1 Na agra kaima Gaius yo! Na pre mediglkwa yoba meglmara suna i, suglno yagl ta moglsre, pepa magigl i, ene bogl teiga. Ene ka kaima na dena muduna suna motnga.

2 Na agra ene dena muduna suna motnga i, ene kian mina wakai motnere yegl mere, ene mogl pai enatnara u wakai enan, te, ogon nagn mina ama wakai moratnedi kamage erika. 3 Nono agroma tau na moglmara udre, ene kanen di narikwa i, Gaius mabuno kaima duglo bogl moglmiwe digo, na prisre, gun podo yeiga. 4 Na gagra swara ta mabuno kaima duglo bogl moglmiwe digo, na prika igne, kaima gun podo yeiga. Na taragl tau pre gun kebra yeiga ba yoba ka yegl mere digo, na prika igne, gun podo kaima yeiga pre diga.

5 Na agra ene dena muduna suna motnga i, nono agroma ene motnara eigwa i, tau gumano drano kanga ya kankitnga akie ake ple di tenga i, ene God kamo dumere etnga pre wakai etnga. 6 Nono agroma ake ple di tenga i, ye ede ikne u Jisas yugobunomo magigl meglkwa ya di tedre, ene den mudun siragl mere ye tenga i, debin sigwa. Ana yoba yegl mere okuo ta ene motnara udre, ede eglke enamnedi unaiglkwa i, God ene ta eratnedi prumere i, ye ake ple di ten, i wakai kaima panabuka. 7 I siragl pre nono agroma Jisas kagie we di prisre, yene dumono kide kodo, ede meda eigwa igne, yoba Jisas ta pre mediglkrikwa meglmara eigwa i, ogono mina taragl swara ta i nekrikwa. 8 Yegl pre agroma yegl mere ta unaiglkwa i, nono ye i yugugl edidre, ake ple di tenamga paugwa. Nono yegl erumun, nono ye bogl akie God kamo kaima paugwa i, pare wai dinabedi kogon erumga mere yegl panabuka.

9 Ana Jisas yugobunomo ene motnara meglkwa i, na ka tau okna ene bogl teiga ba yagl Diotrefes we digwa i, ye meglmara suna yagl kade ta moragledi prisre, no kano bogl tomga prakiure, mane dugwa. 10 Ye yegl erukwa pre na wibo, ye mabunomo kide i, yoba gumuglnomugl di nogugl edenaglka. Ye no pre ka kide kane kane, mem wakai ta paikrukwa i dugwa. Te, ye ka kide keme dikrukwa ba agroma tau kogon ere wan, ede u ene meglmara wigwa igne, yagl i ye di ikre, yoba tau ye di inamnedi prikwa i mane di tedre, ene pre mediglkwa yoba makai simara i, ye ama mogl dinaiglmedi si meda edugwa pre kide kaima erukwa.

11 Na agra ene dena muduna suna motnga i, ene pro. Yoba mabuno kide ta eraiglkwa i, ene kandre, ye erimere yegl ta erekre, mabuno wakai ta eraiglkwa i, eraiglmere ero. Yoba ta mabuno wakai erukwa i, ye God bogl si dakagl miurka ba yoba ta mabuno kide erukwa i, ye God pre kan erekrukwa moglkwa.

12 Ana nono agroma meglkwa i, ye mudu yagl Demitrius moglkwa i, mabunomo wakai pame digwa. Te, God kamo kaima paugwa i, ama ye mabunomo wakai pamedi i nogugl edugwa. Te, no God kogonmo yoba munga i, no ama Demitrius mabunomo wakai pame dumgo, Gaius, ene no ka kaima dimedi pre pogl singa.

13 Na ka tau mere ama ene di tenagledi prika ba na buko pen ya ink idre, pepa mina borakiurka. 14 Na kuri ta moglsre, ene motnara unagledi pre gi diga pre na wibo, nono ka di ikne ikne edenabugledi prika.

15 Ana ene den mudun wida di inatnedi prika. Agroma abarama wagle magigl ya meglkwa i, ene wakai we di teigwa. Ana nono agroma abarama ene motnara meglkwa i, ene ye swara swarade kagno daglsre, na ene wakai we di tomiwe di to.