2 Samuel 15

Absalomu’a kini maninaku hu’nea naneke

1 Hagi mago’a kna evutegeno Absalomu’a mago karisine hosi afu’ene nevreno, vugotama hunte’za kegavama hu’za vu vahera 50'a mizasezmanteno huzamantege’za vugota hu’naze. 2 Hagi mika zupa nanterame otino rankumapi ufre’nea kante umani’neno, kini ne’mo’ma knaza zamima eri fatgo huzmantenigu’ma vaza vahera, Absalomu’a zamantahigeno, Tamagra ina kumapinti vahere huno zamantahigege’za, tagra Israeli nagapinti vahere hazageno’a, 3 ana kema antahiteno’a Absalomu’a amanage hu’ne, Keho knazantamia amne eri fatgo hugahianagi, kini ne’mo’a kema refko’ma hu' eri’zana mago vahera omi’neankino, ketamia refko osugahie. 4 Hagi Absalomu’a huno, Nagrama ke refko hu kva vahe manisuge’za, vahe’mo’za knaza zamia eri’za nagrite esage’na fatgo hu’na kezamia refko hugahue. 5 Hagi mago’a vahe’ma enevu’za eme kepri’ma humiza nehazageno’a, Absalomu’a zamazante zamavazu hugantiteno zamantako huzmante’ne. 6 Hagi Absolomu’a e’inahu avu’ava’ma hia zamo mika Israeli vahe zamagu’a avazuhu agrarega zmante’ne.

7 Hagi 4'a kafu evutegeno Absalomu’a kini nera asamino, natrege’na Hebroni vu’na huvempama hu’nore Ra Anumzamofontega ome ofa huntaneno. 8 Na’ankure Aramia kaziga Geshuri’ma mani’ne’na huvempa hu’na Ra Anumzamo’ma natrenige’na ete Jerusalemi kumate’ma vanu’na, Hebroni kumate monora ome huntegahue hu’na hu’noe. 9 Hagi kini ne’mo’a kenona huno, Kagra krimpa frune vunka, huvempama hu’nana kemofona omeri knare huo, higeno Absalomu’a Hebroni vu’ne. 10 Hianagi anantega umani’neno, Absalomu’a kema erino vuno eno hu vahera huzamanteno anage hu’ne, Maka Israeli vahetamima mani’nazarega vuta amanage ome hiho, ufema resageta mikomota kezanke huta, Absalomu’a kinia Hebroni kumate efore hu’ne huta hiho. 11 Hagi agra 200'a vahe Israelitira nezamavareno vu’neanagi, na’ante zamavareno vu’ne zamagra ke’za antahiza osu’naze. 12 Hagi Absalomu’a ofama nehuno’a mago’a vahe huzamantege’za Gilo kumateti ne' Ahitofelina ome avre’za e’naze. Hagi Ahitofeli’a Devitima knare antahizama nemiza vahepinti mago zami’mo’e. Hagi Absalomu kazigama vaza vahe’mo’za rama’a hu’naze.

Deviti’a Jerusalemi kuma atreno fre’nea naneke

13 Hagi kema eri’za vu vahe’mo’za e’za kini ne' Devitina eme asami’za, Rama’a vahe’mo’za Absalomuna avariri’za kini azeri oti’za nehaze. 14 Hazageno Deviti’a agranema Jerusalemi mani’naza eri’za vahera zamazeri atru huno anage huno zamasmi’ne, Ru Absalomu’a mika tamagri’ene nagri’ene tahe vagaresigi ame huta Jerusalemi kumara atreta fresune. Hagi anama osanunkeno’a ame hu’za Absalomu naga’mo’za eza eme nerahe’za, ama kumapi vahe’enena zamahe vagaregahaze. 15 Hagi kini nemofo eri’za vahe’mo’za hu’za, kini ne’mokama hana kea erizafa hugahune. 16 Hige’za kini ne’ene eri’za vahe’amo’za atre’za vu’naze. Hagi kini ne’mo’a 10ni’a henka ane’a zaga’a huzamantege’za kuma’a kegava hu’za mani’naze.

