7 Krais wakai yene mogl, God abuglagemo i nogugl edugwa pre kan erumga i, taragl podo kaima ta paugwa. Paugwa ba God ere mogl, makan koglwa sin mina atne edugwa mere yegl paugwa. I siragl pre ye abuglagemo taragl podo paugo, nono makadigle yoba munga i, no taragl yoko munga. Ba God ye abuglagemo munara atne edugwa i, mem ta paugwa. Jisas kamo dumga igne, ye yobuglomo podo kide pamedi kanaiglkwa i, yoba yobro mina ukrumedi kandre, God yene yobuglomo mina umedi kanaiglkwa pre erukwa.

8 No yubun kane kane yumga ba yubun kane kane i, no si atne edekrikwa. Te, ege tau mere nomano mina kinano gudu prumga ba no nomano u kide pikrukwa. 9 Yoba ege mere no ere kide ere norikwa ba God moko norokrukwa. Te, taragl kane kane no si atne edinamnedi erikwa ba no u kide pikrumga. 10 Jisas yubun idre, goglmere mere yegl, no ogono nagino mina yubun idre, goramnedi ere munga mere yegl paugwa. Ba taragl kane kane yegl plau dugwa i, Jisas yene no ogono nagino mina atne kor moluwedi, i nogugl edenan, yoba kanaiglkwa pre plau dugwa.

11 No kor moglsre, Jisas kogonmo ere wan munga i pre yoba ege ege no si goramnedi eriko, no ege mere gunga baka dugwa. Ba God taragl yegl mere plau dinabedi kanige erukwa i, Jisas no munara atne kor moglkwa i, i nogugl edenan, yoba kanaiglmedi prukwa. Kaima no ogono nagino i, gorabuka yogwa ba Jisas yene ogono nagino mina atne moglkwa i, yoba kanaiglkwa paugwa.