2 Reis 6

Sa’ume timpi rugatitre’naza ete Elisama eri’nea zamofo naneke

1 Mago zupa kasnampa naga’moza Elisanku amanage hu’naze, Tagrama eta kagranema eme atru huta nemanuna nomo’a osi hu’negeta titipa nehune. 2 Hagi kagra amne tatresanketa Jodani tintega vuta tamente tamente zafa ome antagitere huta, eme atruma huta manisuna nona kasefa kigahumpi? Hazageno Elisa’a kenona huno, Knareki kema hazaza huta viho. 3 Anante mago kasnampa ne’mo’a Elisana amanage huno antahige’ne, Muse hugantoanki tagranena amne egahampi? Higeno Elisa’a huno, Izo amane tamagranena vugahue. 4 Anagema huteno’a Elisa’a zamagrane vige’za, Jodani tinte’ma vute’za, agafa hu’za zafaramina antagi’naze. 5 Hianagi kasnampa vahe’pinti mago’zamimo’a zafa nentagigeno sa’ume’amo’a katiramino Jodani timpi fre’ne. Ana higeno kezatino, Oho, kva vahe’nimoka, vahe sau’me zamantahige’na eri’na e’noa saumemo katiramino timpi fre’ne. 6 Hanki anante Ra Anumzamofo eri’za ne' Elisa’a amanage hu’ne, Inante saumemo’a ufre’ne, higeno ufre’neama’a asami ankeretegeno, Elisa’a osi zafa azanku’na rukafrino anama ufrenere atregeno ana sasumemo’a timofo avozare mareri’ne. 7 Anama higeno’a Elisa’a huno, Hanki erio, huno higeno ana kasnampa ne’mo’a azana ante henkamuteno ana sa’umena eri’ne.

Elisa’a nunamu higeno Siria sondia vahe zamavumo asuhu’nea naneke

8 Hanki knane knanena Siria kini ne’mo’ma Israeli vahe’ma ha’ma eme huzamanteku’ma nehuno’a, e’ire e’ire seli nonkumara ome anteta mani’neta Israeli vahera hara huzmantegahune huno sondia vahete kva vahe’age zamavaretru huno kea anaki’ne. 9 Hianagi Ra Anumzamofo eri’za ne' Elisa’a Israeli kini netega anage huno kea atrente’ne, Siria vahe’mo’za hahuranteku seli nonkuma eme antazanki kva hu’nenka e’irega ovuo huno asamitere hu’ne. 10 Anagema higeno’a, Israeli kini ne’mo’a sondia vahe’a huzmantege’za vu’za Elisa’ma zamasamirera ome kva hutere hu’naze. Rama’a zupa ana hutere hu’naze.

11 Anama nehazageno’a, Siria kini ne’mofona tusi rimpahe’ne. Ana higeno Siria kini ne’mo’a, sondia vahete ugagota kva vahera kehige’za azageno amanage huno zamantahige’ne, ina ne’mo Israeli kini netega anteno, tagrama huna kea ome nesamifi nasamiho? 12 Higeno mago eri’za vahe’amo’a asmino, a’o tagra ome nosamunanki Israelima mani’nea kasnampa ne' Elisa agra Israeli kini nera nesamiankino, nemsampinkama oku’ama hana nanekenena nentahino agra nesamie. 13 Anagema higeno’a, kini ne’mo’a eri’za vahe’a zamasamino, inantega Elisa’a mani’nefi ome haketa ketenke’na sondia vahe huzmanta’nena vu’za ome avre’za amare eho. Hige’za vu’za ome hake’za kefore hute’za e’za anage hu’naze, Agra Dotani kumate mani’ne. 14 Higeno kini ne’mo’a tusi sondia vahe krerafane, hosi afutamine, karisiramine zamatrege’za kenage Dotani vu’za ana rankumara kafo ome ante’za avazagi kagi’naze.

15 Hanki Anumzamofo eri’za ne' Elisa kato ne’mo’a nanterana atiramino keana, Siria sondia vahe’mo’za karisine, hosi afu’zmine emani’ne’za ana kumara avazigaginte’nageno zamage’ne. Ana huteno otino anage hu’ne, Oho kva vahe’nimoka, Siria vahe’mo’za tavazagi kagi’nazanki, tagra na’a hugahune? 16 Higeno Elisa’a amanage huno asami’ne, Kagra korora osuo. Na’ankure tagri kazigama mani’namo’za zamagrira zamagatere’za rama’a mani’naze. 17 Anante Elisa’a nunamuna amanage huno hu’ne, Ra Anumzamoka muse hugantoanki avua erihari hugeno keno, higeno Ra Anumzamo’a avua erihari higeno keana, mani’nampi me’nea agonaramimpina tusi’a hosi afutamimo’ene, tevenefake karisiramimo Elisana megaginte’negeno ke’ne. 18 Hagi anante Siria sondia vahe’mo’za agrama mani’neregama erami tava’oma nehazageno’a, Elisa’a amanage huno Ra Anumzamofontega nunamuna hu’ne, Ra Anumzamoka ama sondia vahe’mokizmia zamavua erisu huo, huno higeno Elisa’ma hia kante, Ra Anumzamo’a sondia vahe’mokizmi zamavua erisu hu’ne. 19 Higeno Elisa’a amanage huno ana sondia vahe’mokizmia zamasami’ne, Kana hazagreta ru kumate e’naze. Hu’negu namage navaririta enke’na anama kenaku’ma aza ne’mofonte tamavre’na va’neno. Anage hige’za Elisana amage vazageno zamavareno Sameria rankumate vu’ne.

