିହୁଦୀ ନାରୁଡ଼୍ ସାର୍‍ରେ ପାପ୍ ଅଦିନ୍‌ତାଗ୍ ମିନ୍ଦେଡ଼୍‍, ନାନ୍‍ ମୁନେନ୍‍ କେତ୍‍ତାନ୍‍ ଯେ ଇଡ଼୍‍ ରେଣ୍ଡ୍‍ ନାରୁଡ଼୍‍ ପାପ୍‍ ଅଦିନ୍‌ତାଗ୍‍ ମିନ୍ଦେଡ଼୍‍ । 10 ଶାସ୍ତ୍ରତାଗ୍‍ ଲେକାମିନ୍ଦେ, "ଦାର୍ମାମ୍ ବେନବା ଇଲାଣ୍ଡ୍, ଇଲ୍‍ଲେ, ୱେରଣ୍ଡ୍ ବା ଇଲ୍‍ଲେଣ୍ଡ୍; 11 ବେନ ବୁଜେମ୍ ଆଦ୍‍ତନ୍, ଇଦ୍ ରକମ୍ ବେନ ଇଲ୍‍ଲାଣ୍ଡ୍; ବେନ ଇଶ୍ୱର୍‌ତିଙ୍କ୍ ମେଏକିତଣ୍ଡ୍, ଇଦ୍ ରକମ୍ ୱେରଣ୍ଡ୍‍ବା ଇଲ୍‍ଲାଣ୍ଡ୍; 12 ଅଡ଼୍‌ ସାର୍ରେତଡ଼୍ କାରାପ୍ ଆର୍ର୍‍ଦାଗ୍ ଅଦୁତ୍‍ତଡ଼୍‍, ଅଣ୍ଡୟ୍‌‍ତଡ଼୍ ବେକାର୍‍ ଆଦ୍‍ତଡ଼୍; ବେନ ସତ୍ ପାଡ଼୍‍ୟି ମାଡ଼ିତନ୍, ଇଦ୍ ରକମ୍ ବେନ ଇଲ୍‍ଲାଣ୍ଡ୍, ଇଲ୍‍ଲେ, ଇଦ୍ ରକମ୍ ୱେରଣ୍ଡ୍‍ବା ଇଲ୍‍ଲାଣ୍ଡ୍ । 13 ଅଡ଼ାଦ୍‌ ପାୟୁର୍ କୁଲେମ୍ ଆତ୍‍ତେ ସମାଦି, ଅଡ଼୍‌ ନିଜେତ୍ ୱେଞ୍ଜେର୍‍ ତଡ଼୍ ଚଲନା ମାଡ଼ିମିନ୍ଦେଡ଼୍, ଅଡ଼ାଦ୍‌ ଇୱିଡ଼୍ ମଦଲ୍ ତାଡ଼ାମ୍‍ତାଦ୍ ୱିସାମ୍ ମିନ୍ଦେ; 14 ଅଡ଼ାଦ୍‌ ଗଟି କାୟ୍‍ତା ନୁ ଅବିଶାପ୍‌ ତଡ଼୍ ବର୍ତ୍ତି ଆତ୍‍ତେ; 15 ଅଡ଼୍‌‍ ରେଏତାନଙ୍କ୍‍ ନୁ ଆୱୁକାନଙ୍କ୍‍ ମୁନ୍‍ନେ ମିନ୍ଦେଡ଼୍‍; 16 ଅଡ଼ାଦ୍‌ ଆର୍‍ତାଗ୍ ଦସଂ ନୁ କଷ୍ଟ ମିନ୍ଦେ, 17 ମେଣ୍ଡେ ଶାନ୍ତିତାଦ୍ ଆର୍ର୍ ଅଡ଼୍‌ ପୁନଡ଼୍ । 18 ଇଶ୍ୱର୍‌ତାଦ୍ ୱେର୍ରେ ଅଡ଼ାୱ୍ କଣ୍ଡାନାଗ୍ ବିଲ୍‍କୁଲ୍‍ ଇଲ୍‍ଲେ ।"

