Jadses-Kva Vahe 21

Benjameni naga’ma a’nanema avrezami’naza zamofo naneke

1 Hagi Israeli vahe’mo’za Mizpa kumate omeri atru hu’za amanage hu’za huvempa hu’naze, Magore huno magotimo’a mofa’a atresigeno Benzameni nagatera uomaregosie. 2 Hagi ana’ma hute’za Israeli vahe’mo’za Beteli kumate Ra Anumzamofo avuga vu’za tusi zavi krafa nehazageno vuno kinaga omesege’za, 3 zamagra amanage hu’naze, Ra Anumzana Israeli vahe Anumzamoka nahigeno Israeli vahepintira mago naga’mo’za fananea hu’za nehaze? 4 Hagi mase’za anante knarera nanterame oti’za kresramna vu ita trohu’za, anante kresramnama vu ofa nehu’za, zamarimpa fru ofanena hu’naze. 5 Hagi anante amanage hu’naze, Israeli vahepintira ina naga’mo Ra Anumzamofo avugama atruma nehumpina atrua osu’naze? Na’ankure zamagra kora huvempa hu’za amanage hu’naze, Iza’o Ra Anumzamofonte’ma Mispama omesimofona ahe friho. 6 Hagi Israeli vahe’mo’za nezamafunkura Benzameni nagara zamasunku hunezamante’za amanage hu’naze, menina Israeli vahepintira mago nagamo’a fanane hie. 7 Hagi tagra Ra Anumzamofonte huvempa huta mofa’netia ozamigosune huta hunonanki, inankna huta a’ne zamigura hakegahune? 8 Hagi amanage hu’naze, Israeli vahepintira ina naga’mo’za Ra Anumzamofo avuga Mispa kumatera ome’naze? Hagi keho Jabes-Gileatitira mago vahera Ra Anumzamofo avuga ome’ne. 9 Na’ankure Israeli vahe’mo’zama vahe’ma hamprizafina Jabes-Giliati vahera ana zupa omani’naze. 10 Hagi e’ina hu’nazagu koro osu’za hanaveti’za ha’ma nehaza vahera, Israeli vahe’mo’za 12tauseni’a hunezamante’za amanage hu’naze, vuta Jabes-Giliati kumate vahera maka a' mofavre’zamine zamahe hana hiho. 11 Hagi tamagra amanahu hugahaze, maka vene’nene, vene’nenema mase’nesia a’nenena zamahehna hiho. 12 Hagi Jabes-Gileati vahepintira 400'a venema omase mofa’neramina hake’za zamavare’za seli noma ki’za mani’naza kumate Kenani mopafi Sailo e’naze. 13 Hagi ana’ma hazage’za maka Israeli vahe’mo’za Benzameni naga’ma Rimoni havekampima fraki’zama mani’naza nagatega kea atre’za amanage hu’naze, Menina tamagri’enena hara osuta fru huta manigahune hu’za hu’naze. 14 Hagi anagema hazage’za Benzameni naga’mo’za kuma’zmirega ete vazage’za Jabes-Giliatiti’ma zmavre’naza a’nea zami’naze. Hianagi ana maka vene’nemo’za ana a’nea erizamentera osu’nazanki mago’amo’a amne mani’ne. 15 Hagi Benzameni nagakura Israeli vahe’mo’za zamasunku hu’naze. Na’ankure Israeli vahepina Ra Anumzamo’a zamatrege’za fanane hazageno kankamu fore hu’ne. 16 Hagi anante Israeli kva vahe’mo’za amanage hu’naze, Benzameni nagapintira ko a’nezmia zamahe hana hu’nonanki, a’ma e’ori’naza vene’neramina igati a’neramina haketa avrezamigahune? 17 Hagi amanage hu’naze, Zamahe hanama hunke’zama osi’ama maniza Benjamen naga’mo’za mofavre ante’nageno Israeli vahepintira zamagia fanane osanie. 18 Hianagi mofa’netia zaminunke’za ara e’origosaze. Na’ankure ko Israeli vahe’mo’za huvempa hu’za Benzameni nagara mofatia ozamigosune hu’naze. Hagi iza’oma mofa’ama amisimofona Anumzamo’a kazusi huntegahie hu’za nehu’za, 19 amanage hu’naze, Keho maka kafumofona Sailo kumatera Ra Anumzamofoma musema hunteno ne’zama kreno nekna etere nehie. Hagi ana kumara Beteli kuma’mofo noti kaziga megeno, Betelitima marerino Sekemuma vu’nea kamofona zage hanati kaziga megeno, Lebona kuma’mofona sauti kaziga me’ne. 20 Hagi anage hu’za Benzameni naga’ma a’ma e’ori’naza nagakura huzmante’naze, Vuta waini hozafi kafona ome anteta, 21 mani’neta negenkeno Sailo kumateti’ma avoma renaku’ma atirami’za e’naza mofa’neramina fraki’nesafintira ame huta atiramita zamavazu huta freta kumatmirega eta ara emeri zamanteho. 22 Hagi anama hanageno’ma zamafahe’zane zamaserahe’zanema tagrite’ma e’za fragema hanageta, amanage huta zamasamigahune. Muse huramantonanki tamasunku hunezamanteta zamatrenke’za ara zamavareho. Na’ankure Jabes-Giliati vahe’ma zamaheta a’nema avre zamunana erizamentera huvaga ore’naze. Hianagi ana mofa’nea tamagra’a ozami’nazankita huvempama hu’naza zantera knazana e’origahaze. 23 Anage hazage’za Benjamen naga’mo’za anama zamasamizaza hu’za avoma renakuma Sailo kumapinti’ma atirami’za aza mofa’nea zamavare’za fre’za erisantima hare’naza mopazmirega vu’za ara omeri zamante’za havizama hu’nea kumazmia omeri so’e hutere hu’za ki’za mani’naze. 24 Hagi ana knazupa Israeli vahe’mo’za ana kumara atre’za erisantima hare’naza mopazmirega, naga nofi zamirega vu’za e’za hu’naze. 25 Hagi ana knafina Israeli vahe’mokizmia kinia omani’neanki’za, mago’mago’mo’a kegeno’ma avure’ma knare’ma hiazana hutere hu’ne.