1 ଜ୍ଞାନିନ୍‌ ଲେକାମ୍‌ ବେନ ମିନ୍ଦେଣ୍ଡ୍‌ ? ନୁ ବେନ ବିଷୟ୍‌ତେ ଏର୍କେତିଙ୍କ୍‌ ପୁତ୍‌ତଣ୍ଡ୍‌ ? ନାରୁନାଦ୍‌ ଜ୍ଞାନ୍‌ ଅନ୍‌ ପାୟୁତେ ସାର୍ଦେ ମାଡ଼ିତଣ୍ଡ୍‌ ନୁ ଅନ୍‌ ପାୟୁର୍‌ତେ ଡୁଟାଙ୍କ୍‌ତାଦ୍‌ ବଦ୍‌ଲେମ୍‌ ଆଦ୍‌ତେ । 2 ନିମେ ରାଜାନ୍‌ ଆଦେଶ୍ ପାଲନ୍‌ମାଡ଼ା, ନାନେ ଇଦ୍‌ ପରାମର୍ଶ ଇଦ୍‌ତାନ୍‌ ନୁ ପରମେଶ୍ୱର୍‌ତେ ପାକେ ଶପତ ମାଡ଼ାନ୍‌ୱେଲେ ଆଦ୍‌ ମାଡ଼ା । 3 ଅନ୍‌ ମୁନେକଞ୍ଚ୍‌ ପେଇସ୍‌ ଆଦାନଙ୍କ୍‌ ଦାନ୍ଦେ ଆୟ୍‌ମା; ବେନ୍‌ବା କାରାପ୍‌ ବିଷୟ୍‌ତେ ନିଲ୍‌ମା; ବାତେଙ୍କ୍‌ଇତ୍କେ ଅନାଦ୍‌ ବାତେ ଇଚ୍ଛା, ଅଣ୍ଡ୍‌ ଆଦ୍‌ ମାଡ଼ିତଣ୍ଡ୍‌ । 4 ବାତେଙ୍କ୍‌ଇତ୍କେ ରାଜାନ୍‌ ବାକ୍ୟ ଶକ୍ତି ଲେକାମ୍‌; ମେଣ୍ଡେ, ନିମେ ବାତ୍‌ ମାଡ଼ୁତିନ୍‌, ଇଦ୍‌ ଅଂକିଙ୍କ୍‌ ବେନ କେତ୍‌ପାର୍ଦ୍‌ତଣ୍ଡ୍‌ ? 5 ବେନ ଆଦେଶ୍‌ ପାଲନ ମାଡ଼ିତଣ୍ଡ୍‌, ଅଣ୍ଡ୍‌ ବେନ୍‌ବା କାରାପ୍‌ ବିଷୟ୍‌ ପୁନଣ୍ଡ୍‌; ମେଣ୍ଡେ ଜ୍ଞାନିନ୍‌ ମନ୍‌ ସମୟ ନୁ ବିଚାର ପୁନ୍ଦ୍‌ତଣ୍ଡ୍‌; 6 ବାତେଙ୍କ୍‌ଇତ୍କେ ସାରେ କାମ୍‌ତେ ମାଇଦିଙ୍କ୍‌ ସମୟ୍‌ ନୁ ବିଚାର୍‌ ମିନ୍ଦେ ବାତେଙ୍କ୍‌ଇତ୍କେ ନାରୁନ୍‌ ଦୁଃକାମ୍‌ ଅନ୍‌ ପାକେ ଅଦିକ୍‌ କଷ୍ଟତାଦ୍‌ ନୁ ତିପାଲ୍‌ତାଦ୍‌; 7 ବାତେଙ୍କ୍‌ଇତ୍କେ ବାତେ ଗଟେମ୍‌ ଆଦ୍‌ତେ, ଆଦ୍‌ ଅଣ୍ଡ୍‌ ପୁନଣ୍ଡ୍‌ ନୁ ବେଦ୍‌ପୁଟୁଙ୍କ୍‌ ଆଦ୍‌ ଗଟେମ୍‌ ଆଦ୍‌ତେ, ଇଦ୍‌ ବେନ ଅଂକିଙ୍କ୍‌ କେତାନଙ୍କ୍‌ ପାର୍ଦ୍‌ତଣ୍ଡ୍‌ ? 8 ନେସ୍କାନ୍‌ ଗାଲ୍‌ଦିଙ୍କ୍‌ ଅଟ୍‌କାମାଡ଼ି ନେହ୍‌ତାନ୍‌ ମାଇଦିଙ୍କ୍‌ ବେନ୍‌ ନାରୁନାଦ୍‌ ଅଦିକାର୍‌ ଇଲେ ବା ଡଲାନ୍‌ ଦିନାତେ ପର ଅନାଦ୍‌ ବାତେବା ଅଦିକାର୍‌ ଇଲେ, ମେଣ୍ଡେ, ଆ ଯୁଦ୍ଦ୍‌କଞ୍ଚ୍‌ ୱିଡ଼୍‌ସ୍‌ମା; ଆଗେକ୍‌ବା ଦୁଷ୍ଟତାଗେ କାଇଲ୍‌ତେ ନାରୁଙ୍କ୍‌ ଦୁଷ୍ଟତା ଉଦ୍ଦାର୍‌ ମାଡ଼ ।

