1 Korint 12

Anumzamofo naga’mota Jisasi avufagna huta mani’nona naneke

12 Anahukna huno vahe’mofona magoke avufa me’neanagi, ru avufgamo ru avufgamo rekanuhegeno, magoke vahera fore huno mani’ne. Kraisi’a anahukna hu’ne. 13 Na’ankure mago’amota Jiu vahe manunkeno, mago’amota Griki vahe mani’none. Mago’amota kazokzo eri’za vahe manunkeno, mago’amota amne vahe mani’none. Hianagi tagra magoke Avamupi tina freta, magoke avufafi mani’none. Ana higeta ana miko’mota magoke Avamupinti tazahu’zana e’nerune.

14 Hagi magoke tavufa me’neanagi, ru tavufa ru tavufamo rekanuhegeno magoke tavufa fore hu’ne. 15 Hagi agamo huno, nagra azana omani’noanki’na, mago avufa omani’noe haniana, e’i ana kema haniazamo’a, avufafintira azeri otregahie. 16 Hagi agesamo huno, nagra avurga omaninoanki’na, mago avufa omani’noe haniana, e’i ana kema haniazamo’a, avufafintira azeri otregahie. 17 Hianagi mika avufamo’ma avurgagema mesigeno’a, inafinti kea antahigahie? Hianagi mika avufamo agesage mesigeno’a, inafinti mna antahigahie? 18 Ana hu’negu tamage Anumzamo’a, magoke magoke tavufa eri mago huno ante’neankino, Anumzamo agra’a avesite mesie huno hire mete mete hu’ne. 19 Hu’neanagi mika avufamo magoke avufgage’ma measina, avufamo’a inankna huno mesine? 20 Ana hu’negu hakare avufgamo eme rekanuhegeno, magoke avufa fore huno me’ne. 21 Hagi avurgamo’a azamofonkura huno, kagrama nazama hu’zankura antahi nonkamue huno osugahie. Ana zanke huno asenimo’a agamofonkura huno, kagrama nazama huzankura, nagra antahi nogamue huno osugahie. 22 Hianagi mago’a tavufamokizmia hanavezmi omne’ne huta huna tavufamo’za, ra eri’za e’nerize. 23 Hagi tagrama knare osu’ne huta huna tavufamofona knare’za hunenteta, hagi tageze tavufe huta huna tavufamofona kukena huzmanteta refi’netone. 24 Knare’ma huno amate me’nea tavufamo’za mago’zankura atupara nosaze. Ana nehunanagi, Anumzamo’a ana miko tavufa eri magoke higeno, tavufamofona eri magoke huno knare osu tavufamo’za knare’za nehaze. 25 E’ina hanigeno avufamo’a atane’zana amu’nozmifina omanegahie. Hagi anahukna huno amu’no zamifina oza aza huno mani’za megahie. 26 Hagi mago kaziga avufamo ata hozama eri sigeno’a, mika’mo’za ana atazana erigahaze. Hagi mago kaziga’a avufamo ra agima erinkeno’a, ana miko avufamo’za muse hugahaze.

27 Menina tamagra Kraisi avufa mani’naze. Hagi magoke magoke’mota, mago avufga’a manite manite hu’naze.