Apocalipse 22

Asimu eri tine, asimu eri zafamofo naneke

1 Anantera ankeromo’a mago rantina avu sese huno klasigna hu’nea asimu eri tina naveri hige’na kogeno, Anumzamofone Sipisipi anentamofo kini trapinti hanatino ne-eno, 2 ana rankuma’mofo amu’nompi nevigeno, ana timofo ruga raga ankenarega asimu eri zafa me’neno, mago’mago ikantera raga rentetere nehie. E’i 12fu’a zupa raga renente. Ana zafamofo asi’namo’a, mika kumate vahera zamazeri knamaregahie. 3 Ana kumapina magore huno zamazeri havizama hu’zana omnena, Anumzamofone, Sipisipi anentamofo kini tramoke’za me’nena, kazokzo eri’za vahe’amo’za monora huntegahaze. (Jen-Agf 3:14-19) 4 Ana vahe’mo’za Agri avugosa negenageno, Agri agimo’a kokovi zamire megahie. 5 Hanki ana kumapina hanima hu’zana omnetfa hanigeno, lamumofo msane, zagemofo masagura ontahitfa hugahaze. Na’ankure Ra Anumzamo Agra’a tavi masa’a, ana kuma’mofona manino remsa huzmantenige’za, zamagra kva vahe mani’vava hugahaze.