1 ନାନ୍‌ ନିଜେ ମନେ ମନେ ଆଲ୍‌ସି କେତ୍‌ତାନ୍‌, ୱାଡ଼େ, ନାନ୍‌ ଇଞ୍ଜେ ମିକିଙ୍କ୍‌ ୱେଡ଼୍‌କେତଡ଼୍‌ ପରିକ୍ଷା ମାଡ଼ିତାନ୍‌; ଇଦିନ୍‌ ମାଇଦିଙ୍କ୍‌ ସୁକାମ୍‌ ଆଲ୍‌ସାଟ୍‌; ମେଣ୍ଡେ ଉଡ଼ାଟ୍‌, ଆଦ୍‌ମିକା ବେକାର୍‌ । 2 ନାନ୍‌ କାୱୁଦାନ୍‌ ବିଷୟତେ କେତ୍‌ତାନ୍‌, ଆଦ୍‌ ବାୟେ; ୱେଡ଼୍‌କେତ୍‌ ବିଷୟ କେତ୍‌ତାନ୍‌, ଆଦ୍ ବାତେ ମାଡ଼ିତ୍‌ ? 3 ନାନ୍‌ ବେଲାନେ କାଲ ଲାନ୍ଦେ ଉନ୍ଦାନ୍‌ ମେନ୍ଦୁଲ୍‌ତିଙ୍କ୍‌ ୱେଡ଼୍‌କେ ମାଡ଼ିତାନ୍‌ ନୁ ମାବ୍‌ତେ ମଦଲ୍‌ ନାରୁଡ଼୍‌ ପିଲାନେ ଜିୱୁନ୍‌ ମାନ୍ଦାନ୍‌ୱେଲେ ବାତ୍‌ତେ ମାଡ଼ାନାଦ୍‌ ସାୟେ, ଇଦ୍‌ ପୁନ୍ଦାନ୍‌ ଯାକ ବେଲାନେ ଅଜ୍ଞାନତାତେ ମାଡ଼ିତାନ୍‌, ଇଦ୍‌ ମନେ ମନେ ମେଃକ୍‌ତାନ୍‌, ଇଦ୍‌ ସମୟତେ କେ ନା ମନ୍‌ ଜ୍ଞାନତେ ନାକିଙ୍କ୍‌ ଆର୍‌ ତଃସମାତ୍‌ତେ । 4 ନାନ୍‌ ନା ମାଇଦିଙ୍କ୍‌ ବେଡ଼ିୟା ବେଡ଼ିୟା ପାଡ଼୍‌ୟି ମାଡ଼୍‌ତାନ୍‌; ନାନ୍‌ ଲକ୍‌ ତିଆର ମାଡ଼୍‌ତାନ୍‌; ନାନ୍‌ ନା ମାଇଦିଙ୍କ୍‌ ଅଙ୍ଗୁର୍‌ୱାୟେତାଗ୍‌ ତିଆର ମାଡ଼୍‌ତାନ୍‌; 5 ନାନ୍‌ ନିଜର ମାଇଦିଙ୍କ୍‌ ବଗିଚା ନୁ ପୁଙ୍ଗାନ୍‌ ବଗିଚା ତିଆରମାଡ଼ି, ଆଗେ ସାରେପ୍ରକାର କାୟାମାଡାକ୍‌ ଉରୃସ୍କ୍‌ତାନ୍‌; 6 ନାନ୍‌ ମାଡ଼ାକିନ୍‌ ପାଲ୍ଲା ଉର୍ସ୍କ୍‌ତେ ମେଟେତାଗ୍‌ ଏର୍‌ ଇଲ୍‌ସ୍କାନ୍‌ ମାଇଦିଙ୍କ୍‌ ଏର୍‌ୱୁ ଡେୱୁତାନ୍‌; 7 ନାନ୍‌ ଦାସଦାସିଡ଼୍‌କ୍‌ ଆସ୍‌ତାନ୍‌ ନୁ ନା ଲତ୍‌ତାଗ୍‌ ପୁଟ୍‌ତେ ଦାସଡ଼୍‌ ମାତ୍‌ତଡ଼୍‌; ମେଣ୍ଡେ ନା ମୁନେ ଯିରୁଶାଲମ୍‌ ସାରେତଡ଼ାଗାଙ୍କ୍‌ ନା ମେକାଗଡ଼୍‌କ୍‌ ପଶୁମାନ୍ଦେ ନାର୍ଗେ ମାତ୍‌ତା; 8 ନାନ୍‌ ରୁପା ନୁ ସୁନା, ମେଣ୍ଡେ ୱେରେୱେରେ ରାଜାନଡ଼୍‌ ନୁ ସାରେ ରାଜ୍ୟତାଗ୍‌ ନାର୍ଗେ ନାର୍ଗେ ସମ୍ପତ୍ତି ଗୁଡ଼୍‌ପ୍‌ତାନ୍‌; ନାନ୍‌ ପାଟା ପାରାନଡ଼୍‌ ନୁ ପାଟା ପାରାନାୱିଙ୍କ୍‌, ମେଣ୍ଡେ ନାରୁଡ଼୍‌ ପିଲାକିଙ୍କ୍‌ ସୁକାମ୍‌ ଇଦାନ୍ ନାର୍ଗେ ଆୱାତ୍‌ମୁତେକି ଦର୍‌ସ୍କତାନ୍‌ । 9 ଇଲାନେ ନା ମୁନେ ଯିରୁଶାଲମତେ ବେନଡ଼୍‌ ମାତ୍‌ତଡ଼୍‌, ଆ ସାରେତଡ଼୍‌ ଆଗାଙ୍କ୍‌ ମହାନ୍‌ ନୁ ଶକ୍ତିମାନ୍ଦାନନ୍‌ ଆତ୍‌ତାନ୍‌; ବା ନା ଜ୍ଞାନ ନା ୟାଗ୍‌ ମିନ୍ଦେ । 10 ମେଣ୍ଡେ, ନା କଣ୍ଢା ବାତେ ଉଡ଼ି ବାତେ ମାଡ଼୍‌ତେ, ଆଦ୍‌ ନା ତାଂକିଙ୍କ୍‌ ପାସ୍କନ ଆତ୍‌ତାନ୍‌; ନାନ୍‌ ନିଜର ହୃଦୟତିଙ୍କ୍‌ ବେନ୍‌ଆୟି ସୁକାମ୍‌ ଆଲ୍‌ସାନାଦ୍‌ ବିରଦ୍‌ ମାଡ଼ନ୍‌ ଆତ୍‌ତାନ୍‌, ବାତେଙ୍କ୍‌ଇତ୍କେ ନା ସାରେ ତିପାଲ୍‌ ମାଇଦିଙ୍କ୍‌ ନା ହୃଦୟ ୱେଡ଼୍‌କେ ଆତ୍‌ତେ; ମେଣ୍ଡେ, ନା ମାଇଦିଙ୍କ୍‌ ତିପାଲ୍‌ତାଦ୍‌ ଇଦ୍‌ ନାୟାଦ୍‌ ବାଗ୍‌ ମାତ୍‌ତେ । 11 ଆସୁଙ୍କ୍‌ ନା କାଇଦେ ବେନ୍‌ ସାରେ ପାଡ଼୍‌ୟି ମାଡ଼ିମାତ୍‌ତେ ନୁ ବେନ୍‌ ବେନ୍‌ ତିପାଲ୍‌ତାଗ୍‌ ନାନ୍‌ ଆୟ୍‌ୱିମାତ୍‌ତାନ୍‌, ଆଦିନ୍‌ ପର ନାନ୍‌ ଉଡ଼୍‌ତାନ୍‌; ମେଣ୍ଡେ, ଉଡ଼େ, ସାରେ ବେକାର୍‌ ନୁ ଗାଲ୍‌ଦେ ପେର୍କେ ମିରାନଡ଼୍‌ ମାତର୍‌, ମେଣ୍ଡେ ପଡ଼ଦ୍‌ତେ ମଦଲ୍‌ ବାତେବା ଲାବ୍‌ ଇଲ୍‌ୱମାତ୍‌ତେ ।

