2 Coríntios 1

God deno muduno si gigle di norukwa

3 Nono Yaglno Kade Jisas Krais Nem yagl wakai kaima moglkwa. Ana nono ye kagie kade tenamga i, siragl pre ye nono Neno mogl, Godno moglsre, nono ege ege mitno gogl noro, deno muduno si gigle di norukwa. 4 Nono yubun imga igne God ege ege deno muduno si gigle di norukwa i, nono yoba pere yubun kane kane ta inaiglkwa i, ama ake ple di tenaiglmedi pre erukwa. God ye nono deno muduno siragl mere si gigle di norukwa i nono kandre, yobamo i ama kuno yegl mere deno muduno si gigle di tenamga pre erukwa.

5 Ene prio! Krais ye yubun mere kaima yumere mere yegl, no munara i yubun ama kau sugwa. Ba no yubun mere yumnara i, Krais ege ege deno muduno si gigle di norukwa. 6 Te, no yubun imga panan, God ene deno muduno si gigle di tedre, ene ake ple di tenabuka. Te, God no deno muduno si gigle di noran, ama no ene deno muduno si gigle di tenamga. Yegl eran, no yubun idre, adigl gigledi munere mere yegl, ene ama yubun kuno yegl mere idre, adigl gigledi moraiglkwa. 7 No pre gi dumga i, ene kaima adigl gigledi moraiglmedi prumga. I siragl pre no prumga i, no yubun yumnere mere ene kuno yegl igwa pre God no deno muduno si gigle di norumere yegl, ye ene ama deno muduno si gigle di tenabedi prumga.