1 ନିମେ ପରମେଶ୍ୱର୍‌ତେ ଲନ୍‌ ଆଦାନ୍‌ ୱେଲେ ତିଆର୍‌ତେ ନିଜର୍‌ ଡେକେ ୱାଟା; ବାତେଙ୍କ୍‌ଇତ୍କେ ମୁର୍କ ନାରୁଡ଼୍‌ ବଲିଉତ୍ସର୍ଗ ମାଡ଼ାନ୍‌ ୱିଡ଼୍‌ସି କେଞ୍ଜାନ୍‌ ଗାରେ ଆଦାନାଦ୍‌ ସାୟେ; ଆଦିଙ୍କ୍‌ ଅଡ଼୍‌ କାରାପ୍‌ କାମ୍‌ ମାଡ଼ିତଡ଼୍‌ ଇଞ୍ଜ ପୁନଡ଼୍‌ । 2 ନିମେ ନିଜର୍‌ ପାୟୁର୍‌କଞ୍ଚ୍‌ ଦାନ୍ଦେ ଆଇମା ନୁ ପରମେଶ୍ୱର୍‌ତେ ପାକେ ବାତେବା ଗଟ୍‌ କେତାନ୍‌ ମାଇଦିଙ୍କ୍‌ ନିୟାଦ୍‌ ହୃଦୟ ଦାନ୍ଦେ ମାଡ଼୍‌ମା କି; ବାତେଙ୍କ୍‌ଇତ୍କେ ପରମେଶ୍ୱର୍‌ ସର୍ଗତାଗେ ମିନ୍ଦେଣ୍ଡ୍‌ ନୁ ନିମେ ପୃତିବିତାଗେ ମିନ୍ଦେନି; ଆଦିନ୍‌ ମାଇଦିଙ୍କ୍‌ ନିୟାଦ୍‌ ଗଟ୍‌ ସୁଦୁର୍‌ ଆୟି । 3 ବାତେଙ୍କ୍‌ଇତ୍କେ ନାର୍ଗେ ପାଡ଼ିୟ୍‌ଦେ ସାପ୍ନା ଆଦ୍‌ତେ; ମେଣ୍ଡେ ନାର୍ଗେ ବାକ୍ୟତେ ମୁର୍କ ନାରୁନାଦ୍‌ ଲେଙ୍ଗ୍‌ ଆଦ୍‌ତେ । 4 ନିମେ ପରମେଶ୍ୱର୍‌ଦେ ମୁନେ ମାନତ ମାଡ଼୍‌କେ, ଆଦ୍‌ ଇଦାନଙ୍କ୍‌ ଡେରି ମାଡ଼୍‌ମା; ବାତେଙ୍କ୍‌ଇତ୍କେ ମୁର୍କଡ଼ାଗାଙ୍କ୍‌ ତାମ୍‌ ସୁକାମ୍‌ ଇଲେ; ନିମେ ବାତେ ମାନତ ମାଡ଼ିତିନ୍‌, ଆଦ୍‌ ଇମ୍‌ । 5 ମାନତ ମାଡ଼ି ଇୱକଟ ମାନ୍ଦାନାଦ୍‌ ୱିଡ଼୍‌ସି ନିୟାଦ୍‌ ମାନତ ମାଡ଼କଟ ମାନ୍ଦାନାଦ୍‌ ସାୟେ । 6 ନିୟାଦ୍‌ ମେନ୍ଦୁଲ୍‌ତିଙ୍କ୍‌ ପାପାମ୍‌ ମାଡ଼ାନ୍‌ ମାଇଦିଙ୍କ୍‌ ନି ପାୟୁର୍‌ତିଙ୍କ୍‌ ଇମା; ମେଣ୍ଡେ ଇଦ୍‌ ଉଡମାତ୍‌ତେ ଇଞ୍ଜ ଦୁତନ୍‌ ମୁନେ କେଲ୍‌ମା; ବାତେଙ୍କ୍‌ ପରମେଶ୍ୱର୍‌ ନି ଲେଙ୍ଗ୍‌ଦେ କପାମ୍‌ ଆସ୍‌ ନି କାୟ୍‌ଦେ ପାଡ଼ିୟ୍‌ ନଷ୍ଟ ମାଡ଼ିତଣ୍ଡ୍‌ ? 7 ବାତେଙ୍କ୍‌ଇତ୍କେ ନାର୍ଗେସାପ୍ନା ଉଡ଼ାନାଦ୍‌ ନୁ ନାର୍ଗେ ବାକ୍ୟତଡ଼୍‌ ବେକାର୍‌ ଆଦ୍‌ତେ; ମାତର୍‌ ନିମ୍ମେ ପରମେଶ୍ୱର୍‌ତିଙ୍କ୍‌ ୱେର୍‌ମ୍‌ ।

