1 Timóteo 3

Mono nonte kva hanaza vahe’ene Dikeni vahe’mofo naneke

1 Hagi ama’i tamage naneke, iza’o mono kva manigahue hanimo’a, knare eri’zane huno erino. 2 Kvama hania ne’mo’a amanahu hino, hazenke’a omneno, magoke a' anteno, mani’zama’a kva nehuno, fatgo zanke nehuno, avufa antermino nemanino, nantu antentesia vahe agampu nehuno, agra knare’za rempi huzmi ne' nemanino, 3 hanave rina neno negi oneno, hafra osuno, hagi arimpa fru nehuno, ke hakare osuno, zagogu avesinte’zana atreno. 4 Agra knare huno naga’a kva nehuno, mofavre zaga’a zamazeri fatgo hanige’za, knare kante maniho. 5 Hu’neanagi naga’a kvagri so’e nosnimo’a, ina kna huno Anumzamofo mono' nona kegava hugahie? 6 Menima agu’a rukrahe hu’nesnia nera, mono kva ne' manisnie hunka ame’ama hunka azeri o’otio. Agra avufa erisaga nehnigeno Sata’a ana hanifi efreno azeri traka hugahie. 7 Hagi monopi omani megi’a vahe’mo’za nege’za, knare nere nehanageno, agra havi avu’avapina uramino Sata krifufina ohegahie.