1 Agrama abarama wagle, na Pol ya Timoti bogl Krais Jisas niglmo kogonmo yoba moglsre, ene pepa bogl tobuglka. Ene God yobama mudu Jisas moglmara atne moglsre, dumo Filipai meglkwa i ya, ene suglno yoba ya niglno kogono yoba ta meglkwa i, akie pepa bogl tobuglka. Taun kade Filipai

2 Na prika i, Neno Kade God ya nono Yaglno Kade Jisas Krais ene yoko kaima ere wakai ere tedre, deno muduno wida di padigl tenabredi prika.

3 Ana na ene Filipai yoba pre poglo di prika igne, na Godna ege ege di wakai yei teiga. 4 Ye di wakai yei tedre, te, na ene pre kamage erika igne, na gun keme yedre, God ene ake ple di tenabedi kamage erika. 5 Na ene pre gun keme yeiga i, i siragl pre okna nono akie munga igne ede u erme pra, ene ege ege na bogl kogon babun ersre, Jisas kamo wakai i, ede eglke enabedi kogon erumga i pre na ene gun keme yei teiga. 6 Te, na pre kan erika i, God, ye ene deno muduno mina kogon wakai mabuno bogl erukwa i, ere kodinabedi prika. Ye ene deno muduno mina kogon ere pai mogl enan, Krais Jisas ede ikne unabiwe di, na yegl pre kan ersre, ene pre gun keme yeiga.

7 Ana na ene pre gun keme yeiga i, kuno erukwa. I siragl pre ene na dena muduna suna meglkwa. Ene na dena muduna suna meglme diga i, i siragl pre God nono akie ere wakai ere norsre, ye kogonmo akie eraiglmedi eruko, nono erme Jisas kamo wakai i, pare wai dinabedi kogon babun akie erumga pre ene na dena muduna suna meglkwa. Na okna wan mogl, Jisas kamo wakai i, yoba di tedre, ka kaima pamiwe di ye pre pogl sinaiglmedi erika igne i ya te, erme kane yugu moglka igne i ene na bogl akie kogon babun ere pai munga pre ene na dena muduna suna meglkwa. 8 Ene na dena muduna suna meglme diga i, God yene na kaima dumedi pre kan erukwa. Krais Jisas yene na moglmara kogon eruko, na ene dena muduna podo teiga pre diga.

9 Ana na ene pre siragl mere kamage erika i, di tebo, praiglmedi prika. Na ene pre kamage ere moglka i, ene deno muduno te ikne ikne edenaiglkwa mabuno i, ene meglmara yake ede u podo enabedi kamage ersre, te, ene God mabunomo pre kan ersre, nomane wakai wakai inaiglmedi kamage erika. 10 Na ene pre kamage yegl mere ersre, ama ene mabuno kane kane kan yubu sidre, mabuno siragl mere wakai kaima panabuka i, ene kan pogl sinaiglmedi kamage erika. Ene mabuno tau wakai kaima pamedi kan pogl sibi, ene aglau ta erekre, mabuno du keme duglo bogl meglbi, Krais ede ikne unabedi prika. 11 Te, na ama kamage erika i, Jisas Krais ene deno muduno mina kogon eran, ene mabuno du keme boglsre, mogo wakai koraiglkwa pre kamage erika. Ene yegl eribi, yoba kandre, God debie sidre, kagie kade tenaiglkwa. Yegl pre na ene pre kamage yegl ere moglka.

12 Agrama abarama wagle, na yubun idre, kane yugu pai moglka i pre erme dinaglka. Na ene pre pogl sinaiglmedi prika i, na yubun erme imara i mina, Jisas kamo wakai i, pare wai dugwa. 13 Na diga i, yegl pre diga, king soldiamo, ye dumo Rom suna meglkwa i ya te Rom yoba mere kide na kane paimara i mina Krais kamo prikwa. I siragl pre yoba na kana digwa i, Krais kamo i, Pol di wan moglkwa pre ye si kane sigo, kane pamiwe di, yegl digo, ye prisre, Krais kamo i pre di wan meglkwa. 14 Te, nono agroma abaroma dumo Rom magigl meglkwa i, ye tau mere ama kanigwa i, Pol yubun yugo, Yaglno Kade ye ake ple di tomiwedi kandre, ye nomane ta igwa. Nomane igwa i, Yaglno Kade no ama ake ple di norabuka pamiwe di prisre erme ye kudugl goglkre, God kamo yoba mere di te wan meglkwa.