19 ମେଣ୍ଡେ, ମାନାଡ଼୍ ତ ପୁତ୍‍ତାଡ଼୍, ବେନଡ଼୍‍ ନିୟମ୍ ଅଦିନ୍‌ତେ ମିନ୍ଦେଡ଼୍‍, ଅଦିନ୍‌ ସାରେ ବିଦିବିଦାନ୍‍ ପାଲନ୍‍ ମାଡ଼ାନଙ୍କ୍ ବାଦ୍ୟ । ଇଶ୍ୱର୍ ବେସୁଟ୍‌ ସାରେତଡ଼୍‍ୱାଦ୍‍ ବିଚାର୍‍ ମାଡ଼ିତଣ୍ଡ୍‍, ନିୟମ୍‍ ମାନେମ୍‍ ଆୟ୍‍ୱଡ଼୍‍ ବାତ୍‍ଆୟି ବୁସାମାଡ଼ି ନିର୍ଦଷ୍‌ ଇଞ୍ଜ କେତାନଙ୍କ୍ ପାର୍‍ୱଡ଼୍‍ । 20 ✝ବାତେଙ୍କ୍ଇତ୍‍କେ ନିୟମ୍‍ତାଦ୍ ପାଡ଼୍‍ୟି ତଡ଼୍ ବେନବା ଅନ୍‌ ମୁନ୍‍ନେ ଦାର୍ମାମ୍ ଆୟ୍‍ୟଣ୍ଡ୍, ଇତ୍‍କେ ନିୟମ୍ ତଡ଼୍ ପାପ୍‍ତାଦ୍ ବୁଦ୍‍ ପୁଟିତ୍ ।

21 ଇତ୍‍ତ୍କେ ଇଶ୍ୱର୍ ମାନାଙ୍କ୍‍ ଦାର୍ମାମ୍‌ ମାଡ଼ାନ୍‍ ସେଙ୍ଗେ ନିୟମ୍ ବାୟ୍‍ଦେ ବାତ୍‍ ମାଡ଼ତଣ୍ଡ୍ ଆଦ୍‍ ଇଞ୍ଜେ ପ୍ରକାଶ୍ ଆତ୍‍ତେ, ମେଣ୍ଡେ ଆଦ୍ ବିଷୟ୍‍ତେ ନିୟମ୍ ନୁ ବାବବାଦିଡ଼୍‍ ସାକ୍ଷି ଇଦୁତଡ଼୍‍, 22 ✝ମାତର୍‍ ଜିସୁ କ୍ରିଷ୍ଟନାଗ୍ ବିଶ୍ୱାସ୍ ମାଡ଼ାନ୍‍ ତଡ଼୍‍ ମାନାଡ଼୍‍ ଇଶ୍ୱର୍‌ତାଗ୍‍ ଦାର୍ମାମ୍‌‍ ଆତ୍‍ତାଡ଼୍‍, ଇଶ୍ୱର୍‍ ବେନଙ୍କ୍‍ବା ସପଟ୍‍ ମାଡ଼କଟ କ୍ରିଷ୍ଟନାଗ୍‍ ବିଶ୍ୱାସ୍‍ ମାଡ଼ମାନ୍ଦାନ୍‍ ସାରେତଡ଼୍‍କ୍‍ ଇଦ୍‍ ସୁଯୋଗ୍‍ ଇଦ୍‍ତଣ୍ଡ୍‍ ।

23 ସାର୍ରେତଡ଼୍ ତ ପାପ୍ ମାଡ଼୍‍ତଡ଼୍, ମେଣ୍ଡେ ଇଶ୍ୱର୍‌ତେ ଗୌରବ୍ ତାଗାଙ୍କ୍‍ ଜେକେ ଆତ୍‍ତଡ଼୍‍, 24 ମେଣ୍ଡେ ଅଡ଼୍‌ ବିନାମୁଲ୍ୟତେ ଅନ୍‌ ଅନୁଗ୍ରମାମେ ଆୟମ୍‌, କ୍ରିଷ୍ଟ ଜିସୁନାଗ୍ ବେନ୍ ମୁକ୍ତି ମିନ୍ଦେ, ଅଦିନ୍‌ତଡ଼୍ ଦାର୍ମାମ୍ ଆଦ୍‍ତଡ଼୍ । 25 ଇଶ୍ୱର୍ ଜିସୁଙ୍କ୍‍ ଦାନ ମାଡ଼୍‍ତଣ୍ଡ୍‍, ବେଲାକି ଅନ୍‌‍ ଡଲ୍‌ତନ୍‌, ଅନାଗ୍‍ ବିଶ୍ୱାସ୍‍ ମାଡ଼ମାନ୍ଦା ନାରୁଡ଼ାଦ୍‍ ପାପ୍‍ କ୍ଷମା ଉପାୟ୍‍ ଆଦ୍‍ତେ । ଇଶ୍ୱର୍ ନିଜର୍‍ ଦାର୍ମାମ୍‌ ତଅତାନଙ୍କ୍ ଇଲା ମାଡ଼୍‍ତଣ୍ଡ୍ । ଇଶ୍ୱର୍ ଗାଡ଼୍‍ସ୍‍ ଆସ୍‍ ନାରୁଡ଼ାଦ୍‍ ମୁନେନ୍‍ ମାଡ଼୍‍ତେ ପାପ୍‍ ପୟଣ୍ଡ୍‍ । 