20 Hagi anama Sameria rankumapima ufretazageno’a, Elisa’a amanage hu’ne, Ra Anumzamoka ama sondia vahe’mokizmi zamavua erihari huge’za ete keho. Higeno Ra Anumzamo’a zamavua ete erihari hige’za kazana zamagra Sameria kumamofo amu’nompi mani’naze. 21 Anama hazazama Israeli kini ne’mo’ma negeno’a, Elisana amanage huno asami’ne, Nenfaga hu i’zo huge’na ama vahera zamahe fri’neno? 22 Higeno Elisa’a kenona’a amanage hu’ne, kagra ozamahegahane. Na’ankure kazinuti’ene atireti’ma ha’ma hunka zamavrana vahera, zamahe nofrine. E’ina hu’negu ne’zane tine nezaminka zamatrege’za kinizmima mani’nerega ete viho. 23 Higeno Israeli kini ne’mo’a tusi’a ne’za ana sondia vahera krezmantage’za, ana ne’zane tinena nevagama retazageno, huzmantege’za ete kini zamimo’ma Siriama mani’nerege vu’naze. Ana hige’za Siria sondia vahe’mo’za mago’enena e’za Israeli vahera rohura eme ozami’naze.

Sameria kumapi tusi’a zamagatonto kna fore hu’nea naneke

24 Hanki henka, mago’a kafua evutegeno, Siria kini ne' Ben-Hadati’a maka sondia vahe’a zamazeri tru hutege’za, vu’za Sameria kumara ha' huzamantenaku ome kafonte’za avazagigagi’naze. 25 Hagi za’za kna Siria vahe’mo’za Sameria kumara kafo ante’za avazagigagi zamantazage’za, vu’za e’za hu’za ne’zama eri’za nekana omanegeno, Sameria kumapina tusi’a zamagatontoza fore hu’ne. Higeno mago vahe’mo’ma tonki afu’mofo aseni’ama mizama hu’naku’ma hu’neana, kna’amo’a 0.9kilo hu’nea silva zagoreti miza nehu’za, namamofo rifa’a kna’amo’ma 63gremi hu’neana, kna’amo’a 57gremi hu’nea silva zagoreti mizase avamente vu’ne. 26 Ana’ma higeno mago zupa Israeli kini ne’mo’a have keginamofo agofetu enevigeno mago a’mo’a kezatino, kini’nimoka muse hugantoanki, naza huo. 27 Anage higeno kini ne’mo’a amanage huno asmi’ne, Ra Anumzamo’ma kazama nosanige’na, nagra nankna hu’na kaza hugahue? Kagrama antahinana witima neharaza kumapinti witia eri kamige, wainima regatatima nehaza kumapintira wainia eri’na kaza hugahuo? A’o anara osugahue. 28 Anante ana kini ne’mo’a ana ara antahigeno, Nagra na’a hugante’nuegu nehane? Higeno ana a’mo’a kini nera asmino, Ama a’mo’a nagriku huno, ne’mofavreka’a menina ahegeta neteta, okina nagra ne’mofavreni’a ahesugeta negahu’e hu’ne. 29 Hige’na nagra mofavre’ni’a ahogeta kavofi kreta neteta, anante knazupa agri nonte vu’na, kagra mofavre’ka’a ahegeta na’mneno hu’na huana, agra mofavre’a azeri fraki’ne. 30 Higeno ana a’mofo kema kini ne’mo’ma nentahino’a, avatera asunku kukena hu’neno, amegama antani’nea kini zaza kukena’a tagato tugutu nehuno, ana have keginamofo agofetu nevige’za, ke’naze. 31 Anante kini ne’mo’a amanage hu’ne, Amama e’neruna knazamofo agafa’a Elisa mani’ne. E’ina hu’negu nagra menina Sarafati kumateti ne' Elisana ananke akafrigahue. Ana’ma osanugeno’a, Anumzamo’a ama ana knare okina nagrira nazeri havizantfa hugahie. 32 Hagi kini ne’mo’ma anagema huteno’a, mago eri’za vahe huntegeno Elisa’ma mani’nerega vu’ne. Hanki ana zupa Elisa’a noma’afi Israeli ranra kva vahe’ene atru hu’za mago’a zanku keaga nehu’za mani’nazageno, kini ne’mo’ma huntegeno ugota huno vu’nea eri’za nera uohanati’negeno, Elisa’a ana ranra kva vahetamina amanage huno zamasami’ne, Vahe’ma zamahe fri kini ne’mofo mofavremo’a, nagri nananke akafrinogu mago vahe huntegeno ne-e. Hianagi ana ne’ma esanigeta, kafa erigita rentrako hinkeno, nompina emareorino. Anama hanageno’a, kini ne’mo’a agra’a ana nera avaririno egahie. 33 Hagi Elisa’a ana keaga huvaga orenegeno, kini ne’mofo kema erino vuno e’noma hu eri’za ne’mo’a agrite eramino e’ne. Hagi anante kini ne’mo’enena eno amanage hu’ne, Ra Anumzamo’a ama knazana atregeno tagritera efore nehie. Ana nehigu mago knare’zana Ra Anumzamo’a tagrira taza osugahiankina agrira mago’enena avegante’na omanigahue.