15,16 Ana yoba tau mere ye Krais kamo di wan meglme diga i, tau ye na gun yei nare, deno muduno narimara i mina di wan meglkwa. Ye prikwa i, God ye Pol dedidre, Jisas kamo wakai i kaima pamiwe di, Pol yoba di tenabedi dedugo, Pol kogon yegl ere ugo, yoba ye kogon i pre si kane sigo, erme kane yugu pamiwe di, yegl prikwa. Ye yegl prisre, kogon erikwa ba yoba tau na kide kandre, yene kagno kade inamnedi pre Krais kamo di wan meglkwa. 17 Yoba i ye nomane wakai ta idre, kogon erekrikwa. Ye yene kagno kade inamnedi kogon ersre, nomane ta igwa i, Krais kamo yegl di wan mun, yoba tau mere no kano prisre, no duglo beglbi, Pol ye kane pai morabara i, yoba pi di tebi, ye prisre, nomane si, kide prabiwe di yegl prisre, Krais kamo di wan meglkwa.

18 Ana yoba ta God kogonmo kaima eramnedi prisre, kogon erimo mo nomane kide idre, kogon erimo mo i, pra erikwa ba ye Krais kamo i pi yoba di teimara i pre na gun yeiga.

Yoba tau mere Krais kamo digwa i pre na erme gun yedre, te, na mem ta ama pre gun yei pai moraglka. 19 Mem ta pre gun yei pai moraglka i, yegl paugwa, ene na pre kamage ere meglbi, te, Jisas Krais Murubuglomo ama na ake ple di naran, na kane yugu kide kodinaglka. 20 I siragl pre na taragl ta kaima plau dinabedi prika i, na yage sidre, agai ta goglkragledi prika. Na agai ta goglkre, okna adiglmere adigl gigledi ere pai moglbo, na mabuno boraglmara Krais kagie kade inabedi prika. Na goraglka mo kor moraglka pra.

21 Suo akie wakai paugwa. I siragl pre na kor moglbo, na Krais kagie kade inabedi swara eraglka. Te, na goglbo, na taragl podo inaglka pre i ama wakai paugwa. 22 Ba na kor mogl, God kogonmo ere pai moglbo, mogo wakai kogl pai morabuka. Yegl pre na goraglka i wakai praglo mo kor moraglka i wakai praglo mo i, na ta prikrika. 23 Na suo akie wakai panabedi prika pre kinana podo yogwa. I siragl pre na goglbo, Krais bogl akie morabuglka i, wakai kaima panabedi prika. 24 Yegl prika ba na kor moglsre, ene Filipai yoba ake ple di te pai moglbo, wakai panabedi prika pre kor moglbo, wakai panabuka.

25,26 Na kor moglbo, i wakai kaima panabedi prika pre na kor moglsre, ene meglmara wibo, ene pre mediglmara i mina gun yedre, yakenaiglmedi kogon eraglka. Te, na ene meglmara wibo, ene Krais Jisas na moglmara kogon erukwa i kandre, gun podo yenaiglmedi prika.

27 Ene meglmara na okuo unagledi prika ba erme we, Krais kamo wakai i, pamere mabuno yegl bolo. Ene yegl eribi, na u ene kanaglo mo kankraglka ba ene kano dibi, na prisre, gun yenaglka. Ene kano ta dibi, wakai praglka i, kuda yoba erimere mere ene nomano ya deno muduno swara yedre, Jisas kamo wakai i, pre medilo dimiwe dinaiglkwa.

28 Te, ene erme meglkwa i, yoba ene kudano ikne mere yegl moraiglkwa i, ene kuduglno kaima ta goglkrio! Ene kuduglno goglkre, adigl gigledi meglbi, ye kandre, nomane ta inaiglkwa i, God yene ere mogl, yoba i ere idre, no ere kide ere norabuka pamiwedi, yegl pre kan eraiglkwa.

29 Ana ene erme yubun tau igwa i pre dibo, ene praiglkwa. God yene ere mogl, ene Krais pre medraiglmedi konbauna yauro togo, ene pre medigl, ede suna wigwa. Ba God yegl keme erekrukwa. Ye ene Krais pre yubun ama inaiglmedi konbauna yauro togo, ene Krais pre yubun igwa. 30 Okna yoba tau na kudana ikne mere yegl meglkwa i, na ka mina kuda bogl teiga i, ene kandre, erme ama Pol kuda yegl ere moglmiwe digo, ene prikwa ba na swara yegl ta erekrika. Ene Krais pre yubun igwa pre ene na bogl akie Krais kudamo erumga mere yegl paugwa.