1 Ana Samuel kidagl yogwa igne, ye wam suo Israel yoba jasno morabredi dedugwa. 2 Ye wam komono, kagie Joel we digwa. Te, ye wam okuo kagie Abiya we digwa. Samuel ye jas morabredi dedugo, ye dumo Berseba mogl, yoba kotno pribrika. 3 Ye kot pribrika ba ye neno Samuel mabuno wakai boglmere boglkre, mige pre eribrika. Yegl eribrika pre yoba ye kotno win sinamnedi jas suo i kuduno eriko, ye mige i nedre, kot wakai prikribrika.

4 Ana Samuel wam suo yegl eribrika pre Israel yagl kade mudu makai sidre, ede pi Samuel dumo Rama moglmara eigwa. 5 Samuel moglmara pidre, ye yegl di teigwa, Ene pro! Ene kidagl yengo, ene wan suo ene mabuno wakai boglnere boglkribrika. Yegl pre ene yagl swara ta dedin, ye king tau kantri mudu sugl meglmere yegl no sugl morabiwe di yegl digwa. 6 Yegl digo, Samuel ye king ta no sugl morabiwe digwa i kide prukwa. Ye kide prisre, siragl mere erabuka i pragledi Yawe agle di prukwa. 7 Ye Yawe agle di pruko, Yawe di ikne ede, yegl dugwa, Ye ene di teigwa i, eratniwa. Ye ene mokono tekrikwa. Na swara ye kingno moglka i, ye kide prisre, mokono narimiwe di, Yawe yegl dugwa.