1 ନିମେ ଏର୍‌ଦେ ପର ନିଜର୍‌ କାଦି ୱାଟା, ବାତେଙ୍କ୍‌ଇତ୍କେ ନାର୍ଗେ ଦିନ୍‌ତେ ପେର୍କେ ଆଦ୍‌ ପାହେମ୍‌ ଆଦ୍‌ତିନ୍‌ । 2 ସାତ୍‌ ଜାନ୍‌ଦିଙ୍କ୍‌, ଇତ୍କେ ଆଟ୍‌ ଜାନ୍‌ଦିଙ୍କ୍‌ କାଲ୍‌ପାଟ୍‌; ବାତେଙ୍କ୍‌ଇତ୍କେ ପୃତିବିତାଗେ ବାତେ ବିପଦ୍‌ ଗଟେମ୍‌ ଆଦ୍‌ତେ, ଆଦ୍‌ ନିମେ ପୁନ୍‌ୱିନ୍‌ । 3 ମୟଲ୍‌ତାଗେ ୱାନେ ନିଣ୍ଡି ଆତ୍କେ ପୃତିବିତାଗେ ଆଦ୍‌ ତସିଦ୍‌ତେ; ମେଣ୍ଡେ, ମାଡ଼େ ବେସୁଙ୍କ୍‌ ଦକ୍ଷିଣ ବା ଉତ୍ତର୍‌ ଦିଗ୍‌ତା ରାଲିତ୍‌, ଆଲାଇତ୍କେ ବେନ୍‌ ପଡ଼୍‌ୟେତାଗେ ରାଲିତେ, ଆ ପଡ଼୍‌ୟେତାଗେ ମାନ୍ତେ । 4 ବେନ୍‌ ନାରୁଣ୍ଡ୍‌ ଗାଲ୍‌ତିଙ୍କ୍‌ ଉଡ଼ିତଣ୍ଡ୍‌, ଅଣ୍ଡ୍‌ ୱିତଣ୍ଡ୍‌ ନୁ ବେନ୍‌ ନାରୁଣ୍ଡ୍‌ ମୟଲ୍‌ତିଙ୍କ୍‌ ଉଡ଼ିତଣ୍ଡ୍‌, ଅଣ୍ଡ୍‌ କୟଣ୍ଡ୍‌ । 5 ନିମେ ବେଦ୍‌ପୁଟୁଙ୍କ୍‌ ଗାଲ୍‌ ୱାଦାନାଦ୍‌, ବା ଡଙ୍କେତ୍‌ଆତ୍ତେ ଡଙ୍କ୍‌ତାଗେ ବୁଲା ବେଦ୍‌ ପୁଟୁଙ୍କ୍‌ ପେର୍ସିତ୍‌, ଆଦ୍‌ ପୁନ୍‌ୱି, ଆଦ୍‌ ପୁଟୁଙ୍କ୍‌ ସାରେ ପୁରାଆଦାନ୍‌ ପରମେଶ୍ୱର୍‌ତେ ପାଡ଼ିୟ୍‌ କେ ପୁନ୍‌ୱିଡ଼୍‌ । 6 ନିମେ ନାର୍କକେ ୱିଜ୍‌ ୱିତା ନୁ ମୁଲ୍‌ପୁଟ୍‌ ନିଜର୍‌ କାୟ୍‌ ବନ୍ଦ୍‌ ମାଡ଼୍‌ମା; ବାତେଙ୍କ୍‌ଇତ୍କେ ଇଦ୍‌ ବା ଆଦ୍‌ ଦୁର୍‌ ଆଦ୍‌ତେ, ବା ରେଣ୍ଡ୍‌ ଆସ୍‌ ସମାନ୍‌ ସାୟେ ଆଦ୍‌ତା, ଇଦ୍‌ ନିମେ ପୁନ୍‌ୱି । 7 ନିଜାମ୍‌ତେ ୱେସ୍‌ ସୁକାମ୍‌ତାଦ୍‌, ମେଣ୍ଡେ କଣ୍ଡାନ୍‌ ପାକେ ପଡ଼ଦ୍‌ ଉଡ଼ାନାଦ୍‌ ସାୟେ । 8 ହଁ, ବେସୁଙ୍କ୍‌ ନାରୁଣ୍ଡ୍‌ ନାର୍ଗେ ୱାଡ଼୍‌ସା ବାଦ୍‌କିତଣ୍ଡ୍‌, ଆଲାଇତ୍କେ ଆ ସାରେତାୱିନାଗେ ଅଣ୍ଡ୍‌ ସାର୍ଦେ ମାଡ଼ିଣ୍ଡ୍‌; ମାତର୍‌ ଇକାଡ଼୍‌ତେ ଦିନାମ୍‌ସାରେ ଅଣ୍ଡ୍‌ ଏର୍କେ ନେହଃୱିଣ୍ଡ୍‌, ବାତେଙ୍କ୍‌ଇତ୍କେ ଆଦିନ୍‌ ସାରେ ନାର୍ଗେ ଆଦ୍‌ତେ । ବାତେ ବାତେ ଗଟେମ୍‌ ଆଦ୍‌ତେ, ଆୱ୍‌ସାରେ ବେକାର୍‌ ।

9 ହୋ ଲେୟନି, ନିମେ ନିଜର୍‌ ଲେୟ୍‌ମାନ୍ଦାନ୍‌ ୱେଲେ ସାର୍ଦେ ମାଡ଼ା ନୁ ଲେୟ୍‌ ମାନ୍ଦାନ୍‌ ୱେଲେ ନିୟାଦ୍‌ ହୃଦୟ୍‌ ନିକିଙ୍କ୍‌ ଶାନ୍ତି ମାଡ଼ି, ମେଣ୍ଡେ ନିଜର୍‌ ମନ୍‌ଦେ ଗତିତେ ନୁ ନିଜର୍‌ କଣ୍ଡେତେ ଦର୍ଶନ୍‌ତେ ତାକା; ମାତର୍‌ ପରମେଶ୍ୱର୍‌ ଇ ସାରେ ବିଷୟ୍‌ ପୟସ୍‌ ନିକିଙ୍କ୍‌ ବିଚାର୍‌ତାଗେ ତାତିତଣ୍ଡ୍‌, ଇଦ୍‌ ନିମେ ପୁନ୍‌ । 10 ଆଦିନ୍‌ ମାଇଦିଙ୍କ୍‌ ନିଜର୍‌ ହୃଦୟକଞ୍ଚ୍‌ କପାମ୍‌ ଦୁର୍‌ ମାଡ଼ା ନୁ ନିଜର୍‌ ମେନ୍ଦୁଲ୍‌କଞ୍ଚ୍‌ ଦୁକାମ୍‌ ଦୁର୍‌ ମାଡ଼ା; ବାତେଙ୍କ୍‌ଇତ୍କେ ଲେୟ୍‌ ସମୟ୍‌ ନୁ ଜିଉନ୍‌ତାଦ୍‌ ସାରେ ବେକାର୍‌ ।