12 ଆସୁଙ୍କ୍‌ ନାନ୍‌ ଜ୍ଞାନ, ବାୟେ ନୁ ଜ୍ଞାନ୍‌ଇଲ୍‌ୱେ ଉଡ଼ାନଙ୍କ୍‌ ଇଚ୍ଛାମାଡ଼୍‌ତାନ୍‌; ବାତେଙ୍କ୍‌ଇତ୍କେ ବେନ୍‌ ନାରୁଡ଼୍‌ ରାଜାନ୍‌ ପେର୍‌କେ ୱାଦ୍‌ତଣ୍ଡ୍, ଅଣ୍ଡ ବାତେ ମାଡ଼ିତଣ୍ଡ୍‌ ? ବାତ୍‌ତେ ମାଡ଼ି ମିନ୍ଦେଡ଼୍‌, ଆଦେ କେ ମାତର୍‌ । 13 ଆସୁଙ୍କ୍‌ ନାନ୍‌ ଉଡ଼୍‌ତାନ୍‌, ବେଲାନେ ଇକାଡ଼୍‌ତାଗାଙ୍କ୍‌ ୱେସ୍‌ ସାୟେ, ଆଲେନେ ଅଜ୍ଞାନ୍‌ତାଗାଙ୍କ୍‌ ଜ୍ଞାନ ସାୟେ । 14 ଜ୍ଞାନି ନାରୁଣ୍ଡ୍‌ ବେନ୍‌ ଆର୍‌ଦା ଆଦ୍‌ତଣ୍ଡ୍‌ ଅଣ୍ଡ୍‌ ଆଦ୍‌ ପୁନ୍ତଣ୍ଡ୍‌, ମେଣ୍ଡେ ମୁର୍କ ଇକାଡ଼୍‌ତାଗ୍‌ ଉଡିତଣ୍ଡ, ଆଗେକ୍‌ବା ସାରେତଡ଼୍‌ ପର ଅଣ୍ଡୟ୍‌ ଦଶା ଗଟେମ୍‌ ଆଦ୍‌ତେ, ଇଦ୍‌ ନାନ୍‌ ଉଡ଼୍‌ତାନ୍‌ । 15 ଆସୁଙ୍କ୍‌ ନାନ୍‌ ନିଜେ ମନେ ମନେ ଆଲ୍‌ସ୍‌ତାନ୍‌, ମୁର୍କନ୍‌ ପର ବେଲାନେ ଗଟେମ୍ ଆଦ୍‌ତେ, ନା ପର ଆନ୍ତେ ଆଲେନେ ଗଟେମ୍‌ ଆଦ୍‌ତେ; ଆସୁଙ୍କ୍‌ ନାନ୍‌ ବାତେଙ୍କ୍‌ ଅଦିକ୍‌ ଜ୍ଞାନବାନ ଆତ୍‌ତାନ୍ ? ଆସୁଙ୍କ୍‌ ନାନ୍‌ ମନେ ମନେ କେତ୍‌ତାନ୍‌, ଇଦେ କେ ବେକାର୍‌ । 16 ବାତେଙ୍କ୍‌ଇତ୍କେ ବେଲାନେ ମୁର୍କନ୍‌, ଆଲାନେ ଜ୍ଞାନବାନ ନାରୁନାଦ୍‌ ଏର୍କେ ସାରେଦାମ୍‌ ମାନ; ବେଲାକି ବବିଷ୍ୟତ୍‌ତେ ସାରେତଡ଼୍‌ ମାର୍ଙ୍ଗି ମାନ୍‌ତଡ଼୍‌ । ହଁ ! ମୁର୍କ ବେଲାନ୍‌ ଡଲିତଣ୍ଡ୍‌, ଜ୍ଞାନି ବା ଆଲାନେ ଡଲିତଣ୍ଡ୍‌ । 