Izikiel 46

Kini ne’mo’ma ofaramima erino eme ofama hania zamofo naneke

1 Ra Anumzana Agra Anumzamo’a amanage hie, Agu’a mono kumamofo zage hanati kazigama me’nea kafana 6si’a eri’za knafina eriginteno meno. Hianagi manigasa kna Sabatire’ene kasefa ikante’ma ne’zama kreno neneno musema hu knare’enena ana kafana eriogita anagintenkeno meno. 2 Hagi Israeli vahe’mokizimi ugagota kva ne’mo’a, megi’a mono kumapintima agu’afima unefrea kafante’ma asente’naza zafare azerino oti’nenige’za agri ofa pristi vahe’mo’za eri’za tevefima kre fananehu ofane, arimpa fru ofa hugahaze. Hagi agra anante kepri huno monora huteno, ete e’nea kantegati atiramigahie. Hagi ana kafana erionki atre’nageno vuno kinaga omasegahie. 3 Hagi manigasa kna Sabati knaraminte’ene kasefa ikante’ma mono’ma nehaza knarera, ana mopafi Ra Anumzamofo avuga ana kafante monora eme hugahaze. 4 Hagi mago mago Sabati knarera ugagota kva ne’mo’a, 6si’a afuhe afahe osu sipisipi anentataminteti’ene mago ve sipisipireti’ene huno Ra Anumzamofontega tevefima kre fananehu ofa hugahie. 5 Hagi witi ofama haniana, knare’ma huno kane so’ema hu’nea witia mago ekaeka kuki (21.6 lita) mago ve sipisipi afu’enena ofa nehuno, agra avesite mago mago sipisipi anentera witia refko huntetere huno ofa hugahie. Hagi olivi masavema ofama haniana, witima mago mago ekaeka kuma refkoma hunteterema hanire olivi masavena 4lita tagintetere huno ofa hugahie. 6 Hagi kasefa ikante’ma mono’ma nehaza knarera ugagota kva ne’mo’a, mago bulimakao afuma afuhe afahe’ma osu’nesianki, 6si’a sipisipi afu anentaki, mago ve sipisipigi huno avreno egahie. 7 Hagi ve bulimakao afu’ma avreno’ma ne-eno’a witi ofama hu zana mago ekaeka ku knare’ma huno kne osi’osi’ma hu witia erino eno. Hagi ve sipisipinema ofama hu witia mago ekaeka ku erino eno. Hagi mago mago sipisipi anenta’enema ofama hu witia agra’a avesite erino egahie. Hagi mago mago ekaeka witi ku’ma eri’zama e’narera, mago kavo olivi masavena erino etere hugahie. 8 Hagi ugagota kva ne’mo’ma zage hanati kaziga kafanteti’ma emareritesuno’a, ete ana kafanteti fegira atiramigahie. 9 Hagi ne’zama kre’za nene’za musema nehu’za Ra Anumzamofoma mono’ma hunte knare’ma esaza vahe’mo’za noti kaziga kafanteti’ma emarerite’nu’za, ete ana kafantetira atiorami, sauti kaziga kafanteti atiramiho. Hagi sauti kaziga kafanteti’ma emarerite’nu’za noti kaziga kafanteti atiramiho. Hagi emareri’nenaza kafantetira atioramitfa hiho. Hagi ru kafanteti atiramitere hiho. 10 Hagi ugagota kva ne’mo’a ana vahetamine umareriteno, ete atinerami’nazana agra’enena atiramigahie. 11 Hagi nezama kreno neneno musema nehuno atru huno mono’ma hu knarera, mago ekaeka ku eriviteta witi ofa bulimakao afu’enena nehuta, mago ekaeka ku witia eriri aviteta ve sipisipi afu’enena ofa hiho. Hagi sipisipi afu anentataminema ofama hanazana, witia agra avesite mago mago sipisipi afu anentatera refko huntetere hugahie. Hagi mago kavo 4lita hu’nenia olivi masavena mago mago witi ekaeka kutera refko huntetere hugahie. 12 Hagi kini ne’mo’ma agra avesite’ma hu ofane, tevefima kre fananehu ofane, arimpa fru ofanema agra avesite’ma Ra Anumzamofontegama hunaku’ma esanigeta, agu’a mono kumamofo zage hanati kazigama me’nea kafa anagintenkeno, manigasa kna Sabatire’ma nehiaza huno ofa eme Kresramana vino. Hagi e’i ana’ma huteno’ma atiramisigeta ana kafana erigigahaze. 13 Hagi mika nanterana afuhe afahe osu, mago kafu hu’nesia sipisipi anenta aheta Ra Anumzamofontega kre fanenehu ofa huntetere hiho. 14 Hagi mago mago nanterama mago mago sipisipima aheta kre sramana vanafina 2kilo witine 1lita olivi masavene eri havia huta ofa hiho. Ama kasegea eriotre atrenkeno meva meva huno vino. 15 Hagi mago sipisipi anentaki witigi, olivi masavena otreta mika nanterana ofa hunante vava hiho.