8 ବେସୁଙ୍କ୍‌ ନିମେ ବେନ୍‌ବା ପ୍ରଦେଶ୍‌ତେ ଗରିବ୍‌ତେ ପର ଅନ୍ୟାୟ୍‌, ଅତ୍ୟାଚାର୍‌ତେ ପର ବିଚାର୍‌ ନୁ ନ୍ୟାୟ ୱେର୍‌ଆଦାନାଦ୍‌ ଉଡ଼ା, ଆସୁଟ୍‌ ଆ ବିଷୟ୍‌ତେ ଦାଦ୍‌ରେଲ୍‌ମା; ବାତେଙ୍କ୍‌ଇତ୍କେ ଡେଙ୍ଗ୍‌ଦିଙ୍କ୍‌ ୱିଡ଼୍‌ସି ୱେରଣ୍ଡ୍‌ ଡେଙ୍ଗ୍‌ଦିଙ୍କ୍‌ ଉଡ଼ିତଣ୍ଡ୍‌; ମେଣ୍ଡେ, ଅଡ଼୍‌କିଙ୍କ୍‌ଆନ୍‌ ଡେଙ୍ଗ୍‌ଦାଗ୍‌ ମିନ୍ଦେଣ୍ଡ୍‌ । 9 ମେଣ୍ଡେ, ପୃତିବିତେ କାୟା ସାରେତଡ଼୍‌ ମାଇଦିଙ୍କ୍‌; ରାଜାଲ୍‌ ନିଜେ ୱାୟେତ୍‌ ଚାଷ୍‌ତଡ଼୍‌ ଶସ୍ୟ ଗୁଡ଼୍‌ପିତଣ୍ଡ୍‌ । 10 ବେନ୍‌ ନାରୁଣ୍ଡ୍‌ ଡାବ୍‌ତିଙ୍କ୍‌ ମେସିତଣ୍ଡ୍‌, ଅଣ୍ଡ୍‌ ଡାବ୍‌ତେ ପାଞ୍ଜଣ୍ଡ୍‌; ବା ବେନ୍‌ ନାରୁଣ୍ଡ୍‌ ସମ୍ପତ୍ତିତିଙ୍କ୍‌ ପ୍ରେମ, ଅଣ୍ଡ୍‌ ସମ୍ପତ୍ତିତାଗ୍‌ ପାଞ୍ଜଣ୍ଡ୍‌; ଇଦେକେ ବେକାର୍‌ । 11 ସମ୍ପତ୍ତି ନାର୍ଗେ ଆତ୍‌ତ୍କେ, ଆୱୁ ତିନ୍ଦାନଡ଼୍‌ ନାର୍ଗେ ଆଦ୍‌ତଡ଼୍‌; ଆଦିଙ୍କ୍‌ ନିଜର୍‌ କଣ୍ଡେତେ ଉଡ଼ାନାଦ୍‌ୱିଡ଼୍‌ସି ଆଗେତ୍‌ ଅଦିକାର୍‌ତେ ବାତେ ଲାବ୍‌ ? 12 ପାଡ଼ିୟ୍‌ଦେ ଜିଉନ୍‌ତେ ନାରୁଣ୍ଡ୍‌ ସୁଦୁର୍‌ ବା ନାର୍ଗେ ତିତ୍କେକେ ଅନ୍‌ ଉସ୍କାଡ଼୍‌ ସୁକାମ୍‌ତେ ଆଦ୍‌ତେ; ମାତର୍‌ ଦନବାନ୍‌ଦେ ପୁରା ଅଂକିଙ୍କ୍‌ ଉସ୍କାଡ଼୍‌ ଉଞ୍ଜାନଙ୍କ୍‌ ଇୱ । 13 ଦନ୍‌ତେ ଅଦିକାରିନ୍‌ତଡ଼୍‌ ନିଜର୍‌ ନଷ୍ଟସେଙ୍ଗେ ଦନ ନେହଃତିତଣ୍ଡ୍‌, ଇଦ୍‌ ଅଣ୍ଡୟ ନିୟମ୍‌ତେ ଲେକାମ୍‌ କଷ୍ଟ ନାନେ ପଡ଼ଦ୍‌ତେ ମଦଲ୍‌ ଉଡ଼ି ମିନ୍ଦେନ୍‌; 14 ମେଣ୍ଡେ, ପିନ୍ଦ୍‌ୱେ ବାଗ୍ୟ ତଡ଼୍‌ ଆୱ୍‌ସାରେ ଦନ୍‌ ନଷ୍ଟ ଆଦ୍‌ତା; ମେଣ୍ଡେ, ଅଣ୍ଡ୍‌ ମାରିଙ୍କ୍‌ ଜନମ୍‌ ମାଡ଼୍‌ତଣ୍ଡ୍‌, ଅନ୍‌ କାୟ୍‌ଦାଗେ ବାତେବା ମାନ । 