17 ଆସୁଟ୍‌ ନାନେ ଜିୱୁନ୍‌ତିଙ୍କ୍‌ ପାସ୍କ୍‌ତାନ୍‌; ବାତେଙ୍କ୍‌ଇତ୍କେ ପଡ଼ଦ୍‌ତେ ମଦଲ୍‌ ମାଡ଼୍‌ତେ ପାଡ଼ିୟ୍‌ ନା ପର କଷ୍ଟ ଇନା ଆତ୍‌ତେ; ବାତେଙ୍କ୍‌ଇତ୍କେ ସାରେ ବେକାର୍‌ ନୁ ଗାଲ୍‌ ଲେକାମ୍‌ ।

18 ମେଣ୍ଡେ, ପଡ଼ଦ୍‌ତେ ମଦଲ୍‌ ନାନେ ବେନ୍‌ ବେନ୍‌ କାମ୍‌ଦେ କଷ୍ଟ ଆତ୍‌ତାନ୍‌, ଆୱୁ ଆୱ୍‌ସାରେ କଷ୍ଟତିଙ୍କ୍‌ ପାସ୍କ୍‌ତାନ୍‌; ବାତେଙ୍କ୍‌ଇତ୍କେ ନା ୱାସ ମାନ୍ଦାନ୍‌ ପିଲୁଡ଼୍‌ତେ ମାଇଦିଙ୍କ୍‌ ଆୱ୍‌ ସାରେ ୱିଡ଼୍‌ସି ଆଦାନଙ୍କ୍‌ ଆଦ୍‌ତେ । 19 ମେଣ୍ଡେ, ଅଣ୍ଡ୍‌ ଜ୍ଞାନି ବା ମୁର୍କ ଆଦ୍‌ତଣ୍ଡ୍‌, ବେନ ପୁତ୍‌ତଣ୍ଡ୍‌ ? ଆଗେକ୍‌ବା ନାନେ ପଡ଼ଦ୍‌ତେ ମଦଲ୍‌ ବେନ୍‌ ବେନ୍‌ ପାଡ଼ିୟ୍‌ତାଗ୍‌ କଷ୍ଟତେ ଆୟିସ୍‌ ଜ୍ଞାନ୍‌ ତତ୍‌ତାନ୍‌, ଅଣ୍ଡ୍‌ ନାୟାୱ୍‌ ଆ ସାରେ କଷ୍ଟତେ କାୟେତ୍‌ଲେକାମ୍‌ ଅଣ୍ଡ୍‌ ଆଦ୍‌ତଣ୍ଡ୍‌; ଇଦେକେ ବେକାର୍‌ । 20 ଇଦିନ୍‌ସେଙ୍ଗେ ପଡ଼ଦ୍‌ତେ ମଦଲ୍‌ ନାନେ ବେନ୍‌ ବେନ୍‌ ତିପାଲ୍‌କଞ୍ଚ୍‌ ତିପାଲ୍‌ ଆତ୍‌ତାନ୍‌, ଆଦ୍‌ ସାରେ ବିଷୟ୍‌ତେ ନିଜର୍‌ ମନ୍‌ତେକଞ୍ଚ୍‌ ମୁର୍‌ମୁରା ମାଡ଼ାନଙ୍କ୍‌ ଇଚ୍ଛାମାଡ଼୍‌ତାନ୍‌ । 21 ବାତେଙ୍କ୍‌ଇତ୍କେ ୱେରଣ୍ଡ୍‌ ନାରୁଣ୍ଡ୍‌ ଜ୍ଞାନ ନୁ ଶିକ୍ଷା ନୁ ଦକ୍ଷତାତଡ଼୍‌ ତିପାଲ୍‌ ଆଦ୍‌ତଣ୍ଡ୍‌; ଆଗେକ୍‌ବା ବେନ୍‌ ନାରୁଣ୍ଡ୍‌ ଆଗେ ତିପାଲ୍‌ ଆୟଣ୍ଡ୍‌, ତାନ୍‌ ଅଦିକାର୍‌ତେ ମାଇଦିଙ୍କ୍‌ ଅଣ୍ଡ୍‌ ଆଦ୍‌ ୱିଡ଼୍‌ସି ଆଦ୍‌ତଣ୍ଡ୍‌ । ଇଦେକେ ବେକାର୍‌ ନୁ ଗାଟି କାରାପ୍‌। 