Neemias 4

Keginama eri so’ema hu’za negizage’za kiza zokago ke huzmante’naza naneke

1 Hanki tagrama Jerusalemi rankuma’mofo kegina ete azeri otuna zamofo nanekema Sameria kazigama kvama hu’nea ne' Senbalati’ma nentahino’a, tusi arimpa aheneranteno, Jiu vahe’mota ki’za zokago ke hurante’ne. 2 Agra eri’za vahe zamavufine, Sameria sondia vahe’mokizmi zamavufina amanage hu’ne, Zamagra hanavezmima omne Jiu vahe’mo’za na’a nehaze? Zamagrama antahi’zana kuma kegina eri so’e hugahune hu’za nehazafi? Zamagra ana maka ofa Kresramana vunaku nehazafi? Zamagra magoke zage ferupina, kegina huvagare’za nehazafi? Tevemo’ma te fragu vazirami’nea haveramina inankna hu’za eri’za kuma kegina eri so’e hunakura nehaze? 3 Anankema nehigeno’a, Amoni vahepinti ne' Tobia’a Senbalati tava’onte oti’neno amanage hu’ne, Zamagra na’a tro nehazafi keho, afi kramo’ma ana keginare’ma takau resiana have keginazamia renafe hutregahie! 4 Hanki anankema hazama nentahi’na, amanage hu’na nunamuna hu’noe, Anumzantimoka nunamuntia antahiramio. Na’ankure ama vahe’mo’za tagrikura ki’za zokago ke hunerantaze. E’ina hu’negu atregeno ana nanekemo’a zamagri’a zamavufare fore hino. Ana hanige’za ha' vahe’zamimo’za ha' eme huzamante’za zamavareza ru moparega kina ome huzamanteho. 5 Havi avu’ava’ma hu’za kumi’ma hu’naza zana keamnea nosunka kumi’zamia eri atreozmanto. Na’ankure keginama nehaza vahe’mokizmi zamavufina, zamagra kiza zokago ke hunerante’za Kagrira kazeri krimpa nehaze.

6 Hanki ana nunamuma hutogeta, maka’mota tagu’areti huta hanavetita eri’zana erita, kankamuna rehiza huvaga ronkeno kuma keginamo’a marerino amu’nompi vu’ne. Na’ankure mika vahe’mota mago tarimpa huta eri’za eri antahintahi huteta ana eri’zana eri’none. 7 Hianagi Senbalati’ma Tobia’ma Arapu vahe’mo’zane Amoni vahemozane, Asdoti vahe’ma antahizama Jerusalemi kuma keginama kazigazi huta erita nevuna nanekene, kuma keginamofo ne’onse kankamuma rehiza’ma nehuna nanekema nentahi’za, tusi zamarimpa aherante’naze. 8 Ana nehu’za zamagra Jerusalemi kumate naga ha' eme hunerante’za, eri’zama e’neruna eri’za eri haviza hunaku kea retro hu’naze. 9 Ana hu’neanagi tagra Anumzantimofontega nunamuna nehuta, kegavama hu vahera huzamantonke’za feru’ene kenage’enena ha’ma eme hurante zankura kegava hu’naze. 10 Hianagi Jiu vahe’mo’za amanage hu’za nehaze, eri’za vahe’mokizmi hankavemo’a hago vagare’za hie. Ana higeno fragu vaziramino’ma hihima hu’nea haveramina rama’a me’neankita eri’zana eri vaga oregahune.

11 Ha' vahetimo’za amanage hu’naze, Jiu vahe’mo’za tagrira ke’za antahi’za osu’nesageta, ame huta vuta ha' ome huzamanteta zamahe vaga resanunkeno, ana eri’zamo’a amne zankna hugahie. 12 Hanki ana vahe’mokizmi tva’onte’ma nemaniza Jiu vahe’mo’za 10ni’a zupa naza agatere’za eme tasami’za, maka asoparegati hara eme huranteke nehaze. 13 Anagema hazage’na mago’a vahera huzamantoge’za vu’za, keginamo’ma urami’nea kaziga ome kegava nehazage’na, mago’a vahera huzmantoge’za kankamuma maneterema hu’nere bainati kazitamine, karugru kevene, ati kevene eri’ne’za nagate nagate otitere hu’naze. 14 Ana’ma hutoge’za veamo’zama koro’ma hazazama nezamage’na, kva vahe’ene eri’za vahe’ene ana maka vahetamina amanage hu’na zamasami’noe, tamagra ha' vahekura korora osiho. Ra Anumzana hankavenentake huno marerisa Anumza mani’neanki tamagera okanita, tamafuhe’inku’ene ne' mofavre tamigu’ene mofa’nane tamigu’ene a’nane tamigu’ene nonkuma tamigu’ene tamagesa nentahita korora osu hankavetita hara hiho. 15 Hanki ha' vahetimo’zama ha’ma eme hurante kema anakiza nanekema tagrama antahuna nanekea zamagra antahi’naze. Hianagi ha’ma eme hurante nanekema anaki’nazana Ra Anumzamo zamazeri havia higeno hara eme huorantazageta, mago’magomota kegina hu eri’zantirera vu’none.

16 Hagi ana knareti agafa huta, amu’nompinti vahera refko hunke’za mago’amo’za kegina eri’zana eri’naze. Hige’za mago’amo’za atine kevene zamimizare’ma nentaniza ha' kukenane, hankone zamazampina eri’ne’za oti’za kegava hu’naze. Hagi ana nehazage’za, erizante’ma ugota hu’za kegavama nehaza vahe’mo’zane ana maka Juda vahe’ma keginama nehaza vahe’mokizmi zamefi otitere hu’naze. 17 Hagi keginama haza vahe’mo’za mago kaziga zamazanteti eri’za eneri’za, mago kaziga zamazampina ha’za eri’naze. 18 Ana nehu’za eri’zama eri’za vahe’mo’za bainati kazina atrazageno zamasoparega urami’nege’za eri’zana eri’naze. Hianagi paziveteti’ma ufema neraza vahe’mo’za nagrane mani’naze. 19 Anama hutazage’na kva vahe’tamine ugotama huzmante’naza kva vahetamine mago’a vahetaminena amanage hu’na zamasami’noe, Kegina hu za’za huta vahera afete umani emani huneta eri’zana enerune. 20 E’ina hu’negu ina knare’ma ufenkrafama antahisutma, ame hutma nagra mani’nore eme eri tru hiho. Anumzantimo’a tagritega anteno ha' vahetia hara huzamantegahie. 21 Hagi anagema hutogeta mika zupa nanteranteti’ma vuno kinagama monafima hanafi’mo’ma ehanatia knare’ma vigeta, kegina eri’zama erita vu’nonana vahera amu’nompinti refko hu’neta mago’amo’za karugru kevea zamazampi eri’ne’za kva nehazageta, mago’amota kuma kegina eri’zana eri’none.

22 Hanki ana zupa mago’ene amanage hu’na vahera zamasami’noe, Eri’zama eri vagama resutma mago mago vahe’moka eri’za vahekane Jerusalemi kumara atreta megi’a ovuta, agu’afi mani’neta kenagera kegava huneranteta, msama hanigeta kuma kegina eri’zana erigahaze. 23 Hagi ana knafina nagrane nafuhe’zane nagri eri’za vahe’mo’zane nagri’ma kvama hunenantaza vahe’mo’zanena kukenatia hate otre’none. Makamota ha’zana tazampi me’negeta otreta, tinteganema vunana tazampinke me’negeta vu’no’ne.