Sam-Zagame 72

Solomoni asunte’nea zagamere

1 Anumzamoka fatgoma huno refkoma hu' avu’ava zana kini nera neminka, fatgo kavukva zanka’a kini ne’mofo nemofona amio. 2 Fatgo avu’ava huno vaheka’a refko hunezmanteno, zamunte omne vahera fatgo avu’ava hunezmanteno kegava huzmantesie. 3 Ranra agonaramimo’za knare huno manifru hu nomani’za avre’za vahetera ne-enageno, neone agonaramimo’za fatgo avu’ava zamofona nena raga’a rentegahaze. 4 Zamunte omane vahera zamahonekeno, maka zanku’ma upa’ma nehaza vahe’mokizimi mofavreramina zamagu nevazino, vahe’ma ha’ma renezmantaza vahera zamazeri haviza hugahie. 5 Zagema reno nevanigeno ikamo’ma remsa nehanire, fore’ma hu anante anante’ma hu’za vanaza vahe’mo’za korora hunegante’za monora hugante vava hu’za vanaze. 6 Hagi kini ne’mo’ma vahe’ma kegavama hania avu’ava zamo’a, menima apri’nea apepate’ma ko’ma runteankna nehuno, mopafima atako’ma runteankna hugahie. 7 Kini ne’mo’ma kegavama hania kna’afina, Anumzamofoma amage’manentaza vahe’mo’za mani’za zmifina knare hu’za hagegahaze. Ikamo’ma remsama nehanifima maka’zama hanaza zamo’a, knare zanke huno tretre hanie. 8 Hagi mago hagerinteti’ma vuno mago hagerintema vanigeno, Yufretisi tinteti’ma vuno, mopa atumparegama vuno e’noma haniana, ana kini ne’mo miko vahera kegava hanie. 9 Hanki hagage kokampima nemaniza vahe’mo’za agrite zmarena emere’za kepri nehanageno, ha' vahe’aramimo’za zamavugosaregati avuga masene’za kugusopa negahaze. 10 Hanki Tasisi kumate kini vahe’mo’zane, hageri amu’nompima nemaniza vahe’mo’zanena takisi zagoa eri’za kini nera eme amigahaze. Ana nehanageno Seba kumate kini ne, Seba’enena ana hu’za musezana eri’za kini nera eme amigahaze. 11 Maka kini vahe’mo’za agrite kepri hunentesageno, maka kokankoka vahe’mo’za agri eri’za erintegahaze. 12 Na’ankure zamunte omne vahe’mo’zama krafagema nehanageno’a, agra antahizmino zamagu vazigahie. Vahe’mo’za zamazeri havizama nehazage’zama, vahe’mo’zama zamazama nosaza vahera, agra zamaza hugahie. 13 Zamunte omne vaheku’ene maka zanku’ma upama nehaza vahekura agra asunku hunezmanteno zamagu' vazi’nige’za ofrigahaze. 14 Vahe’mo’zama knama zami’za zamazeri haviza nehu’za, ha’ma rezmantaza vahera zamahokeno zamagu vazigahie. Na’ankure agri avurera vahera raza mani’naze. 15 Kini ne’moka zazate manigahane! Seba kumateti golia eri’za kagri eme kamisaze. Maka zupa kagrikura nunamuna hunegante’za, asomu kea hugantesaze. 16 Ama mopafina witimo’a rama’a nehanigeno, agonafinena witimo’a hageno, marerino umase emase hanie. Lebanoni zafaramimo’ma nehiaza huno zafa ragamo’a knare huno renentenigeno, ran kumapima nemaniza vahe’mofo nomani’zamo’a tra’zama hageno tretre hiankna huno, knare’za huno afovage huno tretre hugahie. 17 Hanki kini ne’mofo agimo’a mevava huno nevina, zagemo’ma me’neno’ma remsama huno vania kna’afina kini ne’mofo agia erisga hugahaze. Anumzamo’ma agri’ma asomu’ma hunte’neankna huno maka ama mopafi vahera asomura hunezmantesige’za nege’za ana nera husga huntesaze. 18 Ra Anumzana Israeli vahe Anumzamofona agi’a ahentesga hanune. Agrake’za knare huno mareri agatere avu’ava zana erifore nehie. 19 Ra Anumzamofona hihamu masa’ane agi’a ahentesga huvava hanune! Hankavenentake masa’amo’a maka ama mopafina remsa hanie! Tamage! Anazana fore hanie. 20 Jesi nemofo Deviti nunamumo’a amare eme vagare’ne.