1 Kin 10

Siba kumate kuini a’mo Solomoni kenaku e’nea naneke

1 Hagi Siba mopama kegava hu’nea kuini a’mo’ma Anumzamo’ma Solomonima azama higeno’ma knare’ma hiazamofo agenkema nentahino’a, amuhoma hu’nea agenoka kea antahigeno reheno ke’naku, Jerusalemi kumate e’ne. (Luk 11:31) 2 Hagi ana kuini a’mo’a eri’za vahe’arami hige’za aza hazageno mnanentake zantamine, rama’a goline, zago’amo marerirfa haveraminena, kemoli afu agumpi erinte’za Jerusalem kumate e’naze. Hagi ana kuini a’mo’a Solomoninte ehanatino maka antahintahi’afima me’nea nanekea eme asami’ne. 3 Hagi ana a’mo’ma agenoka’ma hirera Solomoni’a mago zana agateoreno ana maka eriama huno kenona hunte’ne. Hagi ana a’mofoma kenonama hunte’neana, mago zamo’e huno Solomonina amuhoa huonte’ne. 4 Hagi Siba kuini a’mo’ma Solomoni knare antahintahi zama keno antahi’no’ma nehuno, noma ki’nea noma negeno, 5 ne’zama nenaza trate’ma me’nea ne’zama negeno, eri’za vahe’ama eri’za kante’ma zamantege’za marerirfa kukenama hu’naza zana negeno, kinimofo waini tima tro hu eri’za vahe’ma negeno, tevefima kre fananehu ofama Ra Anumzamofo nompima nehiazama negeno’a, ke’a omne’ne. 6 Hagi anante ana a’mo’a kini nekura amanage hu’ne, Kagri kagenkene knare antahizanka’amofo agenkenema kuma’niregama mani’nena antahi’noana tamage! 7 Hianagi kuma’niregama mani’nena kagri kagenkema nentahi’na, havige hu’na hu’noane. Hagi menina nagra navufinti nege’na nagra nagesafinti antahue. Hagi antahintahi kamo’ene, knare’ma hunka hagenkama marerina zamofo kagenkema antahi’noa zana agatere’ne. 8 Hagi kagri vahe’mo’zane, eri’za vahe’kamozanema, maka knama kavugama mani’ne’za knare antahizanka’ama nentahiza muse hugahaze. 9 Hagi Ra Anumzana kagri Anumzamo’ma musema huganteno Israeli vahe' kini trate’ma kavrente’nea Anumzamo’a, ragi erigahie. Na’ankure Agra Israeli vahera zmavesinte vava nehuno, fatgo hunka refko nehunka fatgo kavukava hunka Israeli vahera kegava huzmanto huno kinia kazeri oti’ne.