26 ମେଣ୍ଡେ ଇଞ୍ଜେତ୍‍ ଯୁଗ୍‍ତାଗ୍ ନିଜେତ୍ ଦାର୍ମାମ୍ ତଅତାନ୍ ମାୟ୍‍ଦିଙ୍କ୍ ଅଣ୍ଡ୍‌ ପାପ୍‍ କ୍ଷମାତାଦ୍‍ ନିୟମ୍‍ ମାଡ଼୍‍ତଣ୍ଡ୍, ବେଲାକି ଅଣ୍ଡ୍‌ ନିଜେ ଦାର୍ମାମ୍ ନୁ ଜିସୁ କ୍ରିଷ୍ଟନାଗ୍ ବିଶ୍ୱାସ୍‍ ମାଡ଼ାନଡ଼୍‍କ୍‍ ଦାର୍ମ୍ ନାରୁଡ଼୍ ଇଞ୍ଜ କେତିତଡ଼୍‍ । 27 ଆଲେକେ ଗର୍ବ ବେଗେ ? ଆଦ୍ ଜେଏକେ ଆତ୍‍ତେ । ବାତ୍ ରକମ୍ ନିୟମ୍‍ତଡ଼୍ ? ବାତ୍ କ୍ରିୟାକର୍ମ୍‍ତାଦ୍ ନିୟମ୍‍ତଡ଼୍ ? ଇଲ୍‍ଲେ, ବିଶ୍ୱାସ୍‍ତାଦ୍ ନିୟମ୍‍ତଡ଼୍ । 28 ମାମ୍‍ ନିଜାମ୍‍ ବୁଜେମ୍‍ ଆତ୍‍ତମ୍‍ ଯେ, ନାରୁଡ଼୍ କ୍ରିୟାକର୍ମ୍ ନିୟମ୍ ୱିଡ଼୍‍ସି ବିଶ୍ୱାସ୍‍ ତଡ଼୍ ଦାର୍ମାମ୍ ଲେକା ଆଦ୍‍ତଡ଼୍‍ । 29 ଇଶ୍ୱର୍ କି ମାତର୍‌ ଯିହୁଦିଡ଼୍ ଇଶ୍ୱର୍ ? ଅଣ୍ଡ୍‌ ବାତ୍ ଅଣଯିହୁଦୀଡ଼୍ ଇଶ୍ୱର୍ ଆୟ୍‍ୟଣ୍ଡ୍ ? ହୋ, ଅଣଯିହୁଦୀ ନାରୁଡ଼୍‍ତାଦ୍ ମିକା ଇଶ୍ୱର୍ । 30 ✝ବାତେଙ୍କ୍ଇତ୍‍କେ ଇଶ୍ୱର୍ ତ ୱେରଣ୍ଡେ, ମେଣ୍ଡେ ଅଣ୍ଡ୍‌ ବିଶ୍ୱାସ୍‍ ତଡ଼୍ ଯିହୁଦୀ ନାରୁଙ୍କ୍ ନୁ ବିଶ୍ୱାସ୍‍ ତଡ଼୍ ଅଣଯିହୁଦି ନାରୁଙ୍କ୍ ଦାର୍ମାମ୍ ମାଡ଼ିତନ୍ । 31 ଆଲେକେ ମାମ୍‍ମେ ବାତ୍ ବିଶ୍ୱାସ୍ ତଡ଼୍ ନିୟମ୍‍ତିଙ୍କ୍ ଲପ୍ ମାଡ଼ୁତାଡ଼୍ ? ଆଦ୍ ବେସୁଟ୍‌ ବା ଆୟ୍‍ମାକି, ବିଶ୍ୱାସ୍‍ ତଡ଼୍‍ ମାନାଡ଼୍ ନିୟମ୍‍ତିଙ୍କ୍ ସାୟେ ତିଆର୍ ମାଡ଼ୁତାଡ଼୍ ।