Aisaia 62

Saioni kumamo’ma kasefa agima erisnia zamofo naneke

1 Na’ankure Saioni kumamoka kagri knare zanku hu’na nagira hamunki’na omani kea huvava nehu’na, Jerusalemi kumamoka knare zankura akohe’na omanigahue. Ana hu’na nevanugeno nanterampi zage hanatino remsa hiaza huno, fatgo avu’avazamo’a kagripintira remsa nehanigeno, agu’mavazi zamo’a kenage tavi tagi karugaru huno nevigeno remsa hiaza huno remsa hugahie. 2 Maka ama mopafi vahe’mo’za fatgo kavukvazana negesnage’za, kini vahe’mo’za kagri hihamu masazana kegahaze. Ana nehu’za Ra Anumzamo’ma kasefa kagima antegamisnia kagi ahegahaze. 3 Kagra Ra Anumzamofo azampi mago avasese’amoke hu’nea kini fetori meankna nehunka, kinimo’ma nentania fetori Ra Anumzankamofo azampi meankna hugahane. 4 Ra Anumzamo’a amefi humine hu’za kagia nehe’za, mopa’amo’a hagage koka fore hu’ne hu’za kagia ohegahaze. Hianagi mago kasefa kagima ahesazana, nagra agrikura muse hunentoe hu’za kagia nehe’nageno, vere’ma mani’nea a’mo’ma muse nehuno neve’enema maniaza huno mopakamo’a so’e huno mesigeno, Anumzamo’a muse hugantegahie. 5 Mago kasefa ne’mo vene omase’nea mofa a' eriankna hu’za, kagri ne’mofavre naga’mo’za kagrane eri hagerafigahaze. Ana nehanageno menima a’ma e’neria ne’mo’ma, ana a’ma musema hunenteaza huno kagri Anumzamo’a kagrira musena hugantegahie. 6 Jerusalemi kumamoka kuma keginare’ma mani’neza kvama hanaza vahera ko huhampri zamante’noe. Ana hu’noanki’za kenage’ene feru’enena zamagira hamunkite’za omanigahaze. E’ina hu’negu Ra Anumzamofontegama nunamuma hanana vahe’mokane, kezanke’ma hanana vahe’mokanena mani frua osunka kezati vava huo. 7 Ana huta Ra Anumzamofontega kezati vava huta nevinkeno, Jerusalemi kumara ete eri hankavetisnigeno, maka ama mopafi vahe’mo’za anazama negesu’za husga huntegahaze. 8 Ra Anumzamo’a hankavenentake tamaga azana erisga huno huvempagea hu’neankino, ha' vahetamimo’za e’za tamu’na sisima huta hankre’naza witine, tamu’na sisima huta hankre’naza waini hozafintira afete moparegati vahe’ene tamagri ha' vahe’enena zamatrenuge’za e’za eme eri’za onetfa hugahaze. 9 Hianagi witi ragama hamare’nazana tamagra’a neneta, Ra Anumzamofona agia husga huntegahaze. Ana nehanage’za waini rgama tagisnaza vahe’mo’za ana wainia Nagri mono kumapina negahaze. 10 Jerusalemi kumapima menima mani’naza vahe’mota kumara atreta, kuma kafaramimpinti atiramita vuta vahe’ma esnaza kana eri ra nehuta, mopa kateta antemrenerita, kampima haveramima me’neana eritreho. Ana nehuta maka vahe’mo’zama kesnaza avame’zana, krauefa erisga hiho. 11 Jerusalemi kumamoka antahio, Ra Anumzamo’a maka ama mopafi vahera zamasami’neanki’za, kagrikura amanage hu’za hugahaze. Saioni kumamoka kagri’ma kaguvazino’ma kavresnia nera ne-eankino, musezane nonama huno kamisnia mizana magoka eri’neno ne-e. 12 Ana hu’neanki’za kagri vahekura hu’za, Ra Anumzamo’a zamagu vazino zamavare’nea vahe mani’nazanki’za ruotge vahe mani’naze hu’za hugahaze. Anage nehu’za kagrikura hu’za, Ra Anumzamo’a amefira huomi’nea kumaki haketa vanune hu’za Jerusalemi kumamokagura hugahaze.