Josué 21

Livae naga’mo’za ranra kuma eri’naza naneke

1 Hanki Livae nagate vugota hu’naza vahe’mo’za, pristi ne' Eleazane, Nuni nemofo Josuane Israeli vahete ugota hu’naza kva vahete, 2 Sailo kuma’ma Kenani mopafi me’nere e’za amanage hu’za zmasami’naze, Ra Anumzamo’a Mosesema asamino tagrikura rankuma’ene masave nentake tra’zama me’nesia mopane zaminke’za tra’zama nenaza afu zaminena maniho hu’ne.

3 Ana hu’negu Ra Anumzamo’ma hu’nea kante ante’za, Israeli vahe’mo’za zamagrama erisantimahare’naza mopafinti, tra’zamo’ma masavenentake hu’nea mopane, mago’a ranra kumara Livae nagara zami’naze. 4 Hanki ese’ma satu zokago re’za kazana Kohati naga’mo’za erisaza rankuma ke’za erifore hu’naze. Hagi anama hute’za Juda naga’ma, Simioni naga’ma, Benzameni naga’mo’za 13ni’a ranra kuma refko hu’za, Livae naga’ma pristi ne' Aronimpinti’ma efore hu’naza Kohati nagara zami’naze. 5 Hanki Efraemi naga’ma, Dani naga’ma, amu’nompinti’ma refkoma hu’naza Manase naga’mo’za mopama e’ori’naza Kohati nagara 10ni’a ranra kumatami refko huzmi’naze. 6 Hagi Isaka naga’ene, Asa naga’ene, Naftali naga’ene, Basanima nemaniza ruga’a Manase naga’mokizmi mopafinti 13ni’a rankumatami refko hu’za Gesoni nagara zami’naze. 7 Hagi Rubeni naga’ene, Gati naga’ene, Zebuluni naga’mokizmi mopafinti 12fu’a ranra kumatamina refko hu’za Merari nagara, nagate nofite hu’za zami’naze. 8 E’ina hu’negu Ra Anumzamo’ma Mosesema asamine’a kante ante’za, Israeli vahe’mo’za, ana rankumatamine, tra’zama nenaza afutamima ante mopanena Livae nagara satu zokago re’za eri ama hu’za zami’naze.

9 Hagi Juda naga’ene, Simioni naga’mokizmi mopafima me’nea rankumatamima refko hu’naza kumatamimofo zamagi’a amanahu me’ne. 10 Hagi Livae naga’ma pristi ne' Aronimpinti’ma efore’ma hu’naza Kohati naga’mo’za kotazama satu zokago’ma razana, zamagri zamagimo efore hige’za ana rankuma’tamina eri’naze. 11 Hagi mago ran kuma’ma Israeli vahe’mo’zama Aroni naga’ma zami’nazana, Juda nagamokizmi mopamofo agona asoparega me’nea kuma Kiriat-Arbane (mago agia Hebronie) ana kuma’mofoma trazamo’a masavenke hukagi’nea mopa tra’zama nenaza afuzamima antesagu zami’naze. (Hagi Arba’a Anaki naga’mokizmi nezamageho’e.) 12 Hianagi Israeli naga’mofo rankumamofo tavaonte’ma me’nea ne’onse kumatamine mopanena, Jefune nemofo Kalepi agri mopa ko ami’naze. 13 Hagi Aroni agehe’mo’za pristi eri’zama e’neriza nagara, kore fre’za vu’za zamagu’ma nevaziza Hebroni kuma’ene tra’zama nenaza afuzminema kegava hanaza mopane Libna kuma’ene, tra’zama nenaza afuzmima kegava hanaza mopane, 14 Jatiri rankuma’ene tra’zama nenaza afuzminema kegava hanaza mopane, Estemoa rankuma’ene, tra’zama nenaza afuzminema kegava hanaza mopane, 15 Holoni rankuma’ene, tra’zama nenaza afu’zminema kegava hanaza mopane, Debiri rankuma’ene, 16 Ainine, Jutane, Betsemes rankuma’ene zami’naze. Ama ana 9ni’a rankumara, afu’zamimo’zama tra’zamanesaza mopanena Simioni naga’ene Juda naga’mo’za zamagra’a mopafinti Aroni nagara refko huzmi’naze. 17 Hagi Benzameni naga’mofo mopafintira, Gibionima, Gebama, 18 Anatotine, Almoni rankumaki hu’za ana makara 4'a ranra kumatamine, tava’ozamire’ma me’nea mopa tra’za nenaza afu zamimo’zama tra’zama nesaza mopa Aroni nagara refko huzmi’naze. 19 Hanki Aroni naga’ma pristi eri’zama eneriza naga’mo’za ana makara 13ni’a ranra kumatamine, tavao zamire’ma me’nea mopa afu zamimozama tra’zama nesaza mopanena ana maka eri’naze.

