1 Samuel 5

Filistia vahepima huhagerafi huvempage vogisima umane’nea zamofo naneke

1 Hagi Filistia vahe’mo’za Anumzamofo huhagerafi huvempage vogisia ha’ma hu’za Ebeneza kumatetima erite’za, eri’za vu’za Asdoti kumate uhanati’naze. 2 Anama hute’za Filistia vahe’mo’za Anumzamofo huhagerafi huvempage vogisia eri’za havi anumzazimimofo Dagoni mono nompi mareri’za, ana havi anumzazamimofo asoparega tava’oma’are ome ante’naze. 3 Hagi Asdoti kumate vahe’mo’za nanterama oti’za eme kazana Dagoni havi anumzamo’a mopafi traka huno avugati Ra Anumzamofo huhagerafi huvempage vogisimofo avuga mase’nege’za eme ke’za antri nehu’za, ete eri’za noma’are ome retrurente’naze. 4 Hianagi ete’za anante nanterama oti’za eme kazana ete mago’ane Dagoni havi anumzamo’a traka huno Ra Anumzamofo huhagerafi huvempage vogisimofo avuga avugosaregati mase’nege’za ke’naze. Hagi ana Dagoni havi anumzamofo aseni’ane azantremokea ruhantagike kahantrate me’nazageno avufga’amoke me’ne. 5 E’ina agafare meninena Dagoni havi anumzamofo pristi vahe’mo’zane amane vahe’mo’zama ana Dagoni havi anumzamofo mono no kafante’ma unefre’za, ana kaha tratera zamaga ore’za takauneraze.

6 Hagi Asdotima mani’naza vahe’ene, tva’ozamire’ma me’nea kumatamimpi vahe’enena Ra Anumzamo’a azana rusuteno usgenkna namunteti zamazeri haviza hu’ne. 7 Hagi anazama fore’ma hiazama Asdoti vene’nemo’za nege’za amanage hu’naze, Israeli vahe Anumzamofo huhagerafi huvempage vogisia tagranena omanenianki, erita ome atresune. Na’ankure Agra azana rusuteno hara huneranteno, Dagoni havi anumzantinena hara hunente. 8 Hagi Filistia mopafima mika 5fu’a kuma’ma kvama hu’naza vahezaga ke hutru hu’za amanage hu’naze, ama Israeli vahe Anumzamofo huhagerafi huvempage vogisia na’a hugahune? Hazageno ana ranra kva vahetamimo’za kenona hu’za, Israeli vahe Anumzamofo huhagerafi huvempage vogisia Gati kumate erita viho, hazage’za Israeli vahe Anumzamofo huhagerafi huvempage vogisia eri’za Gati kumate vu’naze. 9 Hianagi ana huhagerafi huvempage vogisima eri’za Gati kumate’ma vazageno’a, ana kumapi vahera ositeti’ma vuno ra vahete’ma vu’neana Ra Anumzamo’a azana rusuteno usagenkna ranra namunteti zamazeri haviza nehige’za tusi zamagogogu hu’naze. 10 Ana hige’za ana huhagerafi huvempage vogisia huzmantazage’za eri’za rankumate Ekroni vu’naze. Hianagi Ekroni vahe’mo’za rankege hu’za amanage hu’naze, Israeli vahe Ra Anumzamo’a vahetia zamahe friku higeta ama huhagerafi huvempage vogisia erita neaze. 11 Hagi miko Filistia ranra kva vahetamina ete ke hutru hu’za amanage hu’za zamasami’naze, amafintira Israeli vahe Anumzamofo huhagerafi huvempage vogisia huzmantenke’za eri’za kuma’arega ometreho. Ana’ma osanazana tagri vahe’mo’za rama’a frigahaze. Na’ankure Ra Anumzamo’a azana rusuteno hara hunezmantege’za, ana kumapi vahe’mo’za fri’zankura tusi koro hu’naze. 12 Hagi zamahema ofri’nea vahera usagenkna namunteti zamazeri haviza hige’za zamaza huzankura krafage hazageno anagamu monarega mareri’ne.