10 Anage nehuno ana a’mo’a Solomonina kna’amo’a 4tani hu’nea goline, mnanetake zantmanine, zago’amo marerirfa haveraminena rama’a ami’ne. Hagi Siba kuini a’mo’ma erino’ma e’nea avamentera, mnanentake zantamina Solomonina mago’mo’e huno erino eme omi’ne. 11 Hagi Hiramu venteramimo’a Ofiri kumatetira goline, rama’a alamuk zafaramine, zago’amo mareri haveraminena erino e’ne. 12 Hagi kini ne’mo’a ana zafaraminuti Ra Anumzamofo mono none, agra nonena negino, hapue nehaza zavenama mago’a zavenane tro hu’ne. Hagi venteramimo’ma erino’ma e’neankna zafa mago’mo’e huno erinora ome’ne. 13 Hagi ana’ma higeno’a kini ne' Solomoni’a musezantamima amia agofetura Siba kuini a’mo’ma nazankuro antahigea zana amne ami’ne. Hagi ana’ma higeno’a Siba kuini a’mo’a eri’za vahe’ane ete mopa zimirega vu’naze. 14 Hagi Solomoni’a mago’mago kafufina kna’amo’a 23tani hu’nea goli eritere hu’ne. 15 Hagi zagore’ma fenoma netraza vaheteti’ene, Arabia kini vahetaminteti’ene, Israeli mopama refko hu’za kvama huterema hu’naza vahetaminteti takesi zagomo’a anampina eofre’ne. 16 Hagi Solomoni’a goli ruguta huno 200'a ranra hanko tro hu’ne. Hagi kna’amo’a 7 kilo naza hu’nea golireti mago’mago hankoa trohutere hu’ne. 17 Hagi ne’one hankoramina hamanteti golia ruguta huno 300'a tro hu’ne. Hagi kna’amo’a 2kilo hu’nea golireti mago’mago hankoa trohutere hu’ne. Ana huteno Lebanoni afuza zafema huno kinte’nea nompi ana zantamina ante’ne. 18 Ana nehuno kini ne’mo’a kini tra’a razankrerfa trohuteno, elefantimofo zaza aveteti (ivory) ana trara avasesea hunteteno, knare zantfa hu’nea golireti erino vazinte’ne. 19 Hagi ana kini trate’ma agama reno mareri trara 6si’a ahenteno mrenerino, ana tra’mofo amefiga’a golireti amagenama ante’zana eri fagigi nenteno, bulimakao anenta afu’mofo agenopa tro hunenteno, azama ante harage’ma hu zafa ana tratera ahenenteno, tare laioni amema’a tro huno ana tra’mofona kantigama retrurente’ne. 20 Ana nehuno 6'a tra’ma ahenoma marerinerera, kantigama mago’mago Laionimofo amema’a tro huno antetere huno mareri’geno ana makara 12fu’a laioni amema’a me’ne. Hagi e’inahu kini trara mago kini ne’mo’e huno ama mopafina trora osu’ne. 21 Hagi maka Solomoni’ma tima nenea kapuramine Lebanoni afuza zafe huno’ma noma’agu’ma agima antemi’nea nompima me’nea zuomparamina goliretike tro hu’ne. Hagi Silvaretira trora osu’naze. Na’ankure Solomoni knafina silvamofo kna’amo’a evurami’ne. 22 Hagi kini ne’mo’a rama’a vente ante’negeno, Hiramu venteramine hagerimpina vano hu’ne. Hagi 3'a kafufina magoke knazupa ana venteramimo’a elefanti afumofo zaza ave’ma (ivory) golima silvama, monkima ranra namaraminena avre’za etere hu’naze. 23 Ana higeno ama mopafi kini vahe’mokizmia, kini ne' Solomoni’a feno zampine knare antahintahifina zamagatere’ne. 24 Hagi maka kokankoka vahe’mo’za Solomoninte e’za Anumzamo’ma amia knare antahintahia eme antahi’naze. 25 Hagi kafune kafunena mago’mago vahe’mo’zama Solomonima agenaku’ma aza vahe’mo’za silvane, goline, kukenane, ha' zantamine, mere nehaza mnanentake pauranena eme nemiza, hosi afutamine, miulie nehaza donki afutaminena avre’za musezana eme ami’naze. 26 Hagi Solomoni’a ha’ma hu’zantamina 1tausen 4 hantreti’a karisirami eri tru nehuno, 12 tauseni’a hosi afutami eritru hu’ne. Hagi karisima ante kumatmima tro’ma huntenefine, Jerusalemi kumapinena, ana zantamina zamante’ne. 27 Hagi kini ne’mo’a rama’a silva eritru higeno havemo’ma hiaza huno Jerusalemi kumapina amne zankna nehigeno, rama’a sida zafa eritru higeno, sikamo zafamo’ma Juda neone agonafima hiaza huno amne zankna hu’ne. 28 Hagi Solomoni’a hosi afutamina Isipiti’ene Kue kumateti’ene mizase’ne. Hagi Kue kumateti’ma hosi afu’tamima mizanesaza zago avamenteti, Solomoni eri’za vahe’mo’za hosi afutamina Kue kumatetira mizana hu’naze. 29 Hagi ana knafina Isipitira mago’mago karisiramina 600'a silva zagoreti (6.8 kilo) mi’za nese’za, mago’mago hosi afu’tmina 150'a silva zagoreti (1.7 kilo) mizasetere hu’naze. Hagi Hiti kini vahetaminte’ene, Siria kini vahe’mokizmire’ene ana zantamina zagorera atre’naze.