2 Reis 5

Elisa’ma Nemani fugonkri azeri so’ema hu’nea naneke

1 Hanki Nemani’a agra Siria sondia vahete kva ne' mani’ne. Ana hu’neno agri kva ne’amofo avurera knare ne' mani’negeno kva ne’amo’a muse hunentea ne' mani’ne. Na’ankure Ra Anumzamo’a agrira aza hige’za Siria vahe’mo’za ha' vahe’zmia hara huzmagatere’nagu anara hu’ne. Nemani’a hanave sondia netfa mani’neanagi, agrira fugo namumo azeri haviza hu’ne.

2 Hanki mago kna Siria sondia vahe’mo’za Israeli vahera rohu ome renezmante’za, anampinti mago osi mofara avre’za vu’naze. Ana hazageno ana mofa’mo’a Nemani a’mofo eri’za mofa umani’ne. 3 Henka ana mofa’mo’a Nemani nenarona amanage huno asmi’ne, Sameriama mani’nea kasnampa ne’ma negave’ma vuno ome kesiana, amne fugo kri’a azeri so’e hugahie. 4 Anankema Nemani’ma nentahino’a, kva ne’are vuno, ana Israeli mofa’mo’ma hiankea ome asmi’ne. 5 Higeno kini ne’mo’a ame huno Nemanina asmino, Israeli kini netega nagra mago avo krenta’nena erinka vunka ome amigahane, nehuno kema hiaza higeno ana avona enerino kna’amo’a 340 kilo hu’nea silva zagone enerino, kna’amo’a 60 kilo hu’nea goli enerino, knare’nare kukena 10ni’a e’nerino vu’ne.

6 Hanki ana Israeli kini netegama krente’nea avona amanahu avo krente’ne. Nagra eri’za vaheni’a Nemanina ama avona kre’na huntogeno kagritega vianki, fugo kri’a azeri so’e hunto. 7 Hanki anante Israeli kini ne’mo’ma ana avoma hampriteno’a, zaza kukena’a tagato nehuno amanage hu’ne, Nagra Anumza mani’ne’na vahera ahe nefri’na, vahera fripintira azeri oti’naku hugeno hio. Ama ne’mo’a fugo krima eri’nea nera azeri so’e huogura huntegeno ome’neanki, nagrama antahuana ha' eme hurante’naku mago’a kankamunku hakeno anara hu’ne. 8 Hianagi Ra Anumzamofo kasnampa ne' Elisa’ma antahiama Israeli kini ne’mo’ma za’za kukena’ama tagato’ma hiankema nentahino’a, kato ne’a huntegeno vuno amanage hu’ne, Na’ane hunka za’za kukenaka’a tagatora hu’nane? Hagi ana nera atregeno nagrite ena Israelia mago kasnampa nera mani’ne hu’na averira hanena keno antahino hugahie. 9 Higeno Nemani’a hosi afutamine, karisiramima’ane vuno, Elisa nomofo kafante umani’naze 10 Anante Elisa’a mago kato vahe hunteno, Nemanina amanage hunka ome asamio, kagra vunka 7ni’a zupa Jodani timpi tina ome fregeno, kavufamo’a so’e hina agru hugahane huno hie hunka ome asamio. 11 Hianagi Nemanina tusi arimpahegeno nevuno amanage hu’ne, Nagrama antahuana atiramino eme otine’no, Ra Anumzana agri Anumzamofo agi neheno, azana rusuteno veraveverave nehuno fugonkrini’a nazeri so’e hugahie hu’na huanagi anara osie. 12 Hanki Damaskasia tare tintrena Abana tine Farpari timokea ana maka Israelima me’nea tintamina zamagaterena’e. Ana hu’neanki’na anampi tina fre’na so’ea hugare, nehuno tusi arimpa nehegeno rukrahe huno atreno vu’ne. 13 Hianagi Nemanina eri’za vahe’amo’za eza amanage hu’za asmi’naze, kva ne’moka kasnampa ne’mo’ma mago’ma amuhoma hu’nea zama tro huo huno’ma hiresina, amne ana zana tro hasine. Hu’negu agrama hiaza hunka vunka tina ome fregeno fugo namumo’a atregantena agru huo. 14 Higeno Nemani’a ana vaheke antahiteno vuno, Jodani timpi 7ni’a zupa tina ome fre’ne. Ra Anumzamofo kasnampa ne' Elisa’ma hu’nea kante anteno tina fregeno fugo kri’amo’a atrentegeno, avufgamo’a osi mofavremofo avufgamo’ma hiaza huno agrunentake hu’ne.