1 Ana ene mige moni i makai sidre, God yobama tenaiglkwa i mina na ka tau mere bogl tenaglka i ta paikrumedi prika. 2 I siragl pre enene kamun kuade mige moni makai sidre, ye tenamnedi prikwa i, na pre kan erika. Na pre kan ersre, Masedonia yoba magigl meglkwa i yegl di teiga, Pre mediglkwa yoba dumo Korin provins Akaia suna meglkwa i, ye bugla yugu swara ta ede ogwa igne, mige moni i pi Jerusalem yoba tenamnedi ere meglmiwe di, yegl di teigo, ye kwande prikwa. Ene yoba pere ka kaima ake ple di tenamnedi prikwa mabuno i, na ye di teigo, ye tau mere prise, ama mabuno yegl eramnedi nomane igwa.

3,4 Ana ene enene mige moni i pi Jerusalem yoba tenamnedi prikwa i, na pre kan erika ba na agrama tau ene meglmara unaiglmedi dediga wigwa i, ye ene ake ple di tebi, ene kogon i, ere kodinaiglkwa pre dediga. I siragl pre ene okna dimere i ta erekribi, kide panabedi prika. No ene ka kaima wakai eraiglkrawa we di pre gi didre, no Masedonia yoba okna ama yegl di tomga pre na ene meglmara unaglka igne, Masedonia yoba tau na bogl akie umun, ene mige moni ta i makai sikribi, na agai goglbo, ene ama agai gogl dinaiglkwa pre diga. 5 Yegl pre na nomane ta iga i, agrama tau dedibo, ene meglmara ede okna unaiglkwa pamedi prika. Ye ene meglmara udre, ene ake ple di tebi, ene mige moni tau mere i makai sinamniwe di, yegl di kodigwa i, ene ere wakai eraiglmedi prika. Ene mige podo tenamne dimere yegl i makai si kodibi, na okuo wibo, wakai panabedi prika. Ba na u kan moglbo, ene na kan moglmiwedi kide prisre, mige tabre i makai sibi, kide panabedi prika.

6 Ene prio! Yoba ta kaya mokna kuri ta ere yaran, kaya mokna kuri keme si yunabuka ba ye mere ere yaran, kaya mokna mere kide si yunabuka. Kuno yegl mere, ene mige moni mere tebi, God okuo ene ama taragl mere tenabuka. 7 Ba ene swara swarade ta nomano mina tenamnedi praiglmere mere yegl tenaiglkwa paugwa. Yoba ta ene yegl, yegl teo dinan, ene kide prisre, tebi, i kide panabuka. I siragl pre yoba ta gun yedre, taraglmo i pi togwa i, God wakai kanugwa.

8 God ene wakai kandre, ere wakai ere tedre, ake ple di tomara i, taragl tau mere i kodumnedi prisre, yoba pere ake ple di tenamga i kuno erumedi prio. 9 Ene taragl tau i pi yoba pere tebi, God kamo mina okna beglmere mere yegl, ene mina ama plau dinabuka. Ye yegl beglkwa,

Yoba ta kugl mogo i pi suduglmere mere yegl,

yoba ta ye taraglmo i pi goduglme yoba togwa i,

Ye mabuno du erukwa pre God aimadi pre morabiwe di, yegl beglkwa.*

10 Ana God ye yoba kaya mokna ere yaglsre, si nedre, eraiglmedi togwa. Tomere yegl mere God ene mabuno du ere ede podo pidre, ene yoba pere ake ple di tenaiglmedi konbauna yauro tenabuka.

11 God ene taragl tau mere i pi yoba pere tenaiglmedi taragl kane kane ene tenan, ene taragl i, tau i makai sidre, no i pi tenaiglmedi noribi, no i pi yoba pere tomun, ye idre, God di wakai yei tenaiglkwa. 12 Yegl pre ene kogono wakai erimara i mina God yobama goduglme meglkwa i, ye wakai moraiglmedi ake ple di tebi, wakai moraiglkwa. Te, ye wakai moraiglkwa igne, gun podo yedre, God di wakai yei tebi, God kagie kade inabuka.

13 Ene Krais kamo wakai i pre mediglsre, adigl gigledi mogl, te, ene mige moni podo tenamnedi makai sibi, ye kan, God kogonmo kaima erimedi kandre, God kagie kade tenaiglkwa. 14 Te, ye ama ta praiglkwa i, God ene ere wakai ere togwa i, ene meglmara kau sumedi kan, deno muduno ene tenaiglkwa. Tedre, ene pre ama kamage eraiglkwa.

15 Ana God taragl wakai wakai norukwa i, nono erme drano mina mudu ta dinamga i, kuno ta erekrabuka. Ba ye taragl mere kide kaima norumara i pre nono ye di wakai yei tenamga paugwa.