Jó 42

Anumzamo’a Jopuna mikazama’a ete ami’nea naneke

10 Hagi rone’araminku’ma huno Jopu’ma nunamuma hutegeno’a, Ra Anumzamo’a knare nomani’za ete Jopuna ami’ne. Ko’ma Jopu’ma ante’nea fenozama havizama hu’nerera, tamagerfa huno Ra Anumzamo’a ana mika fenozana ete ami’neno, ana agofetura mago’ene ante agofetu huno amigeno rama’a fenoza ante’ne. 11 Anama hutege’za afu aganahe’zane asarehe’zane korapa rone’amo’zanena e’za noma’afina ne’zana eme ne’naze. Ana nehu’za Ra Anumzamo’ma knazama atregeno agrite’ma e’nea zankura, Jopuna eme zamasunku hunente’za, azeri hankaveti nanekea hu’naze. Ana nehu’za mago mago vahe’mo’a muse zana, zagone golireti’ma tro’ma hu’naza rini eritere hu’za eme ami’naze. 12 Ana higeno henka nomani’zama Jopu’ma manino vu’nea nomani zama’afina Ra Anumzamo’a asomu huntegeno ko’ma mani’nea nomanizana rugatere’ne. Higeno Jopu’a menina 14tauseni’a sipisipi afutami anteno, kemoli afutamina 6tauseni’a anteno, hozama e’neria bulimaka’ama zanazeri tragoteno rezmante’nea bulimakao afutamina 2tauseni’a anteno, a' tonki afutamina 1tauseni’a ante’ne. 13 Ana nehuno Ra Anumzamo’a ru’ene Jopuma ami’neana, 7ni’a ne' mofavre nemino, 3'a mofa’ne ami’ne. 14 Hagi ese mofa’mofona Jemima’e huno agia antenemino, anante mofa’mofona Kesia’e huno agia antenemino, nampa 3 mofakura Keren-Hapuku’e huno agia antemi’ne. 15 Hagi anama mani’naza mopa’afina, Jopu mofa’nemo’zama hiranto hu’za knare zantfama hu’nazankna mofa’nea omani’naze. Ana hu’neankino Jopu’ma fenone mopanema refko huno ne' mofavre naga’ama nezamino’a, ana mofane nagara ana zanke huno refko huno zami’ne. 16 Ana’ma huteno’a Jopu’a 140'a kafu mani’neno, agehone agigone azankonena ke’ne. 17 Ana’ma huteno’a Jopu’a knare’za huno za’zate maniteno, ozafa reno fri’ne.