Jó 14

Jopu’a vahe’mo’ma nefria zanku hu’nea naneke

1 Hagi a’nemo’zama vahe’ma kasezmantege’za osi’a kna nemani’za rama’a knazampina unefraze. 2 Trazamo amosre ahenteteno, ame huno friankna vahe’mota nehune. Huge zagemo hanatino remsa higeno amema’amo ame huno fore huteno, ame huno fanane hiankna nehune. 3 Hagi Kagra e’inahu vahete kavua antenka ketenka mani’nano? Kagra e’inahu vahe zamavarenka keaga huzmantenka refkoa hunezmantano? 4 Hagi agruma osu vahera, iza azeri agru hugara hu’ne? I’o mago’mo’a anara osutfa hugahie. 5 Hagi manita vanuna kna Kagra antahinka kenka hu’nane. Tagra nama’a ika manita vugahune, Kagra antahinka kenka hu’nanankinka, ko e’inahu kna’afi manigahaze hunka hunte’nanankino, mago vahe’mo’a agra’ama manino’ma vania kna’a azeri za’zara huno omanigahie. 6 E’ina hu’negu amnerega kavua antenka negenka, natrege’na mani’ne’na zago eri’za eneri’za vahe’mo’zama nehazaza hu’na manisua kna’afina eri’zana e’neri’na musenkasea ha’neno.

7 Na’ankure zafama antagima atrazage’za, ete hagegahune hu’za amuhara nehazanki’za kasefa agata hage’za azankunatmina omere emere hugahaze. 8 Hagi ana zafamofo arafu’namo’a ome ra huno osaparesingeno, agafa’amo’a hagege huno mopafina kasrigahie. 9 Hianagi mopafina tima me’nenigeno’a ana zafamo’a ete agata hageno, kasefa zafagna huno hageno marerigahie. 10 Hianagi vahe’ma frigeno’a hankaveamo’a vaganeregeno, atumparega ra asimu’ma anteteno nefrie. 11 Hagi hagerimpima zagema rentegeno’ma amuho huno amu’ma mareriankna nehuno, ra zagema regeno’ma tiramo’ma taneankna huno, 12 vahe’mo’a frino manigasa hu’nenigeno monamo’a vagaregahie. 13 Hanki matipima fraki nantenka kagekani nantenankeno karimpa ahe’zamo’ma evunagateresiana knare hisine. Hianagi ete nagri’ma antahi namisana kna, mago kna huhamprinanto.

14 Hagi fri’ne’nia vahe’mo’a ete otinora manigahifi? Hagi e’inahu zama me’nenige’na, maraguzamati’na vanua knafina frizampinti’ma nazeri oti’nia zankura amuhara hu’na vugahue. 15 Hagi Kagra nagriku’ma kema hananke’na kenona hunegantenugenka, Kagraka’a kazanuti’ma tro’ma hunte’nana vahe’mo’nagura tusiza hunka antahintahia hugahane. 16 Na’ankure menina nagama rerakaure’nama kama vanoma nehuazana negananki, kumi’ma huazamofona ohamprio. 17 Hagi e’ina nehunka kefo navu’nava zana kupi eririnka anaki nentenka kumi’ni’a refitesane. 18 Hianagi agonamo ankariseno eramianka nehigeno, mehimpinti havemo atamana huramiankna nehigeno, 19 tima hageno havea erino eviankna nehanigeno, tima hageno mopa erino viankna hunka vahe’mo’ma maniso’ema hunaku’ma amuha’ma nehiazana eri haviza nehane. 20 Kagra hankavetinka maka knafina zamazeri zamagatere vava nehanke’za fanane nehazagenka, zamavufaga eri ruzahu hutenka huzmantanke’za friza nevaze. 21 Hagi ana vahe’mokizmi mofavreramimo’za zamagi me’nea vahe mani’nazanagi, zamagra e’i ana zana antahi’za ke’za osu’naze. Hagi zamazeri fenkamima atresniana antahi’za ke’za osugahaze. 22 Zamagrira zamavufagafintira zamata negrige’za zamatagura nehu’za zamagra zamavufagura zavira netaze.