9 ଇୱ୍‌ ସାରେ ନାନେ ଉଡ଼ି ମିନ୍ଦେନ୍‌ ନୁ ପଡ଼ଦ୍‌ତେ ମଦଲ୍‌ ବେନ ସାରେ ପାଡ଼ିୟ୍‌ ମାଡ଼ାନଙ୍କ୍‌ ଆଦ୍‌ତେ, ଆସୁଟ୍‌ ନାନେ ମନ୍‌ଦିଙ୍କ୍‌ କାଲ୍‌ପି ମିନ୍ଦେନ୍‌; ବେସୁଙ୍କ୍‌ ବେସୁଙ୍କ୍‌ ୱେରଣ୍ଡ୍‌ ନାରୁଣ୍ଡ୍‌ ୱେର୍‌ ଅର୍ତୁନ୍‌ ପର ଅନ୍‌ କାରାପ୍‌ତେ ମାଇଦିଙ୍କ୍‌ ଅଦିକାର୍‌ ମାନ୍ତେ । 10 ମେଣ୍ଡେ ଦୁଷ୍ଟଡ଼୍‌ କାବୁର୍‌ ପାହେମ୍‌ ଆସ୍‌ ଦୁଷ୍ଟନାରୁଡ଼୍‌କ୍‌ ୱିସ୍‌କିନାଗେ ମିସାନାଦ୍‌ ଉଡ଼୍‌ତାନ୍‌; ମେଣ୍ଡେ, ନାର୍ଗେ ପାଡ଼ିୟ୍‌ଦେନଡ଼୍‌ ପବିତ୍ର ପଡ଼ିୟ୍‌ତାଗେ ଆତ୍‌ତଡ଼୍‌ ନୁ ନଗର୍‌ତାଗାଙ୍କ୍‌ ମାନ୍ୟ ଆତ୍‌ତଡ଼୍‌; ଇଦେକେ ବେକାର୍‌ ଉଡ଼୍‌ତାନ୍‌ । 11 କାରାପ୍‌ ପାଡ଼ିୟ୍‌ଦେନଡ଼୍‌ ଜାପେ ଦଣ୍ଡାଇୱାଙ୍କ୍‌ ନାରୁଡ଼୍‌ତେ ହୃଦୟକଞ୍ଚ୍‌ କାରାପ୍‌ ପାଡ଼ିୟ୍‌ ମାଡ଼ାନଙ୍କ୍‌ ଇଚ୍ଛା ମାଡ଼ିତଡ଼୍‌ । 12 ଆଗେକ୍‌ବା ପାପି ଶହେଦାମ୍‌ କାରାପ୍‌ ପାଡ଼୍‌ୟି ମାଡ଼ି ନାର୍ଗେଦିନା ବାଦ୍‌କିତଣ୍ଡ୍‌, ଆଗେକ୍‌ବା ନାନେ ନିଜାମ୍‌ ପୁତ୍‌ତାନ୍‌ ଜେ, ପରମେଶ୍ୱର୍‌ତିଙ୍କ୍‌ ୱେର୍‌ଦାନଡ଼୍‌ ଅନ୍‌ ମୁନେ ୱେର୍ଦ୍‌ତଡ଼୍‌ ଇଞ୍ଜ ଅଡ଼ାଦ୍‌ ସାୟେ ଆଦ୍‌ତେ; 13 ମାତର୍‌ ଦୁଷ୍ଟନାଦ୍‌ ସାୟେ ଆୟ, ଆଗେକ୍‌ବା ଅଣ୍ଡ୍‌ ନିଜର୍‌ ନିଡ଼୍‌କେତେ ଲେକାମ୍‌ ଅନାଦ୍‌ ବୟସ୍‌ ଅଦିକ୍‌ମାଡ଼ାନଙ୍କ୍‌ ଆୟ; ବାତେଙ୍କ୍‌ଇତ୍କେ ଅଣ୍ଡ୍‌ ପରମେଶ୍ୱର୍‌ତେ ମୁନେ ୱେର୍‌ୱଣ୍ଡ୍‌ । 