Provérbios 30

Aguri hu’nea naneke

1 Ama’na nanekea, Jake nemofo, Aguri Itielintegane Ukalintega huama huno kre zanami’nea naneke. 2 Tamage nagra mago’a vahe’mo’zama nehaza havizana agatere’na havizantfa nehu’na, vahe’mo’zama antahi ama’ma nehazaza hu’na antahiamara nosue. 3 Nagra knare antahi’zana rempi hu’na e’ori’na, Anumzamo’ma Ruotage hu’nemofoma keno antahino’ma hu antahi’zana e’ori’noe. 4 Iza monafinka mareriteno ete erami’ne? Iza zahora aza agu’safina azeri’ne? Iza tavarave’afina tina anakino ante’ne? Iza mopa ometre emetretera mika’zana antegeno fore huno me’ne? Agri agi’a iza’e, nemofo agi’a iza’e? Antahinesunka nasamio! 5 Anumzamofo kema maka ke’za antahi’zama hu’nazana tamage ke me’ne. Agra mika zamagu vazinogu’ma Agrite’ma neaza vahe’mokizmia hankogna hu’neno zamagu nevazie. 6 Anumzamofo nanekerera kagra’a kagesafintira amerasenka ruokamaro, ru kazeri korino havige vahe maninane huno kazeri ama hugahie. 7 Anumzamoka tare zantfanku kantahige’za huanki kavresra huonanto, ama mopafi ofri’na kasefa hu’na mani’nesurera, 8 ese' zanku’ma kantahigesuana, nazahuge’na vahe’ma revatgahu avu’ava’zane havigea osaneno. Anante zana natrege’na rama’a feno vahera omanige, namunte omane vahera omanisuanki magoke magoke knama nesugeno namuma hania avamente namio. 9 Na’ankure nagrama rama’azama antesuna, namefi hunegamina ru Ra Anumzamoka kage’na antahi’na osu’noe huge, ru namunte omanena musufa nesena, kagi eri haviza huzankura, avamente namio. 10 Mago kazokzo eriza nemofona kva’amofontera vunka ome azeri haviza hu kea osuo. Kagrama anama hnankeno’a, ana kazokzo eriza ne’mo’a antahi haviza hugantena, hazenkefi manigahane. 11 Mago’a vahe’mo’za nezmafana hu haviza hunezamante’za, nezamrerana musenkea hunozmantaze. 12 Mago’a vahe’mo’zama antahizana kumitia omne’ne nehazanagi, Anumzamofo avurera agrua osu’naze. 13 Mago’a vahe’mo’za knare hu’none huza zamavufaga ra nehu’za, mago’a vahe’mokizmia zmage fenkami netraze. 14 Mago’a vahe’mokizmi zamavemo’a, vahe’ma zamahe bainati kazinkna higeno, tuke zamavemo’a kazinkna huno asaneneankino zamunte omane vahe ene, mago’a zanku’ma atupa’ma hu’nesnaza vahera, ama mopafintira zamasga huvazigahaze. 15 Kukufamo’a taremofatre zanante’ne. Zanagi’a, Namio, Namioke! Zmavesizama eriknarema nosia zana 3'a za me’ne. Zmamuma nosia zana 4'a za me’neankino, 16 e’i ana zantamina, fri vahe kumaki, vene’ma mase a’mo’ma mofavrema nontea naravo aki, tima anihuma nehia hagege mopagi, ke’onke zama tefananema nehia tevemofonena zamura nosie. 17 Nefama negeno azanava kema hunenteno, nererama kefenkami atresnia vahe’mofo avurga, kotkoti nama zaga’mo’za ana avurga ani kasonepesageno, tumpa namamo’za avufga nevagaregahaze. 18 Nagritera 3'a zamo ruzahukna zana megeno, antahi ama’ma nosua zana 4'a za me’ne. 19 E’i ana zana ina kante tumpamo’a monafina hareno nevie, ina kante osifavemo’a have agofetura regraroheno vanoa nehie. Ina kante ventemo’a tusi’a hagerimpina vano nehie. Hagi na’a hu’nea zanku vene’nemo’za, vene omase akura zamave’nesie.

20 Savri a’mofo avu’avamo’a amanahu hu’ne, venema maseteno’a, ne’za neteno agiteti eri ho’mu hiankna nehuno, kefo zana osu’noe nehie. 21 3'a zamo ama mopamofona azeri tore nehanigeno, 4'a zamo raga oregosie. 22 E’i kazokzo eri’za ne’mo’ma kini mani’zane, neginagi antahi’zane vahe’mo’za nezama nezamuma hu’zane, 23 ave’sinontaza a’mo’ma ve’ma eri’zane, kazokzo eri’za a’mo’ma kva’ama maninesia a’mofo ve’ama rehanareno manizamo’a, ama mopa azeri tore nehie.

24 Ama’na mopafina 4'a onensa zagaramina mani’nazanagi, knare antintahimo’a zamagripina avite’ne. 25 Kipzuvemofona hanave zmimo’a osi hu’neanagi, ko knafima nesagura ne’zana zagegnafi eritru nehaze. 26 Krofamofona hanavezmia omne’neanagi, havefi nozmia negize. 27 Kenumofona kini vahe’zamia omani’neanagi, sondia vahe’mo’zama nehazaza hu’za, vugota hu’za nevazageno, ana amage amage hu’za nevaze. 28 Tagovira kazanteti amne fru hunka azeriga zagamo’agi, kini vahe’mokizmi marerisa nompina ufregahaze.

29 3'a zagamo’za knare huza kana nevazagena kenasane nehuanagi, 4'a zagamoza fatgo hu’za nevazagena negoe. 30 E’i ana zaga laionigino mika zagamofona hanave’amo’a zamagatere’neankino, mago zagagura korora huno manigane ozamantegahie. 31 Ve kokoremoza zamahihiza eri antesga hu’za vazageno, ve memeki afumo’za zamasenia eri antesga hu’za vazankna huno, kini ne’mo’ma sondia vahe’anema nevuno’a, ana nehie. 32 Kagrama neginagi kavukava’ma hunka kavufa ra nehunka, kefo avu’ava’ma hu antahi’zama retro’ma nehanunka, kazanu kagite refintenka kea osuo. 33 Mememofo amirima tatizana bata tronehaze. Hagi kagona ru hapati’sazana, kora hugahie. E’ina hu’negu arimpama ahe’zamo’a, ha' eri fore nehie.