1 Pedro 3

Yagl abu mogl pai eraiglmere

1 Ana yoba boi paigwa i, mogl atne edenaiglkwa pamere mere yegl, ene abu meglkwa i, winoma moraiglmara mogl atne edenaiglkwa paugwa. Ene yegl eribi, ene winoma tau God kamo ta pre mediglkraiglkwa i, ene siragl mere mogl pai eraiglkwa i kandre, pre medigl, ede suna unaiglkwa. Ene ka ta di tekraiglkwa ba 2 ene God kuduglmo goglsre, mabuno du eraiglmara i, ye kandre, ede suna unaiglkwa pre diga.

3 Ana ene abu meglkwa i, ene nagino meda keme ekin garaiglkwa i, kuno ta erekrabuka. Ene bitno yugu ere wakai ersre, taragl gol mina bekigwa mo kugugl gagl wakai edidre, ekin gaunedi prikrio. 4 Ene ekin kaima garaiglkwa i, ogono nagino mina gaglkraiglkwa ba ene deno muduno wida di idre, kiede meglbi, ene ekin kaima gaiglkwa mere yegl panabuka. Ekin yegl mere i, God wakai kaima yomedi kanugwa. Te, ekin i ama dudukrabuka, aimadi yei pai morabuka. 5,6 Okna ibo abu tau God yobama meglkwa i, ye ama ekin yegl mere gaglsre, winoma meglmara mogl atne edigwa. Na diga i, Sara ya abu tau God ka dumere erabukra we di, pre gi di meglkwa abu i pre diga. Sara ye Abraham moglmara mogl atne edidre, ye wie kagie daglkrukwa ba ye yaglna kade we dugwa. Ana ene ama taragl kane kane kudugl gogl tekre, mabuno wakai bogl meglbi, ene Sara abugloma mere yegl moraiglkwa.