1 Samuel 7

1 E’ina hige’za Kiriat Jearimi vene’nemo’za ana huhagerafi huvempage vogisia eme eri’za kuma’zamirega vu’za, Aminadapu noma agonare me’nere ome ante’naze. Ana nehu’za ana ne’mofo nemofo Elisana pristi azeri otizageno pristia manino kegava hu’ne. 2 Hagi 20'a kafunaza za’zate huhagerafi huvempage vogisimo’a Kiriat Jearimia me’negeno, Israeli vahe’mo’za Ra Anumzamo’a tatre’ne hu’za krafagea hu’naze.

Samueli Israeli vahe kegava huzmante’nea zamofo naneke

3 Hagi Samueli’a miko Israeli vahekura amanage hu’ne, Tamagrama Ra Anumzamofonte’ma tamagu’areti huta tamagu’ama rukrahe’ma nehuta, miko ru anumzantamine Astaroti havi anumzamofo amema’ama amu’nontamifima me’neana eri netreta Agriteke’ma mono’ma huntesageno’a, Agra Filistia vahe zamazampintira tamaza huno tamavregahie. 4 Hige’za Israeli vahe’mo’za Bali havi anumzane Astaroti havi anumzana amu’nozamifintira erinetre’za Ra Anumzanke monora hunte’naze.

5 Hagi Samueli’a Israeli vahera amanage huno zamasami’ne, Mika’mota Mispa omeri atru hinke’na tamagri tamagi eri’na Ra Anumzamofontega nunamuna ha’neno. 6 Hagi Mispama emetru hute’za, tinkerifinti tina ome afi’za Ra Anumzamofo avuga eme tagi’naze. Hagi ana knazupa ne’zana a’o nehu’za, nunamuna hu’za kumi’ma hu’naza zanku huama hu’za zamasunku nehu’za amanage hu’naze, tagra Ra Anumzamofontera kumi hu’none. Hagi Samueli’a Mispa mani’neno Israeli vahera keaga refko huzmante kva vahera mani’ne.

7 Hagi Israeli vahe’mo’za Mispama emeri atru nehaze kema Filistia kva vahe’mo’zama nentahi’za, Israeli vahe ha' huzamantenaku sondia vahera zamavare’za e’naze. Hagi ana nanekema Israeli vahe’mo’zama nentahi’za, tusi koro nehu’za zamagogogu hu’naze. 8 Hagi Israeli vahe’mo’za Samuelina asami’za, ontaganenka Ra Anumzana tagri Anumzamofontega mago’ene hanavetinka nunamuna nehugeno, Filistia vahe zamazampintira tagu’vazino. 9 Anage hazageno Samueli’a mago ami’nenea anenta sipisipi aheno Ra Anumzamofonte maka kresramana nevuno, Israeli vahe’mokizmi zamagi erino hanavetino nunamuna higeno, Ra Anumzamo’a antahimi’ne. 10 Hagi ana’ma huno kresramana nevige’za, Filistia vahe’mo’za Israeli vahera ha' huzamante’naku e’naze. Hianagi ana zupa Ra Anumzamo’a monagemo hiaza huno kea nehige’za Filistia vahe’mo’za savri nehu’za na’a fore nehie hu’za neginagi nehazageno, Israeli vahe’mo’za hara huzamagatere’naze. 11 Hagi Israeli vahe’mo’za Filistia vahera zamorotago hu’za Mispa atre’za Bet-kar kumapi nevu’za Filistia sondia vahetamina zamazeri’za zamahe fri’naze.

12 Hagi Samueli’a Mispa kuma’ene Seni kuma’mofo amu’nozanifi have erino asenenteno amanage hu’ne, Amarera Ra Anumzamo taza hu’nerere, nehuno Ebenize huno agi’a antemi’ne. 13 Hagi Filistia vahe’mo’za mago’ane Israeli vahera hara eme huozamante’naze. Hagi Samueli’ma kvama mani’nea knafina, Ra Anumzamo’a azana rusuteno Israeli vahera zamaza huno Filistia vahera hara huzamante’ne. 14 Hagi Israeli vahe kumatamina, Ekroniti vuno Gatima ome atre’nea kumatamima Filistia vahe’mo’zama ko’ma zamahe’za hanare’za eri’nazana, ete Israeli vahe’mo’za eri’naze. Ana hazageno Israeli vahe’mo’za Amori vahe’enena hara osu fru hu’za mani’naze. 15 Hagi Samueli’ma mani’nea knafina Israeli vahetera kva mani’neno, keaga refko nehuno kegava huzmanteno ne-eno efri’ne. 16 Hagi kafure kafurera Samueli’a Betelima, Gilkalima, Mispa kumatamimpi kagino vano nehuno, vahe’mokizmi kea antahino refako huzmantetere hu’ne. 17 Hagi ete kuma’aregama Ramama nevuno’a, anazanke huno vahe’mofo keaga refako hu’ne. Hagi Rama kumate Ra Anumzamofo kresamana vu ita tro hunte’ne.