20 Hanki Livae naga’pintira mago’a Kohati nagara, Efraemi naga mopafinti mago’a ranra kumatmina refko huzmi’naze. 21 Hanki Israeli vahe’mo’za 4'a ranra kuma’ma zami’nazana, Efraemi naga’mokizmi agona asoparegama, koro fre’za ome zamagu’ma nevaziza rankuma Sekemima, Gezama 22 Kibzaimima, Bet Horonine ana maka tavao zamire’ma me’nea mopa afu’zamimozama tra’zama nesaza mopane ana 4'a ranra kumazminena eri’naze. 23 Hanki ana zanke hu’za Dani naga mopafinti’ma Kohati naga’ma ranra kuma’ma refko huzami’nazana, Eltekema, Gibetonima, 24 Aijaronima, Gat-Rimonine, tavaozamire’ma me’nea mopa afu zamimo’zama tra’zama nesaza mopanena ana maka eri’naze. 25 Hanki Manase nagara tare mopa eri’nazankino, mago mopafi naga’mokizmi mopafintira, Ta’anakine, Gat Rimoni rankumatrene tava’ozanire’ma me’nea mopa afu zamimo’zama tra’zama nesaza mopanena Kohati nagara zami’naze. 26 Hanki Kohati naga’mo’za ana makara 10ni’a ranra kumatamine, tavao zamire’ma me’nea mopane afu zamimo’zama tra’zama nesaza mopanena ana maka eri’naze.

27 Hanki Livae naga’pinti mago nagara Gesomu nagakino, tare rankuma’ma zami’nazana, Manase naga’ma amu’nompinti refkoma hu’naza naga’mokizmi mopafinti refko hu’za, kore fre’za zamagu’ma ome nevaziza rankumara Basani mopafi me’nea Golani rankuma’ene, Be-Estarane tava’ozanire’ma me’nea mopa tra’zama nenaza afu zamimo’zama tra’zama nesaza mopanena ana maka Gesomu naga’mokizmia zami’naze. 28 Hanki Isaka naga mopafinti’ma Gesomu naga’ma 4'a ranra kuma’ma zami’nazana, Kishionima, Daberatima, 29 Zarmutima, En-Ganimine, ana maka tava’ozamire’ma me’nea mopa, afu zamimo’zama tra’zama nesaza mopanena ana maka zami’naze. 30 Hanki Asa naga mopafinti’ma Gesomu naga’ma 4'a ranra kuma’ma zami’nazana, Misalima, Abdonima, 31 Helkatima, Rehobune ana maka tava’ozamire’ma me’nea mopa, afu zamimo’zama tra’zama nesaza mopanena, 4'a ranra kuma’ene zami’naze. 32 Hanki Israeli vahe’mo’za Naftali naga’mofo mopafinti 3'a ranra kuma Gesomu naga’ma refko huzami’nazana, zamagu’ma vazinagu kore freno ome fraki rankuma Galili mopafi me’neana Kades ran kumaki, Hamot-Dori kumaki, Katan rankuma’ene, ana maka tava’ozamire’ma me’nea mopa, afu zamimo’zama tra’zama nesaza mopa zami’naze. 33 Hanki Gesomu naga’moza ana makara 13ni’a ranra kumatamine, tavaozamire’ma meterema hu’nea mopa, afu zamimozama tra’zama nesaza mopanena ana maka eri vagare’naze.

34 Hanki Livae naga’pinti mago nagara Merari nagakiza Israeli vahe’mo’za Jebuluni naga mopafinti ranra kuma’ma zami’nazana, Jokneamuma, Katama, 35 Dimnama, Nahalali rankuma’ene zami’naze. Hagi ana maka 4'a ranra kumatamine tava’ozamire’ma me’nea mopa afu zamimo’zama tra’zama nesaza mopanena ana maka Merari naga zami’naze. 36 Hanki Rubeni naga mopafinti Israeli vahe’mo’za Merari nagama ranra kuma’ma zami’nazana, Bezerima, Jahazima, 37 Kedemotima, Mefa’ati rankuma’ene zami’naze. Hagi ana makara 4'a ranra kumatamine afu zamimo’zama tra’zama nesaza mopanena ana maka Merari naga zami’naze. 38 Hanki Gati naga mopafinti’ma Israeli vahe’mo’zama Merari naga’ma ranra kuma’ma zami’nazana, kore fre’za zamagu’ma ome nevaziza rankuma Giliati kazigama me’neana Ramotima, Mahanaimima, 39 Hesbonima, Jazeri rankumatre’na zami’naze. Hagi maka ana 4'a ranra kumatamine afu’zamimozama tra’zama nesaza mopanena ana maka Merari naga zami’naze. 40 Hagi Livae naga’mo’za mopama erizage’za mopama e’ori’naza nagara Merari nagakiza zamagra 12fu’a ranra kumatami eri’naze.

41 Hanki Israeli vahe’mo’zama maka mopama eri’nafintira 48'a ranra kuma’ene afu’zamimo’zama tra’zama nesaza mopanena Livae nagara zami’naze. 42 Hanki ana maka mago mago ranra kumatamimofona tava’ozamirera Livae naga’mo’zama afu’zamima antesaza mopa megagitere hu’ne.

43 E’ina huno Ra Anumzamo’a zmagehe’ima huvempa huno zamigahue hu’nea mopa ana maka Israeli vahera zamige’za, erisantihare’za ana mopafi mani’naze. 44 Ra Anumzamo’a Israeli vahera zamaza huno ha' vahe’zamia zamazampi zamavarentege’za, Israeli vahe’mo’za hara huzmagaterageno mago’mo’e huno hara huzmagateore’ne. Ana higeno Ra Anumzamo’a zamagehe’ima huvempama huzmante’nea kante anteno, maka kazigatira hara huozmantage’za mani fru hu’za mani’naze. 45 Hanki Ra Anumzamo’ma Israeli vahe’tema knare huvempa kema huzamante’nea ke’mo’a magore huno hantaga osuno, ana maka’zamo’a nena raga’a efore hu’ne.