16 Hagi Ra Anumzana Agra Anumzamo’a amanage hie, kini ne’mo’ma mofavrerami ma’afinti’ma mago mofavre’ama mago mopama amisiana, ana mofavremofo mopa me’nenkeno agripinti’ma forehu anante anante’ma hanaza vahe’mo’za erisantihare’za vugahaze. 17 Hianagi kini nemo’ma mago mopama refko huno eri’za vahe’ama ami’niana, ana mopamo’a agrisu’a me’nena hoza anteno nenena 50'a kafuma evanigeno’a, eteno ana mopa kini ne' amigahie. Hianagi kini ne’mo’ma mofavre’ama ami’nenia mopamo’a agri mopa mevava hugahie. 18 Hagi kini ne’mo’a vahera knazmino zamahe kasonepeno, vahe mopa e’orino. Hanki mopama refko huno mofavre’ama aminaku’ma hanuno’a, agra’a mopafinti refko huno amino. Hagi Nagri vahe’mo’zama mopazmima atre’za vu’za eza huzankura nave’nosie.

19 Hagi avanagana zampima navareno’ma vanoma nehuno maka zama naveri’ma nehia ne’mo’a, kuma kafamofo tavaonte’ma me’nea kafanteti navareno ruotge’ma hu’nea nompinka vu’ne. E’i ana nona pristi vahe nonkino, noti kaziga avugosa huntene. Hagi anama hunaraginte nontamimofona, amefiga zage fre kaziga atumparega mago kuma naveri hu’ne. 20 Hagi ana kumakura amanage huno nasami’ne, Kefo avu’ava’ma hu’nesare’ma eri’za esaza ofane, kumi ofanema hanaza afu ame’a pristi vahe’mo’za amafi negre’za, witi ofanena kregahaze. Ruotge’ma hu’nea ofama eri’za megi’a mono kumapima vanage’zama vahe’ma zamazeri ruotge’ma huzankura amafi kregahaze. 21 Ana huteno fegi’a mono kumapi navareno kuma’mo’ma 4'afima omerenagente eme renagente’ma hu’nere vige’na koana, mago kuma metere hu’negena ke’noe. 22 Hagi megi’a kumamofona 4'afima renagentetera osi kuma megeno, kegina hugagintetere hu’naze. Hagi ana kumatamimofo zaza’amo’a 20mita higeno, atupa’amo’a 15mita hutere hu’ne. Hagi ana maka kumatmimofo zaza’amo’ene atupa’amo’enena magozahu hu’ne. 23 Hagi ana ne’one kumatamipina ofama hanaza ne’zama kre’zana asoparega ita tro hunte’za kagine’za, henka kaziga teve hugre’za tro huntekagi’naze. 24 Hagi ana ne’mo’a amanage hu’ne, vahe’mo’zama ofama eri’za esazana, mono nompima eri’zama e’neriza vahe’mo’za ana nontamimpi kregahaze.