17 Hagi kini ne’ene mika Jerusalemi kuma’ma atre’za atirami’za nehu’za, ana kumamofo refarega mago no me’nere umani’naze. 18 Hagi anante kini ne’mo’a ome oti’nege’za, naga’amo’za vugota hazageno, mika Kereti vahe’ma, Paleti kumateti vahe’ma, Getiti’ma Deviti’enema e’naza 600'a vahe’mo’zanena agatere’za vu’naze. 19 Hagi kini ne’mo Geti vahe’mokizmi kva ne' Itaina asamino, nahigeta tamagra tagranena neaze? Rurega vahe tagrane emani’nazanki, ete vuta kasefa kini ne' Absalomu’ene umaniho. 20 Hagi tamagra kofa’a knafi tagranena emani’nazanki, tagrane vu’za nehazo? Hagi sondia vaheka’a nezamavarenka ete viho. Na’ankure tagra iga vugahune ontahi’none. Hagi Ra Anumzamo’a knare huno asunku huneramanteno fatgo avu’ava huramanteno kegava huramantesie. 21 Hianagi Itai’a kenona huno, Kini ne' ranimoka kasefa huno mani’nea Ra Anumzamofo agifi tamage hu’na huanki, kagrama kasefa hunka mani’nenka inantegama vananana kagrane nevanunkeno, kagri’ma kahe frisuza tagri’enena tahe frigahaze. 22 Hagi Deviti’a Itaianku huno, Knareki eviho, hige’za sondia vahe’ane mika a’mofavre zamine vu’naze. 23 Hagi Deviti’ene naga’anema nevage’za, maka Jerusalemi vahe’mo’za tusi zavi atezmante’naze. Hagi kini ne’mo’a Kitroni krahopi nevige’za, maka vahe’mo’za hagege ka’ma kokampima vu’nea kantega vu’naze.

24 Hagi Zadoku’ene agranema mani’naza Livae naga’mo’za Anumzamofo huhagerafi huvempage vogisia eri’za eme antageno, Abiata’a ofa nehige’za, miko vahe’mo’za rankumara atre’za vu vagare’naze. 25 Hagi Deviti’a Jadokina asamino, Ra Anumzamofo huhagerafi huvempage vogisia ete erinka rankuma agu’a ufro. Hagi Ra Anumzamo’ma arimpa fruma hunantesuno’a, Agra natrenige’na ete e’na huhagerafi huvempage vogisia eme nege’na, seli mono nonena eme kegahue. 26 Hagi Ra Anumzamo’ma musema huonantesuno’a, Agri’ma avesi’niaza hunantesie. 27 Hagi Deviti’a pristi ne' Zadokina asamino, Amanahu antahintahi reraro hue, kagra kasnampa ne' mani’nanku kagrane ne' mofavreka’a Ahimane, Abiata nemofo Jonataninena zamavarenka tamarimpa frune rankuma agu’afi ete ufreho. 28 Hagi nagra hagege kopi vu’na tima taka nehare ome tamavega ante’na mani’negahuanki, Jerusalemima fore’ma hania zamofo nanekea atrenantenke’za, anantega eme nasamiho. 29 Higeno Zadoki’ene Abiatakea Ra Anumzamofo huhagerafi huvempage vogisie erike, ete Jerusalemi rankumapi ufre’ne umani’na’e.

30 Hianagi Deviti’a tusi zavi neteno Olivi agonare mareri’ne. Hagi agra zamasunku’ma nehu’za nehazaza huno, asenirera refineteno agia nona ovazi aga avapa vu’ne. Hagi agranema vu’naza vahe’mo’za ana zanke hu’za zamasenirera refi’nete’za zavi ateme agona mareri’naze.

31 Hagi mago’a vahe’mo’za Devitina eme asami’za, Ahitofeli’a Absolamuntega ante, hu’za hazageno Deviti’a Ra Anumzamofonte nunamu huno, Ra Anumzamoka Ahitofelina azeri havia hugeno, neginagi antahintahi Absalomuna amino.

32 Hagi vu’zama agonafima mono’ma nehazare uhanati’zageno’a, Devitina nefu Akaiati ne' Husai’a zamasunku avu’ava’ma nehazaza huno kukena’a tagato nehu’na, kugusopa kateno anumpi nefreno, anante eme tutagiha hunte’ne. 33 Hagi anante Deviti’a asamino, Kagrama nagranema vananana kna namigahane. 34 Hianagi ete rankumapi vunka Absalomuna ome asmio, kini ne’moka negafa eri’za vahe korapara mani’noanki’na menina kagri eri’za vahe manigahue hunka ome nehunka, antahintahia amigeno Ahitofeli antahintahia eri atregahie. 35 Hagi pristi netre Zadoki’ene Abiatakea kagrane Jerusalemi manigaha’e. Hagi kini ne' nompima nanekema retro’ma hanaza nanekea, maka zanagri zanasamio. 36 Hagi zanagra mofavre’zani’a Jonatanine, Ahimasakizni huznantenageke kagrama mika kema zanasami’nana kea eme nasamigaha’e. 37 Hagi Deviti nefu Husai’a Deviti’ma hianke antahino, ete kumapi unefregeno Absolamuenena Jerusalemi kumapina ufre’ne.