Jop 35

Elihu’a mago’ene Jopuna azeri kori’nea naneke

1 Anante Elihu’a mago’ene amanage huno hu’ne, 2 Jopuga Anumzamofo avurera fatgo hu’noema hunkama nehanana, kagrama antahinana tamage naneke nehue hunka nehampi? 3 Hagi kagra Jopuga Anumzamofonku hunka, nagrama kumi’ma osu mani’ne’nama fatgo navu’nava’ma hanuana, anampintira na’a knare’zana erigahue? hunka nehane. 4 Hanki menina Jopuga kenona hunegante’na ana maka 3'a roneka’a raminena, kenona huzamantegahue. 5 Jopuga menina kesga hunka onagamu monare’ma me’nea hamporamina ko. 6 Hanki kagrama kumi’ma hanana zamo’a inankna huno Anumzamofona azeri havizana hugahie? Kagra kumira mago’ene huvava hunka vugahananagi, e’i ana zamo’enena azeri havizana osugahie. 7 Kagrama mani fatgoma hunka manina zamo’a, magore huno Anumzamofona aza nehifi? Na’a mago knare’za Anumzamo’a kagripintira erigahie? 8 Hanki kagrama hana hazenke zamo’a, vaheke’za zamazeri havizana nehuno, knare kavukva’zama hana zamo’a vaheke’za zamazeri so’ea nehie. 9 Hankave’zami me’nea vahe’mo’zama vahe’ma zamazeri havizama nehazage’za, mago’a vahe’mo’zama eme zamazama hanagura zavi krafage nehaze. 10 Hianagi mago’mo’a amanage hunora nosie, nagri’ma nazeri fore’ma hu’neno, hani zampima mani’nogeno’ma muse zagame’ma namige’nama nehua Anumzana iga manie? 11 Anage nehuno afi zaga kafane, nama ramimofo antahi’zama rugatereno knare antahi’zama tami’nea Anumzana iga mani’ne hu’za nosaze? 12 Ana’ma nehige’za Anumzamo taza hanie nehu’za zavi krafagea nehaze. Hianagi Anumzamo’a ke’zamia antahino nona hunozmante. Na’ankure zamagra zamavufaga erisga nehu’za, kumi nehaza vahe mani’naze. 13 Hianagi zamunte omane vahe’mo’zama zavi krafagema nehaza zankura Hankavenentake Anumzamo’a antahi nozamie hu’zama nehazana havige nehaze. 14 Hanki kagra Jopuga ko’ma hunka, Anumzamofona onkegahue nehunka, Agrake’za eno nagrama hu’nesua kefo zantera mizana eme namigahie hunka avega antenka mani’nananagi, Anumzamo’a ana keka’a antahiogami’ne. 15 Hagi kumi’ma nehaza vahera Anumzamo’a arimpa ahezamanteno zamazeri haviza nosie hunka nehunka, kefo zamavu zamava’ma nehaza zankura agesa nontahie hunka hu’nane. 16 Hianagi Jopugama hana nanekea amunte omane naneke nehunka, kagesa ontahi negi vahe’mo’zama nehazankna naneke hunka eri hakare nehane.