22 ଆଲାଇତ୍କେ ପଡ଼ଦ୍‌ତେ ମଦଲ୍‌ ନାରୁଣ୍ଡ୍‌ ବେନ୍‌ ବେନ୍‌ ତିପାଲ୍‌ତେ ନୁ ହୃଦୟ୍‌ତେ ଚିନ୍ତେତେ ଆୟ୍‌ୱିତଣ୍ଡ୍‌, ତାୱିନେ ଅଣ୍ଡ୍‌ ବାତେ ପାହେମ୍‌ ଆଦ୍‌ତଣ୍ଡ୍‌ ? 23 ବାତେଙ୍କ୍‌ତତ୍କେ ତାନ୍‌ ଦିନ୍‌ ସାରେ ଦୁଃକାମ୍‌ ନୁ ତାନ୍‌ ଚିନ୍ତା ତିପାଲ୍‌ତେ ଲେକାମ୍‌ ଆତ୍ତେ; ନାର୍କା ଆନ୍ତେ ତାନ୍‌ ହୃଦୟ ରମ । ଇଦ୍‌ ଆନ୍ତେ ବେକାର୍‌ । 24 ତିନ୍ଦାନାଦ୍‌ ନୁ ଉନ୍ଦାନାଦ୍‌ ନିଜର୍‌ ତିପାଲ୍‌ତେ ନିଜର୍‌ ଜିୱୁନ୍‌ତିଙ୍କ୍‌ ସାର୍ଦେ ମାଡ଼ାନ୍‌ ୱିଡ଼୍‌ସି ନାରୁନାଦ୍‌ ମେଣ୍ଡେ ଅଦିକ୍‌ ସାୟେତ୍‌ ବିଷୟ୍‌ ଇଲା । ମେଣ୍ଡେ ନାନେ ଉଡ଼୍‌ତାନ୍‌, ଇଦ୍‌ ପରମେଶ୍ୱର୍‌ତେ କାୟ୍‌ଦେକଞ୍ଚ୍‌ ଆଦ୍‌ତେ । 25 ବାତେଙ୍କ୍‌ଇତ୍କେ ନାୟାଗାଙ୍କ୍‌ ବେନ ଅଦିକ୍‌ ତିନ୍ଦ୍‌ଦେ ପାର୍ଦ୍‌ତଣ୍ଡ୍‌ ବା ସାର୍ଦେ ମାଡ଼୍‌ପାର୍ଦ୍‌ତଣ୍ଡ୍‌ ? 26 ବାତେଙ୍କ୍‌ଇତ୍କେ ବେନ୍‌ ନାରୁଣ୍ଡ୍‌ ପରମେଶ୍ୱର୍‌ତିଙ୍କ୍‌ ସାର୍ଦେ ମାଡ଼ିତଣ୍ଡ୍‌, ଅଣ୍ଡ୍‌ ଅଂକିଙ୍କ୍‌ ଜ୍ଞାନ ନୁ ଶିକ୍ଷା ନୁ ସାର୍ଦେ ଇଦ୍‌ତଣ୍ଡ୍‌; ମାତର୍‌ ପରମେଶ୍ୱର୍‌ତେ ସାର୍ଦେମାଡ଼ାନ୍‌ ନାରୁଙ୍କ୍‌ ଇଦାନ୍‌ ମାଇଦିଙ୍କ୍‌ ଗୁଡ଼୍‌ପାନ୍‌ ନୁ ନେଃସ୍‌ ମାନ୍ଦାନ୍‌ ପାପିଙ୍କ୍‌ ଅଣ୍ଡ୍‌ ଦୁଃକାମ୍‌ ପାଡ଼ିୟ୍‌ ଇଦ୍‌ତଣ୍ଡ୍‌ । ଇଦେକେ ବେକାର୍‌ ନୁ ଗାଲ୍‌ଦେ ପେର୍କେ ମିରାନଣ୍ଡ୍‌ ଲେକାମ୍‌ ।