Jó 29

Jopu’ma ko’ma knare nomani’zama mani’nea zanku hu’nea naneke

1 Jopu’a mago’ene keaga’a amanage huno hu’ne, 2 Ko’ma evia kafuramimpine ikampinema Anumzamo’ma knare huno kegavama hunantege’nama mani’na e’noaza hu’na, manisuegu antahintahia nehue. 3 Anumzamo agra nasenirera tavira remsa hunentege’na, mago zankura nagesa ontahi knare hu’na vu’noe. 4 Hagi ko’ma maka zamo’ma knare’ma higenama mani’noa knafina, nagrite’ene naga’ni’arera Anumzamo’a taragoteno knare aroneni’a mani’nege’na ke’noe. 5 Hankavenentake Anumzamo’ma nagranema taragotenoma mani’nea knafina, mofavre naganimo’za nagri tava’onte mani’naze. 6 Ana nehazage’na bulimakao afu zaga’nifintira ami rina rama’a nerati’na, olivi hozanifintira rama’a olivi raga tagite’na, masavena reratina rama’a erugeno viteno tima eviaza hu’ne. 7 Hagi korapara nagra ugota kva vahe mani’ne’na, rankumamofo kafante’ma keagama refkohu knazupa, zamagima me’nea vahe’mo’zama trate’ma unemanizage’na nagranena tra’nire umani’noe. 8 Kasefa vahe’ma nagrama neoge’zama nenage’za, mani kantugma nehu’za kankamuna nami’naze. Ana nehazage’za ozafanafa naga’mo’za, antahinenami’za oti’ne’za nenagazage’na vu’noe. 9 Kva vahe’mo’zama keagama nehazaretira nagrama neoge’zama nenage’za, kea osu mani’ne’za zamazanteti zamagitera rehamunki’naze. 10 Ran kumate’ma ugagota hu’za kegavama hu’naza kva vahera, zamagefunamo’a marerino zmavagunafare akamrege’za kea osu zamagira hamunki’za mani’naze.

11 Hagi nagrama keagama nehuge’zama antahi’za vahe’mo’za hu muse hunenantage’za, keagama nehuge’za nagaza vahe’mo’zanena knare keaga hunami’naze. 12 Na’ankure zamunte omane vahe’ene megusa mofavre naga’mo’zama, taza huo hu’za kema hazage’na, nagra zamaza hu’noe. 13 Amuha zazamima omanea vahera zamaza nehuge’za, nagrira husga hunante’naze. Ana nehu’na kento a’nanea zamaza nehuge’za tusi muse hu’naze. 14 Maka zama hu’noana fatgo kazigatike hu’noe. Ana nehugeno fatgo navu’nava zamo’a za’za kukenama antaninogeno’ma hiaza huno rufitenante’ne. Hagi fatgoma huno refkohu avu’ava’zamo’a, pristi vahe’mo’zama nentani’za kankrikna huno nasenirera me’ne. 15 Zamavuma asuhu’nea vahera kana zamaveri nehu’na, zamagiama haviza hu’nea vahera zamaza huge’za kana vu’naze. 16 Zamunte omane vahe’mokizmia nafa zamigna nehu’na, ke’na antahi’nama osu’noa vahe’ma keagafima otizage’na, zamaza hu’na keaga eri ante fatgo hu’noe. 17 Anumzamofoma amage onte vahe’mo’zama vahe’ma zamazeri havizama hazage’na, ana vahera zamagemazampa ru tavegri’na, zamagipintira eri vari’noe. 18 Nagrama antahuana, tamagerfa hu’na ama mopafina zazate musenkasea hu’na mani’na vute’na ome ozafa re’na frigahue hu’na nagesa antahi’noe. 19 Hagi zafamofo rafu’namo ofenkame uramino mopa agu’afinti ti anivazu higeno ani’namo tretre hiaza nehigeno atako’mo aninare runteankna hige’na nagra korapara mani’noane. 20 Nagri’ma ko’ma knare nagima nami’naza zamo’a nagripina amne kasefa huno me’ne. Ana nehige’na maka zupa kasefa hankavea erivava hu’na nevue. 21 Nagrama antahintahima vahe’mokizmima nezamuge’za, maka vahe’mo’za akohe’za mani’neza, nagri nanekea antahi’naze. 22 Hagi nagrama keagama huvagama retogeno’a, mago’mo’e huno nagri kerera antemino keaga osu’ne. Na’ankure nagrama hua nanekea antahiso’e hu’nagu anara hu’naze. 23 Vahe’mo’za komaranigu’ma avegama ante’nazageno koma rige’zama musema nehazankna hu’za, nagri nanekema antahi’zankura tusiza huno zamavesi’ne. Ana hige’za za’za knama ko’ma oru’nereti’ma ko’ma rigeno’ma maka zamofo ani’namo’ma muse nehuno ani’na eri mareankna hu’za nagri nanekea muse hu’za eri’naze. 24 Hagi vahe’mo’zama antahintahi hakarema nehu’za mani’nazage’na, kiza renezami’na knare navugosa huzami’noe. E’inama hua kazigati zamarimpa zamazeri hankaveti’noe. 25 Nagra kva vahezmi mani’ne’na, e’ina hiho, amana hiho hu’na vahera zamazeri ante fatgo nehu’na, mago kini ne’mo sondia vahe’amofo amu’nompi nemaniaza nehu’na, zavi’ma ataza vahera zamazeri tagane vahekna hu’noe.