João 3

Nikodimasi’a, Jisasi antahige’nea naneke

1 Hagi Farisi vahepinti mago nera agi’a Nikodimasi, Jiu vahe’mokizmi mono kanisol ne' mani’ne. 2 E’i ana ne’mo’a kenage hanimpi Jisasinte eno amanage huno antahige’ne. Rempi hurami ne’moka antahi’none, Kagrama hurami ne' Anumzamofontegati e’nane. Mago’mo’a Kagrama nehanaza huno amanahu avame zana osugahie, Anumzamo agrane mani’nesimo hugahie. 3 Higeno Jisasi’a kenona’a amanage huno asami’ne, Tamagerafa hu’na ama kea negasamue. Runema kasefa osnimo’a, Anumzamofo kumapina uofregahie, 4 Nikodimasi’a kenona’a huno, inankna huno ra vahe’mo’a ete osi mofavregna huno fore hugahie? Ete ra vahe’mo’a anta’amofo arimpafina ufrenkeno eteno kasentegahifi? 5 Higeno Jisasi’a ana kemofo nona’a amanage huno asmi’ne, Tamagerafa hu’na kagrira negasamue. Aza’o tinteti’ene Avamuteti’ene kasefa osnimo’a, Anumzamofo kumapina uofregahie, 6 Mopafi vahe’mo’ma kasente’nesiana vahere. Hanki Ruotge Avamu’mo’ma eri fore hu’nesia zana avamure. 7 Amama kasamisua zankura Nagriku hie hunka kmanogura osunka, kagra etenka kasefa mofavre hampro, 8 Zahomo’a inantega vunaku hirega nevigenka agasasa’a nentahine. Hagi inantegati eteno, inantega nevio antahinka kenka nosane. E’ina hu’za mika vahe’mo’za Avamupina kasefara nehaze. 9 Higeno Nikodimasi’a ana zanku, amanahu zamo’a inankna hugahie? huno higeno, 10 Jisasi’a ana kemofo nona’a amanage huno hu’ne, Israeli vahe’mokizmi rempi huzami ne' mani’nenka, ama nanekea antahi amara nosano? 11 Tamagerfa hu’na negasamue. Kema nehunana, antahita keta hu’nona zanku huama nehunketa, ana nanekegura tamagra antahinoramize. 12 Mopafi zanku’ma neramasamisunketa tamagrama tamentintima osanuta inankna huta monafi zanku’ma tamasami’sunana tamentintia hugahaze? 13 Mago’mo’a monafinka mrerino ovu’ne. Hagi Agra monafinkati’ma erami’neana, Vahe’mofo Mofavremo erami’ne. 14 Mosesema hagage kokampi osifa’vema erintesga hu’nea kna hu’za, Vahe’mofo Mofavrea azeri antesga hugahaze.*3:14 Nam-Ham 21:9

15 Hanigeno aza’o, Agripi amentinti hanimo’a, manivava asimu erigahie.

16 Anumzamo tusiza huno mopafi vaheku avesi nezmanteno, magoke ante’nea Ne’mofavre’a zami’ne. Agrite zamentinti hanamo’za fanane osu’za manivava zamasimu erigahaze. 17 Na’ankure Anumzamo Mofavre’a huntegeno ama mopafima e’neana, mopafi vahe refko hinogu huntegeno ome’ne. Hagi Agripinkati vahe’mo’za zamagu’vazizana erisaze huno huntegeno erami’ne. 18 Aza’o Agrite’ma amentintima himofona refko huno nanekea hunonte, iza’o Agrite’ma amentintima nosimofona, trate ko avrenteno keaga hunte’ne. Na’ankure Anumzamofona magoke Mofavre’amofo agirera, agra amentinti osigu ana nehie. 19 Nanekema huzmante’siana, ama kemofo agafare huzmantegahie. Masamo’a ama mopafima efregeno’a, vahe’mo’za hani avu’ava’zanku avesinente’za masamofona avesi onte’naze. Na’ankure havi zamu’zamake’za hu’naze. 20 Aza’o havizama nehia vahe’mo’a, tavi’mofona zamesra hunente’za, masarera nomaze. Na’ankure haviza nehazazamo eama huzanku nomaze. 21 Hu’neanagi aza’o tamage avu’ava’ma nehimo’a tavitera egahie. Na’ankure hakaremo’za nege’za Anumzamofo avenesiaza nehie hu’za hugahaze.

Joni’a Jisasinku hu’nea naneke

22 Hagi ananteti Jisasi’a amagenentaza disaipol naga’ane, Judia kaziga vu’za mago’a kna umani’ne’za mono tina fre zamante’naze. 23 E’i ana knafi Joni’a, Salim kumamofo tava’onte Ainoni kumate mono tina frezmante’ne. Na’ankure anantega rama’a tina me’nege’za vahe’mo’za ete’vute hu’za mono tina fre’naze. 24 Na’ankure Jonina kina huonte’naza knafine.

25 Ana nehazage’za Jonima amage nentaza disaipol naga’ane, mago Jiu ne’ene, Juda vahe’mokizmi avu’avapi ti fre’za avu sese nehaza zanku keaga hu’naze. 26 Nehu’za Joninte e’za amanage hu’za asmi’naze. Hurami (Rabbai) ne’moke, Jodani timofo kantu kaziga kagrane mani’neama, Agri agi hu’ama hu’nana ne’mo’a, mono ti frenezmantege’za mika vahe’mo’za Agrite nevaze. 27 Hazageno Joni’a anage hu’ne, mago vahe’mo’a, Mago zana e’origahie, ana hugahianagi monafinkati mago’zama amisigeno’a amne erigahie. 28 Tamagratmi antahi’nage’na amanahu kea hu’noe, Nagra Kraisi’na omani’noe hu’na hu’noe. Hianagi Agrira azeri henka atreno, nagrira pusante hunantege’na e’noe. 29 Mago vemo’ma a’ma erinaku nehigeno rone’amo oti’neno antahi nemino, aravema huku hia vahe’mofo ageru nentahino muse nehie. E’ina higu nagrira muse zamo’a avite’ne. 30 Agri agimo marerisigeno nagri nagimo uramisie.

31 Agra anagamiti e’nemo’a maka’zana agatere’ne, aza’o ama mopafinti’ma e’nesimo’a, ama mopafi vahekino, ama mopafi zankuke kea hugahie. Agra aza’o monafinkati’ma e’nemo’a, Agra maka’zamofona zamagtere’ne. 32 Agrama antahino keno hu’nea zante Agra naneke’a huama nehie, hianagi mago’mo’e huno agi agenke’a antahi anira osu’ne. 33 Iza’o, Agri agi agenke’a erimo’a, tamage huno Anumzamofo nanekegura nehie. 34 Na’ankure Agrira Anumzamo huntege’no e’neankino, Anumzamofo keaga nehie. Na’ankure Agra refko osuga’are Avamura aviteno ami’ne. 35 Nefa’a, Nemofona avesinteno mika’zana kva hugahie huno, Agri azampi ante’ne. 36 Aza’o Nemofonte amentintima hanimo’a manivava asimura erigahie. Hagi iza’o Nemofo kema rutagresimo’a manivava asimura e’origahie. Hanki Anumzamofo tusi’a rimpahe knazamo agrite megahie.