1 Na Jut, Jisas Krais niglmo kogonmo yoba ta moglsre, Jems agigle ta moglka i, na pepa ene bogl teiga. Ene meglkwa i, Neno Kade God ene agle didre, dem muduo togwa. Te, Jisas Krais ene suglno moglkwa. 2 Na prika i, God ene mitno goglsre, deno muduno wida di padigl tedre, dem muduo togwa mabuno i, ene meglmara u podo kaima enabedi prika.

3 Na dena muduna teiga meglkwa i, God nono ere yugwa ka i pre ene pepa bogl tenagledi prika ba kaniga i, na ka i pre boglkre, ene pre mediglkwa i, awagle bogl tenaiglkwa pre boraglka pamedi kaniga. Ka i, u ta pi dinabedi God yobama aimadi kamin sugl moraiglmedi togwa. 4 Na ka erme boglka i, i siragl pre yoba tau ene meglmara teke konbo ede suna udre, ka mabuno kibi digwa. Yoba i, God ka tage tenagledi, okna ibo di padigl kodugwa. Ye God mokono tedre, yoba di teigwa i, tadaglme kane kane ta eramga i, aglau ta paikrumiwa. God ere wakai ere noro pai morabiwe di, ka yegl digwa. Te, ye ama Jisas Krais, nono Yaglno Kade swara kaima moglkwa i, mokono teigwa.

5 Ka ta okna pre kodigwa i, aglke kor prio. Israel yoba dumo Isip mogl dinaiglmedi Yagl Kade ye ere yugwa ba okuo Israel yoba ye kamo ta pre mediglkrikwa meglkwa i, ye si goglkwa. 6 Te, okna ibo angelo tau, God ye kogon togwa i kide kodidre, yene dumono kide kodigwa i, God ye mim erumara si kane si edugo, meglkwa. Atne i pai mogl ebi, okuo ege kade kaima unabuka igne i, ye ka tage inaiglkwa pre erukwa. 7 Te, taun Sodom ya Gomora yebrara, taun tau magigl yeigwa i, akie angelo erimere eriko, God mudu ka tage togwa. Yoba i, ye yagl abu ta bogl kunogl nedre, ama yagl abu bogl swara panaiglkwa i kide kodo, yagl yene yagl bogl mabuno kide erikwa. Ana yoba doga aimadi kamin denaiglkwa mabuno i, God ye ka tage tomara i mina i nogugl edugwa. 8 Ba yoba ka kibi digwa i, ye yoba okna erimere ersre, yene ugl kubu ta kanimara i duglo boglsre, ogono nagino mina mabuno deglbi yogwa i, erikwa. Te, Yagl Kade nono bitno morabuka i ye mane didre, angelo gigledi meglkwa i ama ka kide di teigwa.

9 Ba Maikel angelo ta bitno moglkwa i, yene mogl mitna ede, Satan ka kide yegl ta di tekrukwa. Okna ibo Moses goglko, ye ogo nagie pre nonga dibrika ba ye Satan di te, Yagl Kade yene ene ka tedre, si kegl dinabiwe dugwa. 10 Ba ka mabuno kibi digwa yoba i, ye taragl tau pre pogl sikrikwa i, ka kide keme di teigwa. Te, ye agl bugla mabuno beglmere yegl, siragl taragl ogono nagino mina pogglau boglkwa i, ere wan moglsre, u kide eigwa.

11 Yoba i, kan kun erio do! Ye Kein erumere yegl ersre, te, yagl Balam mige moni pre bakagl tomere mere yegl, ye yegl keme eramnedi prikwa. Te, yagl Kora okna mogl mitna edidre, Moses kamo sedugo, God ye si goglmere mere yegl, yoba i God ama ere kide ere tenabuka keme paugwa.

