1 Pepa magigl i, Sailas ya Timoti akie mungo, na Pol pepa i bogl, ene Jisas yugobunomo, dumo Tesalonaika meglkwa i, teiga. Ene Neno Kade God yobama moglsre, Yaglno Kade Jisas Krais ama yobama meglkwa. 2 Na prika i, Neno Kade God ya nono Yaglno Kade Jisas Krais ye ene yoko kaima ere wakai ere te moglsre, deno muduno wida di padigl tenabredi prika.

3 Agrama abarama wagle, no ege ege ene pre God di wakai yei tenamga paugwa. I siragl pre ene pre mediglkwa i, u gigle kaima dugo, te, ene deno muduno ikne ikne teigwa mabuno i ama ede u podo ogwa. 4 Yegl pre no Jisas yugobunomo bage bage meglmara wan ede omga igne, no ene mabunono i, ye boglo kugl tedre, Tesalonaika yoba mabuno wakai yegl erimiwe dumga. Yoba ene ere kide ere teigo, ene yubun podo igwa ba ene pre medigl pai moglsre, adigl gigledi meglkwa i pre no yoba di tomga.

5 Ene yubun teigo, adiglkwa pre God ye ka tage tedre, ene ere wakai ere tenan, kuno kaima erabuka. Te, ene adiglkwa i, ka kaima God yoba kingno morabara suna moraiglkwa i nogugl edugwa. God yoba kingno morabara suna moraiglkwa pre yubun igwa. 6 Ba yoba erme ene yubun teigwa yobamo i, God ere mogl, ye yubun tenabuka. God yegl erabuka i, ye mabuno du keme ersre, erabuka.

7 God yoba kingno mogl, suglno morabuka igne i ye mabuno du ere norsre, ene erme yubun igwa yoba i ya, no God kamo di tomga yoba i bogl, nono akie wakai moglsre, deno muduno wida di inaiglmedi erabuka. Taragl yegl mere plau dinabuka i, nono Yaglno Kade Jisas ye angeloma gigledi meglkwa i bogl akie heven ibo kide kodo, ede unaiglkwa igne i plau dinabuka. Jisas unabuka igne i doga bauglo mere kide ere winabo dinan, ye ede makandigle udre, yoba ka tage tenabuka.

8 Nono Yaglno Kade Jisas ede ikne udre, yoba ka tage tenabuka igne i ye yoba ta God pre kan erekrikwa i ka tage tedre, te yoba ta Yaglno Kade Jisas kamo wakai i yoba di teigo, prikwa ba mokono tedre, pre mediglkrikwa ta moraiglkwa i, ama ka tage tenabuka. 9 God ka tage tenabuka yobamo i, ye ede eglke pidre, Yaglno Kade moglmara moglkre, yobuglomo podo kide paugwa i kankre, aimadi kamin kide kaima moraiglkwa. 10 Yaglno Kade Jisas unabuka igne i yoba ta ye pre mediglsre, ye yobama meglkwa i, ye Yaglno Kade Jisas wakai kaima mogl, i ta ede moglmedi kandre, ye debie sinaiglkwa. Te, ye yobama moraiglmara suna i, ene ama akie moraiglkwa. I siragl pre no Jisas kamo wakai i ene di tomgo, ene ama pre mediglkwa pre ene ama suna moraiglkwa.

11 Yegl pre no ege ege ene pre kamage ere munga. No kamage erumga i, God ene yobuglo bogl tenan, ene mabuno ta eribi, kuno erabere mere yegl eraiglmedi kamage erumga. Ene mabuno yegl eribi, God okuo ene mabunono kandre, Na ene agle di suna edidre, mabuno siragl mere ene eraiglmedi primere mere yegl, ene erimiwe di, yegl dinabedi kamage erumga. Te, ene erme mabuno wakai eramnedi prikwa ya, ene pre mediglmara pre God kogonmo eramnedi nomane si prikwa i pre no ama kamage ersre, God ene yobuglo bogl tenan, ene eramnedi primere mere mudu kaima eraiglmedi kamage erumga. 12 No ene pre kamage yegl mere erumga i, Yaglno Kade Jisas ene meglmara suna kogon erabara i mina ye kagie kade inabedi kamage erumga. No Jisas kagie kade inabedi kamage erse, te ene ama, Jisas ene wakai erimiwedi debino sinabedi kamage erumga. Na prika i, nono Godno ya nono Yaglno Kade Jisas Krais ye nono yoko kaima ere wakai ere noro miurka pre no ene pre kamage erumga i, kaima plau dinabedi prika.