1 Kunyima, Yesu yi bayidi bandi bakafika dishiyi di dishiha di Ngalela, mu tshitshinyi tshi bula tshi Gelasa. 2 Hakatuluka Yesu mu buatu, mutu ukatambuka mukakatshi mu ngita, bakasangila nandi. Muntuewu ukadu mukuata kudi nyinga mubodu. 3 Neku mutuewu ukadu mushakama anu mukakatshi mu ngita, ka kuadu mutu ukadu muku mukuata nashi kumukanda kanu. 4 Ku mutshila ku mutshila, bakadu bamuakanda kanu ku mikolu bo ku maboku, kadi ukatula kanu yi biamu bikaduebu bamukanda nabi ka kuadu mutu ukadu yi ngudu ikumukuata. 5 Meba osu, ukadu watshimba mukakatshi mu ngita, yi ku luhongu walela ndolu yi kuditaha mbuta yi mabue hambidi yeye kayandi.

6 Hakamoneyi Yesu uduadu; ukayi manyangu ukadiela ku makasa a Yesu ukasa binu hashi kubushi kuandi, 7 ukela diyi dikola ne: "Yesu Muana wu Tshiambi muena kulu udi nami bualu kaye? Kuasengola mu dina di Tshiambi ulema washakama mu diwulu kuakengeshi!" 8 (Neku Yesu ukambila "Nyinga mibodu ne, tambuka munda mu mutuewu!")

9 Neku Yesu ukamokoshi ne: "Dina diebi nganyie?" Uka mukudumuna ne: "Dina diami nadi ‘Legona’ bualu tudi tshiokutshioku!" 10 Mutu ukasengola Yesu bune kabahatshi muabawu.

11 Hahiehi bo luhongu, kukadu ngunda yabila kudi. 12 Nyinga mibodu ikasengola Yesu ikamba ne: "Tutuma mu ngulubieyi, bune tubuela munda muayi." 13 Yesu ukataboshi, nyinga mibodu ikatambuka munda mu mutu, ikabuela munda mu ngulubi. Ngulubieyi bundi buayi ikadu nashi 2,000 ikafulangana kulu ku luhongu ikayadiela mu mayi ikafu.

14 Balami ba ngulubi bakayi manyangu bukuya kuambila bakadu bashala mu bula yi ku matshika. Batu bakadu bukumona tshikadikangana, 15 Hakafikebu hahiehi bo Yesu, bakamona mutu ukadu mukuata kudi lengona, ukadu muhona hashi, muluata mindala hambidi bo buanyi buandi bosu, bakofu bowu. 16 Bakamona malu bundi buawu, bakambila batu malu osu akesekela mutu mukuatshika nyinga mibodu.

17 Amu hahu, bakeseshi Yesu bune utambuka mu bula buabu.

18 Hakadu Yesu wabuela mu buatu, mutu ukadu mukuatshibu bo nyinga mibodu uka musengola bune "Bayaka nandi!"

19 Neku, Yesu kamuataboshila, ukamuambila ne: "Hinga kuenu mu bulungu buenu wamba malu alema a kuesela shashendi mu muengu wandi."

20 Neku, mutu ukayi, ukambila batu mu mala disandi, malu osu akamuesela Yesu. Batu bosu bakamofu, bakakema bikola.

21 Hakahinga Yesu mu buatu dishiyi dinga di dishiba di Ngalela, batu bandi bakadu hahiehi nandi bamutshimbidila bamana ku mbambadi ku dishiha di Ngalela. 22 Neku umu wu mu balombodi ba mu sunangonga ukadu dina diandi Yayilo, hakamoneyi Yesu, ukashakama hashi ku makasa andi 23 neku ukamusengola ukamba ne: "Munami wu babakashi watshieba kufu kuasengola duaka umuteka dikatshi diebi mumutshu uhete londahu!"

24 Neku Yesu ukayi nandi. Batu bandi bakamulamata, bakamuhudishi nseke bundi buayi.

25 Mu batuamu, mukadu muamukashi bo kusama ku mashi adika kanana mitshiyi disandi yi ibidi, 26 ukayi kudi ba ngangabuka ba mishindu yosu, kadi kofu malonga ukatula fualanga yandi bundi buayi kadi kaheta londahu, hamutu hakofu malonga, mbabala ikafula. 27 Ukofu, batu batueyi bu Yesu, ukafunduka mukakatshi muabu kunyima ku Yesu ukakoha ku lohu luandi, 28 Bualu ukadu udialela lukanyi ne: "Mbe nakoha ku mundala wu Yesu, yakofu malonga."

29 Amu hahu, mashi akadu atambuka akakama, ukofu malonga. 30 Amu hahu, Yesu ukofu ngudu yandi ikahueka. Ukakudumuka mukakatshi mu batu, ukokoshi ne. "Ngenyi wakoha ku mundele wamie?"

31 Bayidi bandi baka mukudumuna ne: "Kushimona batu bakuabondola kuku yi kukue? Bitshi udi mukokoshi ne nganyi wuhu koha ku lohu luamie?"

32 Neku Yesu ukatungunuka bu kutshioboka kumbambadi kuandi bu kumona mutu ukesa bualuabu. 33 Muamukashi ukadita bowu buka mukuata bualu ukalubuka tshikamuduila. Neku ukasa binu hashi ku makasa a Yesu. 34 Yesu ukamuambila ne: "Munami wu babakashi, kuatabushi kuebi kuakondaha. Yaka kuebi holu."

35 Hakadu Yesu utshiatueyi, batu bakatumabu kudi ba nkolomu ba mu sunangoga, bakadu bakamuambila ne: "Munebi wu babakashi umanafu, bukayi watateshi Yesue?"

36 Yesu ukalubuka lukanyi luabu kadi ukambila nkolomu wu mu sunangonga, *"Kutshinyi, wataboshi, munebi uyaheta moyi." 37 Yesu kananga bune batu baye mufila amu Petelu, Yakobu yi munabu wu babalumi Yone. 38 Hakafikebu ku subu wu nkolomu wu sunangonga, Yesu ukamona batu bayumbakana, badila, yi kuela ndolu ikola. 39 Ukabuela mu subu ukabambila ne: "Bukayi nuayumbakane? Bukayi nuadile? Muanewu kena mufu, kadi udi mulala tulu!"

40 Batu bosu baka museka. Neku uka batambula bundi buabu, ukangata tatandi bo mamandi yi bayidi bandi basatu, ukabuela nabu mu subu mukaduebu baladikishi muana. 41 Ukakuata muana ku dikatshi ukamuambila ne: "Talita, Kumu," Buena kuamba ne: "Songakashi, nakuambiambila, bika hashi!"

42 Amu hahu songakashi ukabika hashi uka bangishi kuenda, neku batu bosu bakakema bikola.(Ukadu bo bitshietshi bu disandi yi bibidi.) 43 Neku Yesu ukabambila bikola ne: "Kanuambidi mutu bualu buhueseka, neku, hakayi songakashi tshitu tshi kudi."