15 ଅଣ୍ଡ୍‌ ନିଜର୍‌ ୟାୟାନ୍‌ ଡଙ୍କେତ୍‌କଞ୍ଚ୍‌ ବେଲା ୱାତ୍‌ତଣ୍ଡ୍‌, ଆଲେକେ ବଣ୍ଡ ବଣ୍ଡ ୱାତ୍‌ତେ ଲେକାମ୍‌ ମାଲ୍‌ସ୍‌ ଆଦ୍‌ତଣ୍ଡ୍‌, ମେଣ୍ଡେ ଅଣ୍ଡ୍‌ ନିଜର୍‌ ତିପାଲ୍‌ତେ ମାଇଦିଙ୍କ୍‌ ନିଜର୍‌ କାୟ୍‌ଦେ ବାତେ କାଞ୍ଜି ଅଦ୍‌ପାର୍ଦ୍‌ତି, ଇଦ୍‌ ଲେକାମ୍‌ ତଡ଼୍‌ ଅୟ୍‌ୱିନ୍‌ । 16 ମେଣ୍ଡେ, ଅଣ୍ଡ୍‌ ବେଲା ୱାତ୍‌ତଣ୍ଡ୍‌, ଆଲେକେ ଆଦ୍‌ତଣ୍ଡ୍‌, ଇଦେକେ ନିୟମ ଲେକାମ୍‌ ନଷ୍ଟ; ଆଦିଙ୍କ୍‌ ଗାଲ୍‌ଦେ ମାଇଦିଙ୍କ୍‌ ଅଣ୍ଡ୍‌ ତିପାଲ୍‌ ମାଡ଼୍‌ତଣ୍ଡ୍‌, ଅନାଦ୍‌ ବାତେ ଲାବ୍‌ ? 17 ମେଣ୍ଡେ ଅଣ୍ଡ୍‌ ସାରେଜିଉନ୍‌ ଇକାଡ଼୍‌ତାଗେ କାଦି ତିନ୍ଦ୍‌ତଣ୍ଡ୍‌, ମେଣ୍ଡେ ଅଣ୍ଡ୍‌ ଗାଟି କିଜ୍ରା ଆତ୍‌ତଣ୍ଡ୍‌, ମେଣ୍ଡେ ଅଂକିଙ୍କ୍‌ ଦୁଃକ ନୁ କପାମ୍‌ ଗଟେମ୍‌ ଆଦ୍‌ତେ । 18 ଉଡ଼ା, ତିନ୍ଦାନାଦ୍‌ଉନ୍ଦାନାଦ୍‌ ନୁ ପରମେଶ୍ୱର୍‌ତେ ଲପେ ବାଦ୍‌କାନ୍‌ ନାରୁଣ୍ଡ୍‌ ପଡ଼ଦ୍‌ତେ ମଦଲ୍‌ ବେନ୍‌ ବେନ୍‌ ତିପାଲ୍‌ ଆଦ୍‌ତଣ୍ଡ୍‌, ଆଦେକେ ଅନ୍‌ ମାଇଦିଙ୍କ୍‌ ସାୟେ ନୁ ସୁକାମ୍‌ ଲେକାମ୍‌ ନାନେ ଉଡ଼ିମିନ୍ଦେନ୍‌; ବାତେଙ୍କ୍‌ଇତ୍କେ ଇଦେକେ ଅନାଦ୍‌ ଦୁଡ଼େ । 19 ମେଣ୍ଡେ, ପରମେଶ୍ୱର୍‌ ବେନ୍‌ବା ନାରୁଙ୍କ୍‌ ଦନ୍‌ ସମ୍ପତ୍ତି ଦାନମାଡ଼ି ଆୱିଙ୍କ୍‌ ବଗ ମାଡ଼ାନଙ୍କ୍‌ ନୁ ନିଜର୍‌ ଅଂଶ ଗ୍ରହଣ ମାଡ଼ାନଙ୍କ୍‌ ନୁ ନିଜର୍‌ ତିପାଲ୍‌ତେ ସାର୍ଦେ ମାଡ଼ାନଙ୍କ୍‌ ଅଦିକାର୍‌ ଇତ୍‌ତଣ୍ଡ୍‌, ଇଦେକେ ପରମେଶ୍ୱର୍‌ତେ ଦାନ । 20 ଆଦିନ୍‌ ମାଇଦିଙ୍କ୍‌ ଅଣ୍ଡ୍‌ ନିଜର୍‌ତେ ବାଦ୍‌ତ୍କେ ଦିନ୍‌ସାରେ ଅଦିକ୍‌ ଏର୍କେ ମାଡ଼ଣ୍ଡ୍‌; ବାତେଙ୍କ୍‌ଇତ୍କେ ପରମେଶ୍ୱର୍‌ ଅନାଦ୍‌ ହୃଦୟ୍‌ତାଗ୍‌ ସାର୍ଦେ ଜନମ୍‌ ମାଡ଼ି ଅଂକିଙ୍କ୍‌ ଉତ୍ତର୍‌ ଇଦ୍‌ତଣ୍ଡ୍‌ ।