Nambas-Vahe Hamprine 36

Selofehati mofa’nemo’za mopama erisanti’ma hare’naza naneke

1 Hagi Giliati nagara Makirimpinti fore hazageno, Makiri’a Manase ne’mofokino Josefe nagapinti fore hu’ne. Hagi mago zupa Giliati naga’mokizmi kva vahe’mo’za Mosesente’ene, Israeli vahe’mokizmi kva vahete’ene keaga hu’naku vu’naze. 2 Hagi zamagra amanage hu’za zamasami’naze, Ra Anumzamo’a kagrikura Israeli vahe’mo’za erisantima haresaza zana zamio hu’ne. Hagi rantimoka, Ra Anumzamo’a kagrira kasamino Serofehati’ma erisantima hare’nea mopa mofane zaga’a zamiho huno hunte’ne. 3 Hianagi ana mofanemo’za Israeli vahepima mago nagapi ne’ma vema erisageno’a, zamagra erisantihare’naza mopamo’a vema eri’saza venenemofo naganofipi mopamo’a vugahie. 4 Hagi vahe zama eri’nea zama ami kafuma esige’za vema eri’nea nagamofo mopasena mago’ane eri aguhesageno tagehe’i mopamo’a ana nagapi mevava huno vugahie. 5 Hagi Ra Anumzamo’ma huntea kante anteno Mosese’a amanage huno Israeli vahera zamasami’ne, Josefe naga’mozama ama kema nehazana tamage nehaze huno hu’ne. 6 Hagi Ra Anumzamo’a amanage huno Jerofehati mofane nagakura hu’ne, Zamavesite zamagra ina vema erinaku’ma hanu’za nezamafa naga nofipintinke erigahaze hu’ne. 7 Hagi e’inahu’ma hanageno’a mago nagamofo mopamo’a ru nagapina ovugosie. Na’ankure mika Israeli naga nofimo’za nezamafa mopa erisantiharetere hugahaze. 8 Hagi Israeli naga nofipintima mago mofa’mo’ma mopama erisanti hare’nesuno’a agra’a naga nofipi vea erisigeno mopamo’a ru nagapina ovugahie. 9 Hagi mopatamia atrenkeno ru nagapi ru nagapina huno vuno eno osino. Hagi tamagrama erisantima hare’nesaza mopamo’a, tamagri mopa megahie. 10 Ra Anumzamo’ma Mosesema asami’nea kante ante’za Zerofati mofa’nemo’za anara hu’naze. 11 Hagi Zerofati mofa’nemokizmi zamagi’a, Mahalaki, Tirsaki, Hoglaki, Milkaki, Noa’e. Hagi ana maka’mo’za nezmafohemokizmi vea eri’naze. 12 Hagi zamagra Josefe nemofo Manase nagapi vea erizageno, erisantima hare’naza mopazmimo’a ru nagapina ovuno nezmafa nagapi me’ne. 13 Hagi Jodani timofo kantu kaziga Moapu agupofi emani’nageno, Ra Anumzamo’a ama ana tra kea Mosesena asamigeno, Israeli vahera zamasami’ne.