1 Ana Juda yoba kingno Sedekaia, ye yobama bogl Babilon king no sugl moglkran, mogl pere edinamnedi prisre, Babilon king kamo sedigwa pre Babilon king, kagie Nebukatnesar we digwa i, ere mogl, amimo bogl ede u dumo Jerusalem kuda bogl tenamnedi sel yugu kipai, Jerusalem yobugl winabo di i suna edigwa. Edidre, ye kobuglo togl erimara ede kuglo enamnedi makan si yu kobuglo togl yomara magigl i edigwa. King Nebukatnesar amimo bogl kuda bogl tenamnedi wigwa igne i Sedekaia, bugla yugu 9 dumo Juda sugl moglko, 10 mun, de 10 mina King Nebukatnesar amimo bogl wigwa. 2 Babilon yoba ba tau mere Jerusalem yobugl winabo di i suna ede pai meglko, king Sedekaia bugla yugu 11 Juda sugl moglkwa. 3 Winabo di i suna ede pai meglko, 4 mun, de 9 ege, Jerusalem yoba kidan podo paigo, kaya mokna nenaiglkwa taragl swara kaima ta yekrukwa. 4 Ta yekrukwa igne i Babilon yoba kobuglo togl bage ta si buko didre, ede Jerusalem suna eigwa. Suna eigo, king Sedekaia amimo bogl eduer mudu teke enamnedi ede pi king kaya moknamo ere yaiglmara pidre, kobuglo togl suo ta magigl magigl yebrara dua ta yomara i ede meda eigwa. Babilon yoba dumo Jerusalem winabo di i suna ede pai meglkwa ba ye teke ede pi nigl Jordan omara dumo auduno yogwa i, enamnedi eigwa. 5 Teke ede pi dumo i enamnedi eigwa ba Babilon soldia ye sika si pi taun Jeriko yomara dumo auduno yogwa i pidre, ye sigwa. Ye pi sigo, Sedekaia amimo ede pere pere eigwa.

6 Ana Sedekaia amimo ede pere pere eigo, Babilon yoba king Sedekaia si kane si i pi king Nebukatnesar dumo Ribla we digwa i moglmara edigwa. Edigo, king Nebukatnesar ye Sedekaia kotmo prisre, kumapmo tenagle dugwa. 7 Yegl didre, ye yobama di togo, ye Sedekaia gumuglo wagle wam mudu si goglsre, Sedekaia gumuglo si kin yedre, sen ta taragl bras mina bekigwa idre, ye si kane si i pi dumo Babilon edigwa.

8 Ana king Nebukatnesar dumo Babilon bugla yugu 19 sugl moglmara suna i, ba 5 mun, de 7 mina ye yobamo kade ta, kagie Nebusaradan we digwa i, ede dumo Jerusalem ugwa. Yagl i, soldia tau king sugl meglkwa i bitno moglkwa. 9 Ye ede Jerusalem udre, Yawe yugumo ya king yugumo ya yoba kade Jerusalem suna kipaigwa i yuguno mudu gagl tege ere kodugwa. 10 Gagl tege ere kodidre, ye ami di togo, ye mudu ere mogl, Jerusalem kobuglo togl ere winabo digwa i mudu si atne edigwa. 11 Si atne edigo, Nebusaradan Juda yoba tau dumo Jerusalem pai meglkwa i ya tau okna kuda panarukwa igne teke ede pi Babilon yoba meglmara eigwa i ya Juda yoba mudu magigl meglkwa i, si kane si i pi dumo Babilon edenagledi ede ogwa. 12 Yegl erukwa ba ye Juda yoba goduglme meglkwa i tau dumo Juda pai mogl, kaya mokna ere yaglsre, ede wain sugl moraiglmedi kanige erukwa.