14 ପୃତିବିତାଗେ ଇଦ୍‌ ଅଣ୍ଡୟ ବେକାର୍‌ ବିଷୟ୍‌ ପୁରା ଆଦ୍‌ତେ; ବେସୁଙ୍କ୍‌ ବେସୁଙ୍କ୍‌ ଦାର୍ମିକିଡ଼୍‌କ୍‌ ଦୁଷ୍ଟଡ଼୍‌ ପାଡ଼ିୟ୍‌ଦେ ଲେକାମ୍‌ ପାଡ଼୍‌ୟି ଗଟେମ୍‌ଆଦ୍‌ତେ, ମେଣ୍ଡେ ବେସୁଙ୍କ୍‌ ବେସୁଙ୍କ୍‌ ଦୁଷ୍ଟଡ଼୍‌କ୍‌ ଦାର୍ମିକିଡ଼୍‌ ପାଡ଼ିୟ୍‌ତେ ଲେକାମ୍‌ ପାଡ଼ିୟ୍‌ ଗଟେମ୍‌ଆଦ୍‌ତେ; ନାନେ କେତ୍‌ତାନ୍‌, ଇଦେକେ ବେକାର୍‌ । 15 ଆସୁଟ୍‌ ନାନେ ସାର୍ଦେତେ ପ୍ରଶଂସା ମାଡ଼୍‌ତାନ୍‌, ବାତେଙ୍କ୍‌ଇତ୍କେ ତିନ୍ଦାନାଦ୍‌ ନୁ ସାର୍ଦେ ମାଡ଼ାନ୍‌ ବାଦୁଲ୍‌ତେ ପଡ଼ଦ୍‌ ମଦଲ୍‌ ନାରୁନ୍‌ ପର ମେଣ୍ଡେ ବାତେବା ସାୟେତ୍‌ ବିଷୟ ଇଲା; ଆଦିଙ୍କ୍‌ ବେନ ପଡ଼ଦ୍‌ତେ ମଦଲ୍‌ ପରମେଶ୍ୱର୍‌ତେ ମାଡ଼୍‌ତେ ବର୍ଷତ୍‌ ଲପେ ବେନ ବେନ ତିପାଲ୍‌ ଆତ୍‌ତଣ୍ଡ୍‌, ଆ ସାରେତାୱିନାଗେ ଇଦେକେ ଅନ୍‌ ତଡ଼୍‌ ଆଦ୍‌ତେ । 16 ବେସୁଙ୍କ୍‌ ନାନେ ଜ୍ଞାନ୍‌ ବିଷୟ୍‌ତେ ପୁନ୍ଦାନଙ୍କ୍‌ ନୁ ପୃତିବିତାଗେ ମାଡ଼୍‌ତେ ପାଡ଼ିୟ୍‌ ଉଡ଼ାନଙ୍କ୍‌ ମନ୍‌ ଇତ୍‌ତାନ୍‌; ଉଡ଼ା, ବାତେଙ୍କ୍‌ଇତ୍କେ ନାର୍କେ ପାୟାଲ୍‌ ବେନନ୍‌ କଣ୍ଡା ଉସ୍‌କାଡ଼୍‌ ଉଡ, ଇସତ୍‌ ନାରୁଣ୍ଡ୍‌ ଆନ୍ତେ ମିନ୍ଦେଣ୍ଡ୍‌; 17 ଆସୁଟ୍‌ ନାନେ ପରମେଶ୍ୱର୍‌ତେ ସାରେ ପାଡ଼ିୟ୍‌ଦେ ବିଷୟ୍‌ ଉଡ଼୍‌ତାନ୍‌ ଜେ, ନାରୁଣ୍ଡ୍‌ ପଡ଼ଦ୍‌ତେ ମଦଲ୍ ଆତ୍‌ତେ ପାଡ଼ିୟ୍‌ଦେ ବିଷୟ୍‌ ଦର୍‌ସ୍କେ ପାର୍‌ୱଣ୍ଡ୍‌; ବାତେଙ୍କ୍‌ଇତ୍କେ ଆଦ୍‌ ମେଃକାନ୍‌ ମାଇଦିଙ୍କ୍‌ ନାରୁଣ୍ଡ୍‌ ବେସର୍‌ ତିପାଲ୍‌ ଆତ୍‌ତ୍କେ ବା ଆଦ୍‌ ଦର୍‌ସ୍କେ ପାର୍‌ୱଣ୍ଡ୍‌; ମେଣ୍ଡେ ଜ୍ଞାନି ନାରୁଣ୍ଡ୍‌ ଆଦ୍‌ ପୁନ୍ଦାନଙ୍କ୍‌ ଚିନ୍ତେ ମାଡ଼୍‌କେ ବା ଆଗେତ୍‌ ବିଷୟ୍‌ ଦର୍ସ୍କାନଙ୍କ୍‌ ପାର୍‌ୱଣ୍ଡ୍‌ ।