12 ବେନ ନାରୁଣ୍ଡ୍ ପରିକ୍ଷାତାଗ୍ ଜିଡ଼ିତଣ୍ଡ୍, ଅଣ୍ଡ୍‌ ବାଗ୍ୟବାନ୍‍, ବାତେଙ୍କେଇତ୍କେ ପ୍ରବୁ ତାନ୍ ପ୍ରିୟ ନାରୁଡ଼୍‍କ୍ ବେନ୍ ଜିୱେତାଦ୍ ସହଜ୍‍ ଇଦାନଙ୍କ୍ ଗଟ୍ ଇତ୍‍ତନ୍, ପରିକ୍ଷା ଇତ୍‍ତେ ପେର୍‍କେ ଆ ନାରୁଡ଼୍ ଜିୱେତାଦ୍ ସାୟେ ପ୍ରେମତେ ସହଜ୍ ପାଏମ୍ ଆଦ୍‍ତନ୍ । 13 ବେନଙ୍କ୍ ପରିକ୍ଷା ଆତ୍‍କେ, ଅଣ୍ଡ୍‌ ଇଦ୍ ପରିକ୍ଷା ଇଶ୍ୱର୍‌ତାଗାଙ୍କ୍ ଆଦୁତ୍‍ତେ ଇଞ୍ଜ କେଲ୍‍ମାଟ୍, ବାତେଙ୍କ୍ଇତ୍କେ ଇଶ୍ୱର୍ କାରାପ୍‍ତାଗ୍ ପରିକ୍ଷା ଆୟ୍‍ୟଣ୍ଡ୍, ମେଣ୍ଡେ ଅଣ୍ଡ୍‌ ନିଜେ ବେନଙ୍କ୍ ପରିକ୍ଷା ମାଡ଼ଣ୍ଡ୍ । 14 ଇତ୍‍କେ ସାର୍‍ରେ ନାରୁଡ଼୍ ନିଜେତ୍ କାରାପ୍ ପାଡ଼୍‍ୟି ଆଲ୍‍ସି ନୁ କାରାପ୍ ଚିନ୍ତେ ମାଡ଼ି ପରିକ୍ଷା ଆଦ୍‍ତନ୍; 15 ତାନ୍ ପେର୍‍କେ କାରାପ୍ କାମ୍‍ତେ ଡଙ୍କେତ୍ ଆସ୍ ପାପତିଙ୍କ୍ ଜନମ୍ ମାଡ଼ିତ୍, ମେଣ୍ଡେ ପାପ୍ ସାରେ ପେର୍‍ସି ଡଲାନାଦିଙ୍କ୍ ଜନମ୍ ଇଦ୍‍ତେ ।