12 Ene deno muduno swara yenamnedi kaya mokna akie neigwa igne, ye ama ede suna udre, ene si deglbi yeigwa. Si deglbi yedre, yene wakai moramnedi kaya mokna podo neigwa i, ye agai goglkrikwa. Kamun sinagledi erukwa ba ir mage, kamun kua si i ede eglke omere yegl, ene yoba i mina taragl wakai ta ikrikwa. Te, ede ta mogo korabuka egemo ugwa ba mogo ta koglkruko, yoba kandre, mabuno bogl, wake edimere mere yegl, yoba i ege suo goraiglkwa meglkwa. 13 Te, mudi nigl podo sugo, nigl eurie kide sumere yegl, yoba i mabunonono deglbi yogwa ede meda ugwa. Te, kugl kuri tau konbaunano kankrikwa meglmere yegl meglkwa. Yegl pre ka mabuno kibi digwa yoba i, mim podo erumara i, aimadi kamin moraiglmedi God di padigl kodugwa.

14 Ana okna ibo Adam gawama mogl wigo, yugobuno namba 7 mina yagl Enok moglkwa. Okuo yoba yegl ta moraiglkwa i pre Enok ka kep ere, yegl dugwa, Ene kanio! Yagl Kade ye angeloma mere kide bogl akie wigo, na kanie dugwa. 15 Yagl Kade ugwa i, yoba mudu kot ere tedre, yoba tadaglme ere, God mokono teigwa i, deno muduno borabedi pre umiwa. Ye God mokono tedre, God ka kide di teigwa i pre ye aglau erikwa i, pre kan eraiglmedi i nogugl edenabiwe di, Enok yegl dugwa. 16 Yoba kide i, ye ka kane kane didre, aglau erikwa igne, yoba ta di boglsre, yene mabuno kide ta eramnedi primere ere wan meglkwa. Ye drano mina yene kagno ake mitna edidre, yoba tau no ere wakai ere noraiglmedi ama kinano sigwa.

17 Na dena muduna teiga meglkwa i, nono Yaglno Kade Jisas Krais Aposelma ka okna digwa i, ene pre moraiglkwa paugwa. 18 Ye ene okna di teigwa i, yegl digwa, Ege okuo kaima God kamo gaugl ere tenaiglkwa yoba udre, God mabuno kane kane kide kanugwa i, eraiglmiwe di, yegl digwa. 19 Yoba i, God Murubuglomo ikre, makandigle yoba nomano pamere duglo boglsre, ene si pere pere edinamnedi ere meglkwa. 20 Ba na agrama abarama kaima meglkwa i, ene God kamo wakai pre mediglmara i mina adigl gigledi moglsre, yakio. Te, God Murubuglomo ene nomane tenabere mere kamage ere molo. 21 Te, Yaglno Kade Jisas Krais ede ikne udre, nono mitno gogl, aimadi kamin kor moramga norabedi kie ere molo. Kie ere meglbi, God dem muduo podo norukwa i mina moraiglkwa.

22 Ana yoba tau kinano suo yenabuka i, ene ye mitno goglsre, ake ple di teo. 23 Te, yoba tau moraiglkwa i, ene ye doga de dinaiglmedi ye ake i eglke edidre, ye ere io. Te, yoba tau deno muduno goglo paugwa duglo beglkwa i, ene ye mitno goraiglkwa. Ye mitno goraiglkwa ba ye kuguglno gaglno si deglbi yeigwa mere yegl paugwa pre ene ye erikwa i kide kan, ama ere dinamnedi kudugl goraiglkwa paugwa.

24 Ana God swara eran, ene yage sikraiglkwa. Te, aglauno ta paikran, ye abuglagemo mina adigl mogl, gun yenaiglkwa pre ye kagie kade tenamga.

25 Te, God swara kaima moglsre, nono Yaglno Kade Jisas Krais erumara i mina nono ere yugwa. Ye kagie kade paugo, ye ede okna kaima pidre, ye taragl mudu kaima bitno moglsre, kingno moglkwa. Ye okna kaima ibo yegl mere moglsre, erme ama yegl moglsre, okuo ibor ama aimadi kamin yegl morabuka. Kaima.